Ноябрянь 15-це чистэ Республикань Культурань кудосо Мордовиянь Прявтось яволявтызе МР-нь Государственной Собраниянтень Кучоманзо. Артём Здунов тешкстынзе региононь виевгавтомань сехте прявт ёнкстнэнь.
СВО-нтень лездамось
«Россиянть туртов уцяскань полавтыця неть читнестэ весе минь важодтяно сехте эрявикс тевенть лангсо – Тиринь масторонь сэтьмечинь топавтоманть ды минек вейсэнь ятонть изнямонть, – истямо валсо эсь Кучоманзо ушодызе Артём Здунов. – Ней эряви весе ресурстнэнь пурнамось, вейсэндявомась ды оймень кепедемась. Тёжат минек земляктне ней фронтсот – тюремань паксятнесэ, доброволецтнэнь отрядтнэсэ, прифронтовой госпитальтнесэ, гуманитарной лезксэнь колоннатнесэ, волонтёронь вейсэндявкстнэсэ ды границя маласо регионтнэсэ. Лиятне максызь сехте питнеенть, мезе ули ломаненть, – эсь эрямост. Минь свал карматано кирдеме мельсэ масторонь Геройтнень – офицертнэнь, командиртнэнь ды боецтнэнь. Сынь свал мартонок, ве стройсэ».
Маштовозтнень ледстизь чатьмонемань минутасо.
«Ёвтан тенк минек вейсэнь гражданской ответственностень пример. Россиянь Героенть, Григорий Слугинэнь, сон куломадонзо мейле казезь «Сырнень Теште» медальсэ, ульнесь мелезэ строямс ки Орданьбуе ёнксонь тиринь Баеньбуе велесэнть. Эштё эрямсто сон кортась аванстэнь: «Алтан, тейса весементь, ансяк ки тия ацан». Ды течи, Григориень тетянзо-аванзо, нинзэ икеле, минь ёвтатано – топавтынек Россиянь Героенть кармавтоманзо, – кемекстызе Артём Алексеевич. – Истя эряви кандовомс весе боецтнэнь ды сынст семиятнень кармавтоматненень ды энялдоматненень. Ды те ансяк вишка пельксэсь сень эйстэ, мезе миненек мереви теемс сыненст сюкпрянь ёвтамга ды сынст ледстнемга. Ули эштё вейке кармавтома – Григорий явсь покш мель гирянь спортонтень ды бажась вельмевтемс Мордовиясо те дисциплинанть коряс чемпионатонть. Пачтян – сы иестэнть саезь чемпионатось ули вельмевтезь ды алтави Россиянь Героенть Григорий Слугинэнь ды весе минек воинтнэнь ледстнемантень. Спортонь министерствань ды ДОСААФ-нь тевесь – анокстамс турнирэнть сехте покш уровеньсэ».
Покш пельксэсь токши боевой слаживаниянь таркатнестэ ветерантнэнь велявтоманть, сэтьме эрямонтень сынст тонадоманть. Эряви, штобу сынь ютавольть лецямо, реабилитация, получавольть профобразования ды витевлизь важодема таркань коряс кевкстеманть. Самай секскак республикась Россиянь регионтнэнь ютксто васенцекс топавтызе СВО-нь участниктнень диспансеризациянь программанть.
Экономикась
Предприятиятнень важодемаст вельде касы региононь валовой продуктась – тедеде экономикась кассь эштё 4 %. Промышленной производствань индексэсь касы малав 10 % – Мордовиясь сови ПФО-нь васенце вете регионтнэнь юткс. Эрязасто касы-кепети вишка ды средней бизнесэсь. МСП-нь субъекттнэ ламолгадсть малав 10 %, самозанятой эрицятне – 42 % седе ламос.
Вадря динамика невти потребителень рынкась. 7 % седе ламос кассь розничной микшнемань оборотось, оптовой микшнемань – 16 % седе ламос.
Тедеде Мордовиясо теезь экономикань башка зона. «Лисма» заводонь икелень таркатнесэ эсь производствань панжомань анокчиденть яволявтсть уш вете промышленной резидентт. Сынь путыть проекттнэс малав 7 млрд целковойть инвестицият ды теить 900 важодемань од таркат.
Башка мель – гособоронзаказонь топавтомантень. Ансяк те иень кавксо ковтнень перть сон кассь малав 70 %.
«Российской Федерациянь Президентэнть Владимир Владимирович Путинэнь лезксэнзэ вельде минь кундынек оптоволокнань производствань туртов преформань заводонь теемантень. Те весе масторонть туртов пек эрявикс проектэсь аравтозь технологической суверенитетэнь топавтомантень. Тедеде неть тевтнес явозь 2 млрд целковойть. Правительствань прявт тевесь – сыця кавто иетнень перть топавтомс проектэнь финансированиянть, явовтомс федеральной ярмакт ды панжомс заводонть», – мерсь Артём Здунов.
