Воскресенье, июля 21, 2024
Важное

 

Мордовиясо прядыть пиже кснавонть нуеманзо. Те иестэ те культурадонть видезельть 1800 гектарт, седе покш пельксэсь – Ромодановань райононь паксятнесэ.



Кодамо лувсо ветявсь пиже кснавонть нуемась, минь неинек Лямбирень райононь паксятнесэ улемстэ. Вадря кснавонь пурнамонь явовтыця ёнкстнэде миненек ёвтнесь Евгений Александрович Буров, Ромодановань райононь «Комсомолец» ООО-нь Лямбирень отделениянь агрономось.

– Тедеде минек отделениясонть пиже кснавдонть видезь 350 гектарт. Нуеманть ушодынек июлень 1-це чистэ. Важодемась ветяви чинек-венек, секс што Консервань теемань заводонть важодеманзо а лоткавтсак ды сонзэ эряви топавтомс сырьясо. Теке марто кенерезь кснавонть Консервань теемань заводов эряви пачтямс седе куроксто, штобу сон аволь коле. Ней ушосонть читне аштить псить, весементь снартнетяно теемс седе эрязасто, штобу кснавонть пачтямс шкастонзо, – ёвтни Евгений Буров. – Нуемань васенце читнестэ урожаесь тешкставсь 30–35 центнерт гектарсто. Те иень пертьпельксэнть коряс неть невтематне а берянть. Минек Лямбирень районсонть пиземеть тундонть прядовомсто ды кизэнь васенце ковстонть малав овсе арасельть, касовкстнэнень летькесь эзь сато. Тень лангс апак вано, мертяно, кснавось чачсь а берянь.

Кода ёвтнесь Евгений Буров, кснавонть нуемасо сынст отделениясонть роботасть вете комбайнат, конатнень руль экшсэ – эсь тевень содыця механизаторт.

– Механизатортнэ минек алкуксонь. Роботыть вадрясто, эсь тевенть содасызь. Сынь парсте чарькодить, нуема шкасто эряви важодемс эрязасто. Покш сюкпря тенст тень кисэ, – корты Евгений Александрович. – Техникась важоди а беряньстэ. Вететнень ютксто вейке комбайнась од, сон рамазь мелят. Лиятнень важодеманть мельга ваннотано пштистэ. Нама, роботамсто эрьва мезе лисни. Ансяк бути комбайнась калады, шканть а таргсетяно, механизатортнэ витнить сонзэ теске – паксясо. Теньсэ лездыть минек предприятиянь механиктнеяк, конат эрязасто ардыть паксяв.


Истя жо агрономось ёвтнесь, кснавонь нуема шкастонть башка мель явови комбайнатнень шлямонтень-ванськавтомантень. Эрьва комбайнанть бункерэзэ зярыя шкань ютазь вадрясто шляви.
– Тень теема обязательна. Эдь кснавось мерькавияк, ведь эйстэнзэ лиси ды агрегатонь пелькстнэ пештявить те массадонть. Неть кадовкстнэнь эряви ванськавтомс бункерстэнть ды секскак агрегатонть шлить. Теке марто комбайнатнень шлямось эряви сень туртов, штобу пиже кснавонть вадрячизэ аволь коле, – тешксты Евгений Буров. – Нама, тень лангс шкась ютавтови аволь аламо – 1,5–2 част ды тевеськак те а шожда. Агрегаттнэнь шлить ванькс ведьсэ, эйзэнзэ мезеяк а човоряви.


Евгений Александрович марто лездыцякс ардтни од специалистэсь, сы шкань агрономось Виктор Спиридонов. Од цёрась тонавтни Н. П. Огарёв лемсэ МГУ-нь Аграрной институтсо. Тонавтни тосо «Комсомолец» ООО-нь направления вельде. Ды договоронь коряс вузонть прядомадо мейле сон тей сы важодеме.

Кода ёвтнесь цёрась, ней сонзэ практика. Сакшны эрьва чистэ ды домкасто ваны сень мельга, кода топавты эсь тевензэ Евгений Буров агрономось. Тонась весементь тензэ ёвтни, толкови. Евгений Александрович тешксты, од ломаненть улить содамочинзэ, сынст эряви ансяк кемекстамс ды эйстэнзэ лиси паро агроном. Сынст хозяйствантень истят эрявитькак.

