Пятница, июля 01, 2022
Важное

 

Эрьва иень июнень колмоце недлячистэ масторсонок тешкстави Медицинасо важодицянь чись. Тень кувалма Республикань Культурань Кудосо пурназель торжественной промкс. Поздоровонь ёвтамо сакшнось Мордовия Республикань Прявтось Артём Здунов.

Васняяк пурнавозтненень невтевсь видеоролик, конасонть ёвтневсь Мордовиянь медицинань специалисттнэнь изнявкстнэде, тешкстызь меельце иестэнть важодемасо стака ёнкстнэнь, истя жо коронавирусонь инфекциянть каршо бороцямонть, явсть мель вадря полавтоматненень, конатне лиссть шумбрачинь ванстомань сферасонть.

Медицинасо важодицятненень пшкадемстэ, Мордовиянь Прявтось тешкстызе, региононь шумбрачинь ванстомань системанть вельде течи мереви ваномс вейке-вейкень чамас, конась апак кекше медицинань маскасо. «Медицинасо важодицянь чись – раськень кенярксчи! Ансяк Мордовиясо мон чарькодинь, улить ломанть, конат маштыть путомс пильге лангс, лецятадызь, зярдо а мереви сэредемс. Ды те ине тев! Ансяк сон чачи аволь чаво таркасо: те покш важодема ды профессионализма», – мерсь Артём Здунов.


Сон тешкстызе, региононь шумбрачинь ванстомань сферась моли икелев. Меельце иестэ панжозь зярыя медучрежденият, зярыя объектт витнезь, одкстомтовить первичной звенань учреждениятне. Ветяви покш важодема, штобу регионсонть одкстомтовольть онкологиянь госпиталень корпусось ды зярыя лия учреждениятне.
«Башка ёвтан кадратнеде. Татьяна Алексеевна Голикова тешкстызе, медицинань сехте вадря кадратнестэ веенстнэ – Мордовиясот. Минек специалисттнэ-медиктне эрявить аволь ансяк республикасонть, истя жо масторонь келес ды омбо мастортнэсэ. Республикань Медицинань институтось содавикс васолга. Тесэ тонавтнить ламо лия масторонь студентт», – тешкстызе региононь Прявтось.
Покш сюкпря ёвтазель отраслянь ветерантнэнь лемс, истя жо волонтёртнэнень-медиктненень, ламот юткстост седейсэст кандтнить бажамонть важодемс шумбрачинь ванстомань ёнкссонть. «Медицинась – те весе эрямонь тев! Те аволь шожда, ансяк пек эрявикс профессия, конантень покш мель явить эрицятне!» – мерсь Артём Здунов ды явшесь покш наградат медицинасо важодицятненень.
Лука Крымскоень медальсэ, конань Россиянь Президентэсь кемекстызе 2020 иестэ шумбрачинь ванстомасо покш изнявкстнэнь кисэ, казезь Комсомольскоень ЦРБ-нь врачось-терапевтэсь Николай Биряев.


«Заслуженный работник здравоохранения Российской Федерации» почетонь лемесь максозь Дмитрий Якушевнень, 30 ламо иеть сон ульнесь Саранскоень медицинань куроконь лезксэнь явомань станциянь прявтокс. Российской Федерациянь Президентэнь Почетной грамотасо казезь 4№ РКБ-нь анестезиологось-реаниматологось Сергей Гадеев, С. В. Катков лемсэ РКБ-нь приёмной отделениянь прявтось – врачось-терапевтэсь Елена Ларина. РФ-нь Президентэнь Благодарность яволявтозь Орданьбуень больницянь врачонтень-анестезиологонтень-реаниматологонтень Александр Мишиннэнь, Мордовиянь РЦКБ-нь чачтомань отделениянь прявтонтень – врачонтень-акушерэнтень-гинекологонтень Валерий Хаванскийнень, Ковылкинань ЦРБ-нь кардиологиянь отделениянь прявтонтень – врачонтень-кардиологонтень Наталья Забродинанень.

«Те покш казнесь максозь минек коллективентень, конасонть важодян. Ладязь тевтееманть, лия госпитальтнень марто чинь-вень сюлмонть ды республикань руководстванть пельде лезксэнть вельде миненек удалась изнямс коронавирусонь инфекциянть», – тешкстызе Наталья Забродина, арсесь шумбрачи весе медиктненень ды сынст малавикстнэнень.
Мордовиянь Здравоохранениянь министрась Олег Маркин ёвтась сюкпря коллегатненень весе вийтнень максоманть, алкуксонь важодеманть, панжадо ойметнень ды профессиянтень кемевиксчинть кисэ.


Министрась истя жо казинзе артомань коряс пелькстамонь изницятнень. Пелькстамось ютавтовсь медицинасо важодицятнень эйкакштнень ютксо, артовкстнэнь выставканть Артём Здунов ваннызе кенярксчинь мероприятиянть ушодовомадо икеле.
Изницякс кармасть Мария Волкова – Саранскоень Чачтомань кудонь прявт врачонть Лидия Ветчинкинань нуцьказо, Вероника Бирюкова, сонзэ авазо – Ицялонь ЦРБ-нь врач-инфекционист, истя жо Ангелина ды Ярослав Ремневтне, тетяст-аваст важодить Медицинань куроконь лезксэнь явомань станциясонть фельдшерэкс.
Кенярксчинь промкссонть истя жо ульнесь МР-нь Госсобраниянь Председателесь Владимир Чибиркин. Сон истя жо ёвтась лембе поздоровт пурнавозтненень ды весе сетненень, кить те чистэнть топавтсть эсь тевест, а сехте вадрятнень казинзе покш казнесэ.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».