Раськеютконь сюлмавкстнэ
«Меельце шкастонть минь редявиксстэ келейгавтынек внешнеэкономической повестканть. Кемекстынек вейсэнь важодема Беларусенть, Китаенть, Азербайджанонть, Казахстанонть, Киргизиянть, Объединённой Арабской Эмираттнэнь, Катаронть ды зярыя лия мастортнэнь марто. Башка мель явтано Беларусь Республиканть марто ялгаксчинтень. Правительствань тевесь – топавтомс кемекстазь весе кортамотнень. Эряви поладомс «Амкадор», «МАЗ» ды «МТЗ» компаниятнень марто вейсэнь проекттнэнь, Беларусь Республикань покш компаниятнень вешемаст туртов келейгавтомс минек предприятиятнень промышленной продукциянь пачтямотнень номенклатуранть. Госкомтрансонтень ды ошонь Администрациянтень – автомобилень ды троллейбусонь парконь одкстомтомань коряс важодемасонть ванномс «МАЗонь» ды «Белкоммунмашонь» невтевкстнэнь», – мерсь Мордовиянь Прявтось.
Велень хозяйствась
Республикань агропромышленной комплексэсь уш кеменде ламо иетнень перть невти редявикс касома. Тедеде лиссь пурнамс малав 1,5 млн тоннат сюро. ПФО-нь регионтнэнь ютксо норовось минек чачсь сехте вадря. Пурназь 1 млн ламо тоннат ламбамо якстерькай, топавтозь сахаронь производстванть туртов эрявикс таштавкстнэ.
Мордовиясь кирди васенце таркатнень продукциянь прявт видтнэнь нолдамонть коряс. Ней АПК-сонть топавтовить 13 покш инвестпроектт, конатнень вейсэнь питнест 30 млрд целковойть.
Прявт тевтнень ютксо – велесэ эрямонть вадрялгавтомась. «Комплексное развитие сельских территорий» программанть ды лия федеральной программатнень коряс тедеде ветяви покш важодема. Теевить 55 объектт, финансированиянь вейсэнь покшолмась 2,2 млрд ламо целковойть. Те се инфраструктурась, конанть одкстомтоманзо эрицятне учость кементь иеть.
ЖКХ-сь
«Сехте стака ды талновтыця отраслятнень ютксто прявтокс кадови ЖКХ-сь. Ламот сеттне таштомсть, апак вите умонь мелявкстнэ ведень пачтямонь ды ведень отведениянь ёнкссонть. Ламо иень перть аважодемадонть мейле, конась сюлмавозель госдолконть марто, республикась, окойники, вельмевтизе эсь праванзо улемс ЖКХ-нь одкстомтомань коряс федеральной программатнесэ, истя жо инфраструктурань бюджетэнь кредиттнэнь тевс нолдазь. Правительствань тевтне: кочкамс прявт проекттнэнь, муемс финансированиянь лисьмапрятнень, идемс минек инвестяволявтоматнень федеральной уровеньсэ», – мерсь Артём Здунов.
Поладови общественной таркатнень вадрялгавтомась-мазылгавтомась. Тедеде покш важодема ветявсь республикань кемень районтнэсэ. Одкстомтозь паркт, скверт, площадть, бульварт – объекттнэ, конат пек эрявить эрицятненень.
Прявт кевкстемась, конась талновты республикань ламот эрицятнень, – веденть вадрячизэ. Тедеде «Чистая вода» федеральной проектэнть лувсо строязь ведень пачтямонь сетть ды водонапорной башнят Краснослободскойсэ. Теде башка, иенть прядовомс прядовить тевтне Саранскойсэ канализациянь коллекторонть (7 вайгельбень кувалмосо) ды Лямбирень районсо сборной водопроводонть (4 вайгельбень кувалмосо) педе-пев витнемаст коряс.
Строямонь ды килангонь хозяйствань тевтне
Мордовиясь эрязасто полады од микрорайонтнэнь строямонть, важоди эрямо таркань ды ипотекань весе программатнесэ. Иенть ушодовомсто саезь 600-то ламо семиятне сайсть семиянь ипотека.
Покш тевть аштить каладозь кудотнестэ одс эрицятнень ютавтомань од программанть лувсо. Вете иетнень перть а маштовикс кудотнестэ одс эряви ютавтомс малав 3 тёжат ломанть.
Сы иестэ эряви витнемс региональной ды межмуниципальной китнень 200 седе ламо вайгельбеть.
