Алина Прончатова эри ды важоди Московсо, ансяк а стувтни эсензэ ундоксонзо. Аволь умок социальной сеттнесэ Мордовия Республикань куротнесэ появась мазый фото, конасонть невтеви эрзянь раськень стилизованной оршамопельсэ кувака черь марто тейтерька. Те фотось тусь мельс ломантненень, эрьвась бажась содамс сонзэ алкуксонь историянзо, конань минь евтнесынек эсь ловныцятненень.
Фотонь авторось – Алина Прончатова, снимкасонть – Ева тейтерьказо. Тейтерьавась вана уш 5 иеть важоди профессиональной фотографокс. Те тевенть панжизе эсензэ туртов омбоце эйде марто декретсэ аштемстэ. Ней уш церынезэ покшке, эсензэ ерокчизэяк седе кассь. Алинань, кода вадря фотографонть, содасызь ламот. Сонзэ тердтнить снимсеме свадьбат, лемдемат, кудораськень куш кодат кенярксчить ды ламо лия мезе. Кода евтни сонсь тейтерьавась, сонзэ важодемань ерокчизэ чиде-чис касы, теньсэ тензэ лезды свалшкань важодемась. Мезе-бути лезэв Алина саи лия фотографтнень пельдеяк ды касты эсь содамочинзэ, самай истя чачитькак лия енов а молиця важодевкстнэ.
– Улемс вадря фотографокс – тевесь а шожда, «шкинемань толгась» свал аштезэ верев, эдь снимсицятнеде масторсонть байтяк, тонеть жо эряви улемс седе ероковокс ды туемс мельс ломанентень, арсемс лиятнень енов а молиця фотопроектт. Тонь шкинемань лисьмапрясь свал улезэ пешксе од мельде-арсемадо. Ды а эряви стувтнемс шкадонтькак, конась минек эрямонтень эрьва чи совавты полавтомат. Тон ансяк кенерть одонть мельга. Ули монь шкинеманть вечкицятнень ютксо кудораське, конань марто вана уш 5 иеть кирдтяно ояксчинь кеме сюлмот. Истя лиссь, од ломантне састь монень васенце съемкав, зярдо ансяк кармасть вастневеме, седе тов якинь снимамо сынст свадьбаст, теинь фотот, зярдо од мирдть-нить учость васенце эйкакшост, кода сон чачсь, снимия лемдеманзо ды истя седе тов. Те семиясь лемди эйсэнь эсест кудораськень историянь ванстыцякс. Эдь мон неинь, кода ушодовсь сынст семиянь историяст, ды ванан, кода сон сермадови седе тов, – евтни Алина.
Алинань чачома тарказо – Чаунза поселкась. Тесэ ютась мелявкстомо эйкакш пингезэ. Сисемеце классо тонавтнемстэ тейтерькась аванзо марто тусть эрямо Мордовиядо пек васов – Ростов-на-Дону ошов.
– Авам се шкане важодсь Чаунзань содавикс предприятиясо, тосто сонзэ ды эште зярыя од специалисттнэнь кучизь важодеме Ростовов. Школам прядыя тосо. Эйкакш пингень мелем ульнесь молемс тонавтнеме театральнойс, эрямосонть жо весемесь лиссь лиякс. Авань кармавтоманзо коряс кочкия Аграрной институтонть, конань эзия прядо. Важодема таркав лисемадо икеле эрявсь полавтомс документэнь, тень коряс савсь ардомс Мордовияв. Тиринь енксов самось казизе тень вечкевикс ломанень марто вастовоманть. Весть чокшне ялгань марто молинек клубов, тосо теевинек содавиксэкс Антон од церанть марто. Сонгак Чаунзань ломанесь, уш сестэ важодсь Московсо. Эзинек арсеяк, зярдо-бути карматано вейсэ. Кизэсь прядовсь, сон тусь Московов, мон – Ростовов. Ансяк вечкемась ульнесь минденек виев, иень перть тошначинть витинек телефононть вельде, лиясто вейкень-вейкень туртов сермадынек конев лангсо сермат. Минек ютксо раштась покш ды алкуксонь вечкема, секскак мон апак кавтолдо лисинь тензэ мирденень ды туинь эрямо Московов. Антон марто вейсэ эрятано 10 иеть. Ева тейтерьканок яви мель художественной творчествантень, пек вечки артомо. Алексей церыненек уш вете иесэ содасы, кикс карми улеме, зярдо касы. Сон неи прянзо артистэкс. Вадрясто моры, киштемасояк ероков. Арсян, ловныцятне чарькодьсызь, кинь пельде Алешань туртов ютась артистизмась. Мон неян эйсэнзэ эсень прям, – мизолдозь корты авась.