Икеле уш тешкстынек, хозяйствасонть важодить эсь тевень содыця алкуксонь механизаторт. Вейкесь эйстэст – Александр Николаевич Кандрашкин. Кснавонь нуемань комбайнасо сон роботы омбоце ие, тень лангс апак вано, те тевенть содасы парсте. Сонсь цёрась Отяжелень райононь Ботужелестэ, эри Ромодановасо ды вана уш колмоце ие роботы те райононь «Комсомолец» ООО-со. Свалшкане Александр Кандрашкин роботы водителекс КамАЗ-со. Норовонть нуема шкасто ускси сюро, сёксня – ламбамо якстерькаенть.

– Велесэ чачозь-касозь, профессияяк эстень кочкинь мода марто сюлмавозь. Школанть прядомадо мейле тонавтнинь Отяжелень 13-це № СПТУ-со механизаторонь тевентень. Ды вана уш зярыя иеть роботан, – ёвтни Александр Николаевич. – Важодемась тень мелень коряс, лия лангс а полавтса.

Александр Валерьевич Тарасов хозяйствасонть важоди комбайнёрокс. Кода кортыть, сон шкань (сезонной) роботник. Вана уш колмоце ие кснавонь нуема шкасто ды ламбамо якстерькаень таргамсто лезды «Комсомолец» ООО-нтень, роботы комбайнёрокс. Свалшкане жо Александр Тарасов важоди «Ромодановосахар» ООО-со крановщикекс.
Цёрась Ромодановань райононь. Средней школанть прядомадо мейле тонавтнесь Саранск ошонь машиностроительной техникумсо, получизе крановщикень специальностенть. Аламос роботась Саранскойсэ, мейле ютась Ромодановань сахаронь теемань заводов ды вана уш кавксодо ламо иеть важоди автокрансо.

– Зярдо ушодови пиже кснавонь нуемась, седе тов ламбамо якстерькаень таргамось, мон зярыя шкас ютан те хозяйствантень, роботан комбайнасо, – ёвтни Александр Тарасов. – Истя, комбайнёрокс важодемаськак тень мелень коряс, крановщикень тевентькак вечкса. Зярдо вадрясто весемесь лиси, мекс бу а роботамс.


Кода уш ёвтынек, комбайнатнень мельга нуезь кснавонть КамАЗ-со эрязасто пачтить Саранск ошонь Консервань теемань заводов. Вейке истямо КамАЗ-нь водителекс роботы Анатолий Иванович Храмушин. Предприятиясь сонзэ сиведи ве ёндо. Хозяйстванть прявттнэ цёранть содасызь умок, важодеме сон машты ды весементь теи вадрясто, секс сиведитькак эйсэнзэ эрьва ие аволь ансяк пиже кснавонь нуемань шкастонть, сюротнень ды ламбамо якстерькаенть усксемеяк.
Анатолий Храмушин КамАЗ-нь руль экшсэ малав весе эрямонзо перть. Седе сеедьстэ роботы Ромодановань райононь предприятиятнень лангс. Эсь техникасонть сон нучк-пачк ардтнинзе минек республикань весе районтнэнь. Кода тешксты водителесь, тундосто саезь малав теленть самс роботы, тельня жо витни-аноксты эсь техниканть.
– Штобу машинась вадрясто роботаволь, сонензэ эряви явомс мель. Секскак, мезеяк лангс апак вано, тельня монь КамАЗ-сь ашти гаражсо, витнян эйсэнзэ, анокстан сы иень тевтненень. Лиякс кодаяк. Техниканть эряви вечкемс, монь туртов сон триця-андыця.
Лямбирень райононь Черемишево веленть маласо паксясонть, косо урядасть пиже кснавонть, минь ульнинек ютазь недлянть ушодовомсто. Течинь чинтень «Комсомолец» ООО-нь Лямбирень отделениясь те культуранть нуеманзо уш прядызе. Велень хозяйствань важодицятнень учить уш лия тевть.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».