Прявт аравтомась – «Старый Город – Вещерка» автомобилень кинь строямонь ушодомась, сон вейсэндясынзе Санаксаронь ды Дивеевань монастыртнень – «Большой Саров» кластерэнть лувсо паломникень прявт таркатнень.
Финанстнэнь коряс
«Российской Федерациянь Президентэнть Владимир Владимирович Путинэнь лезксэнзэ вельде минь касттано финанстнэнь коряс управлениянь вадрячинть. Меельце кемень иетнень перть васенцеде Россиянь Минфинэсь яволявтызе вадрякс Мордовиясо региононь финанстнэнь управлениянть. Ней эсь доходтнэ седе кассть долконь сталмонть коряс. Минек вейсэнь тевесь – ванстомс касомань лувонть, топавтомс тень туртов финансированиянь лисьмапрятнень. Те эряви социальной тевтнень свалшкань топавтоманть ды СВО-нтень лездамонть туртов. Сы иентень путан аравтома поладомс госдолконь киртямонть, истя жо коммерческой кредиттнэнь», – мерсь Артём Здунов.
Шумбрачись
Федеральной лезксэнть вельде башка мель явови шумбрачинь ванстомань ёнксонтень. Тедеде рамазь од оборудования ды витнезь медицинань учреждениятне Саранскойсэ, Рузаевкань ды Дубёнкань районтнэсэ. Сы иенть прядовомс педе-пев витнеманть эряви топавтомс медицинань эштё кото учреждениятнесэ.
«Колмо иеде икеле Мордовиясо панжовсь Республиканской онкологической диспансерэнь од поликлиникась. Кадовкшнось апак вите стационаронь одкстомтомадо кевкстемась. Минек Президентэнть лезксэнзэ вельде сы иестэ минь кундатано онкодиспансерэнь од зданиянь строямонтень», – пачтясь Мордовиянь Прявтось.
Свалшкань важодема эряви ветямс диагностикань ды ушодовомань стадиятнесэ орматнень редямонть коряс. Узкой специалисттнэде велетнесэ аламо, секс седе домкасто важодема выездной бригадатненень. Тень туртов нолдави таркасто таркас ардтниця медицинань диагностикань центра.
«Эштё вейке ёнксось, конась веши мелень явома, – сотрудниктнень шумбрачист ванстомань коряс корпоративной программатне. Важодема таркатнень максыцятненень эряви ваномс предприятиятнесэ здравпункттнэнь теемань практиканть. Те аволь ансяк каясы сталмонть шумбрачинь ванстомань системанть лангсто, истя жо лезды ломанентень важодеманть апак кадо ваномс эсь шумбрачинть мельга, шкастонзо пшкадемс медицинань лезксэнть мельга. Минздравонтень эряви явомс лезкс важодема таркань максыцятненень предприятиятнесэ здравпункттнэнь анокстамосо ды лицензированиясо», – мерсь Артём Здунов.
Спортось
Тедеде Мордовиясо ютавтозь спортонь 700-то ламо мероприятият, сынст ютксто 120 – раськеютконь ды весероссиянь уровенень. Эйсэст примасть участия малав 50 тёжат представительть омбо мастортнэстэ ды Россиянь регионтнэстэ.
«Вельмевттяно «Готов к труду и обороне» весероссиянь физкультурно-спортивной комплексэнть, ютавттано ГТО-нь фестивальть важодемань коллективтнень, муниципальной ды государственной гражданской служащейтнень, истя жо школасо тонавтницятнень ды студенттнэнь ютксо. Спортонь мероприятиятнень вельде минь кепедтяно ломантнень мелест эрямонь шумбра лувонтень», – мерсь Артём Здунов.
Социальной политикась
«Миненек эряви весе вийсэ нолдамс тевс возможносттнень, конатне Российской Федерациянь Президентэнть кармавтоманзо коряс совавтозь «Семья» од нацпроектэнтень. Минек тевесь – эрьва семиянть туртов улезэ шожда получамс куш кодат услугатнень ды социальной лезксэнь ёнкстнэнь. Тень туртов иенть перть панжинек семиянь ламо функциянь кавто куншкакурот (Саранскойсэ ды Рузаевкасо).
Прявт тевтнень ды ответственностенть ютксо – сыре ломантненень лездамось. Прядозь Ковылкинань, Краснослободскоень, Ицялонь, Зубова-Полянань районтнэсэ кудотнень-интернаттнэнь ниле од корпустнэнь строямось. Ней очередьсэ Саранскоень Сыре ломантнень ды инвалидтнэнь туртов кудось-интернатось – сонзэ витнемантень явовить 1 млрд ламо целковойть», – тешкстызе Мордовиянь Прявтось.