Эряви евтамс, Алина Прончатовань семиянзо историясь пек сюпав. Тетязо, Александр Николаевич, Орданьбуень эрзя. Авазо, Марина Владиславовна, чачсь Узбекистансо, шкань ютазь вишка тейтерькинекс бабанзо марто састь эрямо Мордовияв. Авась а пек вечки тень ланга кортамо, ансяк Алина эйкакш пингестэ саезь соды, сонзэ эрямонь чувтонь историязо сюпав. Ды тень кувалма кирди покш каштанчи. Авазо пек бажи пачкодемс трицянзо чачома масторов, варштамс, кода тосо эрить малавиксэнзэ.
Аволь умок Ева тейтерьканзо школасо ютавтовсь Тиринь масторонь ванстыцянь чинтень алтазь концерт, эйкакштнень кармавтсть самс кодамояк раськень оршамопельсэ. Авась пек кенярдозевсь. Сон сеске ледстинзе тиринь Мордовиянть ды эрзянь раськенть. Васняяк арсесь рамамс тейтерензэ туртов анок стазь оршамопельть, ансяк шкань ютазь сась мель варчамс анокстамс сонзэ эстензэ. Теньсэ тензэ вадрясто лездась Орданьбуень краеведениянь музеень сайтось, косто авась ваннось эрзянь оршамопелень умонь фотот. Неть фототне ды сынст историяст казсть Алинань туртов мелень кепедема. Авась, кода машты, стась тейтерензэ туртов эрзянь эйкакшонь стилизованной костюм. Весе эрявикс материалтнэнь Алина раминзе онлайн-лавкасто.
– Зярдо мон стынь те костюмонть, мелем ульнесь вейке – невтемс лия раськетнень туртов, кодат сюпавт ды мазыйть эрзятнень культураст, коест-кирдаст. Алкукскак, эрьва оршамопелень пельксэсь канды эсензэ смусть, евтни история. Кенярксчистэнть тейтерькан перька пурнавкшность ламо ломанть, эрьвась кевкстнесь, дивсесь оршамопеленть мазычинзэ кувалма. Мон покш мельспаросолинь, зярдо Евань фотонзо путызь Мордовия Республикань интернет-сайттнэва-куротнева, се чистэнть фотонть ало а содавикс ломантнень пельде семиянек ловнынек ламо лембе валт. Неень шкане ламот эйстэденек тагояк велявтыть ютазь шкатнес, тонавтнить эсь раськень историянть. Моненьгак те тевесь теевсь малавикс. Зярс вешнинь оршамопелень фотот, ламо мезе карминь содамо эрзянь-мокшонь ломантнеде, ней мельспаросо евтнян эйкакштненень, – корты Алина Прончатова.
Алина ломанесь творческой, свал лаки кодамояк тевсэ. Кемтяно, маласо шкасто аванть чачи кодамояк эсензэ проектэзэ, конась, паряк, ули кеместэ сюлмавозь тиринь раськенть историянзо марто.
Алена Артемьева
Фототне саезь
Алина Прончатовань архивстэ.