Образованиясь
Мордовиясь ламо иетнень перть вансты васенце таркатнень тонавтнемань ёнкссонть. Свалшкане строявить од школат ды эйдень кужот, одкстомтови тонавтнемань заведениятнень инфраструктурась. Школатнень педе-пев витнемань программанть коряс вадрялгавтозь 38 объектт.
Федеральной центранть лезксэнзэ вельде сы иестэ Саранскойсэ 9-це № школанть таркас ушодови 500 таркас од зданиянь строямось.
Витнемань федеральной программанть коряс Мордовиянтень башка явовить 6 млрд ламо целковойть. Неть ярмактнень вельде маласо колмо иетнень перть арсеви педе-пев витнемс 55 школат, эйдень 14 кужот ды вете СПО-нь учрежденият.
Башка мель республикань Прявтось явсь эйкакшонь шумбрачинь витнемань лагертненень. Кавто иетнень перть федеральной центранть лезксэнзэ вельде строязь ниле од корпуст «Изумрудный» (Рузаевкань районсо) ды «Золотой колос» (Краснослободскоень районсо) лагертнесэ.
Культурась
2025 иесь карми сюпав республиканть туртов эрьва кодат мероприятиятнесэ.
Январень 10-це чистэ топодить 95 иеть Мордовиянь автономиянь теевемантень, истя жо сы иестэнть – 30 иеть Мордовия Республикань Конституциянь примамонь чистэнть.
Истя жо сы иестэ «кенярксчинь артыцянть» Федот Сычковонь чачома чистэнзэ саезь топодить 155 иеть, 2026 иестэ – 150 иеть «масторлангонь скульпторонтень» Степан Эрьзянень. Неть мероприятиятне ютавтовить масторонь прявт музейтнень марто вейсэ.
Туризмась
Мордовиясь пек вечкеви туристтнэнень. Касы республикав турпотокось. Тешкстазель, властень органтнэнь пельде эряви кирдемс предпринимательтнень ушодкстнэнь, конат алтавить внутренней туризмань виевгавтомантень. Республикасонть улить кочказь площадкат, конат туить мельс бизнесэнтень туристэнь инфраструктурань виевгавтомань коряс.
Прявт ёнксось – обслуживаниянь вадрячинть ды сервисэнь уровененть кастомась, сервисэнь ды инжень вастомань индустриясонть важодицятнень тонавтомась.
Те иень майстэ Саранскоень аэропортсонть панжозель раськеютконь авиасообщения. Артём Здунов кармавтсь министратнень кабинетэнтень – бизнес-сообществанть ды туроператортнэнь марто вейсэ арсемс ёнкст ливтямотнень географиянь келейгавтоманть туртов.
Од ломанень политикась
Кавто иетнень перть «Регион для молодых» пелькстамосонть минек республикась изнясь 300 млн ламо федеральной ярмакт. Те лездась витнемс Саранскойсэ Од ломанень центранть, педе-пев витнемс истямо куронть Рузаевкасо. Истя жо учови Чаунзань ды Дубёнкань районтнэсэ од ломантнень туртов неень шкань инфраструктурань теемась.
Сы иестэ Мордовиясо ютавтовить Студенттнэнь ютксо Равчирень федеральной округонь Х-це юбилейной Олимпиадась ды Донортнэнь весероссиянь од ломанень форумось.
Ине Изнямонь 80 иетнень тешкстамось
Эсь кортамонть прядовомга Артём Здунов лоткась сы иень прявт тевентень – Ине Изнямонь 80 иетнень тешкстамонть лангс.
Тень кувалма эряви явомс покш мель эрьва ветеранонтень. Эштё вейке прявт ёнксось – кеврунготнень, обелисктнень ды Ине Отечественной войнань шкань воинтнэнь калмазыртнень витнемась-ванськавтомась. Те важодемась карми ветявомо Ине Отечественной войнань шкань государственной ды военной деятельтнень, фронтовиктнень, тылэнь важодицятнень, Сурань рубежень строицятнень ды, нама, специальной военной операциянь участниктнень коряс ледстнематнень пингеде-пингес ванстомга мероприятиятнень лувсо.
«Весе, кода сестэяк, – ниленьгеменце иетнестэ. Минек покштятне-бабатне теизь весементь, штобу Тиринь масторось эряволь, штобу минь кирдевлинек мельсэ историянь уроктнень, – тешкстызе Артём Здунов. – Кода мерсь минек Президентэсь, национальной идентичностенть юрсо ульнесть ды кадовить поколениятнень ютксо сюлмотне ды койтненень-кирдатненень кемевиксчись. Сынь путозь минек генетической кодонтень».
Меельцекс Мордовиянь Прявтось 2025 иенть республикасонть яволявтызе Историянь ледстнематнень иекс.