Валерий Васильевич ды Елена Николаевна урьвакстсть-венчасть 1993 иень майстэ. Маныть топодсть колоньгемень иеть, кода сынь вейсэть. А мезть сёпомс, те семиянть эрямось прок варчнесь нардевчи лангс, кода ансяк ушодсть вейсэ эрямо. Вейксэньгеменце иетнестэ эзть пандо зарплатат, важодема таркатнень яла киртясть. Паряк, самай сеть иетнестэ сынь тонадсть пек ламос. Васняяк стакачиде апелемас, тевтеме аштеме авечкемас, виевстэ важодемас. Ванат те мазыйстэ оршазь кудазораванть лангс ды арсезеват, косто сон зняро вийть амольди, кенери эрьва мезень тееме.
Виде, истямо покш семиясь аволь ансяк андомс-симдемс эряви, эштё оршамопелень ды карсемапелень рамамскак туить ламо ярмакт.
Истя, 2023 иестэ мирдть-нить Валерий Васильевич ды Елена Николаевна прасть вемельс: ламолгавтомс ракшатнень, панжомс эстест од тев – теемс сыр. Тень ловозь, кудазорось машты тееме эрьва мезе ды парсте тевензэ ютыть важодема таркасо, кудоютксояк саи эсензэ лангс пек ламо тевть ды эйкакштнень мартояк свал муи кель-вал. Сонзэ кияк ды зярдояк эзизе редя тевтеме озадо аштемстэ. Кудопотсо весемесь топавтови-мазылгавтови сонзэ сырнень кедтнесэ.
Вана истя 2019 иестэ Сидоровтне рамасть ведьгемень прят сюракшов ракшат. Семиянть туртов те кармась покш лезксэкс. Ней сынст ули ламо эсест ловсост, сывелест, вельксэст, топост. Валерий Васильевич ушодсь эйкакштнень тонавтомо ракша мельга якамо. Истя, сынь вишкапингстэ тонадыть парсте важодеме, шканть ванстомо ды тензэ питнень максомо. Виде, те весе пек эряви вишкинетненень, покштне жо муизь эсь эрямо кист, эрить лия таркасо, юткошкасто свал бажить самс тетянь-авань кудов. Ков сатыть виест лездыть тенст, теньсэ паро пример невтить вишкинетненень. ЭЙКАКШТНЕДЕ Сидоровтнень семиясо кото эсест ды ниле трямс саезь эйкакшт: Кирилл, Диана, Марк, Давид, Карина, Семён, Вадим, Надежда, Александр, Владислав.
Елена Николаевна бажи явомс мель эрьва эйкакшонтень, штобу сон касоволь ламонь содыцякс ды шумбракс. Кудоютконь тевтнень прядомадо мейле сеедьстэ эрси Кемлянь средней общеобразовательной школасо, косо сон сови тетянь-авань комитетс. Вейсэ лия тетятнень-аватнень марто пурны эйкакштнень ды тонавтыцяст эрьва кодамо культурной мероприятиятнес. Сынь якить походс вирев, экскурсияв лия оштнева ды истя седе тов. Сон свал эйкакштнень вакссо: кудосо, школасо, оймсема таркасо.
Ушодтано сехте покшонть эйстэ. Кирилл эштё школасо свал невтсь домка содамочить. Сон тонавтнеманзо поладызе Москов ошонь Геодезиянь ды картографиянь государственной университетсэ. Неень шкане эри Московсо, важоди специальностень коряс. Сонзэ ули семиязо, маныть чачсь цёрынезэ.
Омбоце цёраст, Вадим Руин, прядызе Н. П. Огарёв лемсэ Мордовской государственной университетэнть «Ветеринария» специальностень коряс. 2022 иестэ сон идесь кандидатонь диссертация, тензэ максозь «кандидат сельскохозяйственных наук» учёной степенесь. Диана Маталыгина тейтерест тонавтни М. Е. Евсевьев лемсэ Мордовской государственной педагогической университетэнь омбо масторонь кельтнень факультетсэ, парсте содасы англань келенть. Эсь шкастонзо прядызе «Живопись» классонь коряс художественной школанть. Диана аволь пек умок лиссь мирденень.
Надежда тейтерест 2024 иестэ прядызе Ицялонь педагогической колледженть, тонавтнесь «дизайнер-оформитель» отделениясонть. Пек вечки артомо ды стамо. Надежда Егоркина эрьва тевсэ лезды аванстэнь: кудонть ванськавтомсто, тантей ярсамопелень пидемстэ… Кавто цёрынест, Александр ды Марк, кить мелят прядызь школаст, ней студентт. Александр Егоркин тонавтни Кемлянь аграрной колледжсэ. Сонензэ пек вечкевить информатикась ды спортось. Тельня юткошкасто якси вирьга сокссо кирякстнеме, кизна – калонь кундсеме. Эштё Александр тонадсь чувтосто эрьва мезень керсеме. Теке шкасто мукшны шка аванстэнь кудоютконь тевтнень топавтомсто лездамо, тетянстэнь – фермасо озямо. Марк Сидоров эрямонь тевекс кочкизе медицинанть, тонавтни «Стоматология ды ортопедия» специальностенть коряс. 2024 иень сёксня кармась улеме Чувашиянь Минздравонь «Чебоксарский медицинский колледж» БПОУ-нь студентэкс. Васенце курссо тонавтнемстэ невтизе прянзо ёроков цёрынекс: шкастонзо топавты максозь тензэ тевенть, юткошкасто вечки гитарасо налксеме, эрьва кодат фигуркань тейнеме (лепка). Тенень сон тонадсь эштё школасо тонавтнемстэ, весе мероприятиятнесэ свал икеле молицятнень ютксоль. Марк Сидоров 2017 иестэ «Экология. Дети. Творчество» республиканской пелькстамосонть саекшнизе васенце тарканть. Теке жо иестэнть лиссь изницякс «Школьный патент – Шаг в будущее» пелькстамосонть ды «Жизнь в сказочных вещах в наше время» раськеютконь эйкакшонь конкурсонь муниципальной этапсонть. Давид Сидоров ды Владислав Хмельков эйкакшост знярс эштё тонавтнить Кемлянь средней общеобразовательной школасо вейксэце классо, сынь жо кенерсть невтеме ёрокчист эрямонь шумбра лувонь кемекстамонть коряс. Сынь якить спортонь секциятнес. Истя, Владислав эрьва иестэ лисни изницякс ды призёрокс райононь, республикань пелькстамотнесэ греко-римской ды вольной борьбань коряс.
Сонзэ эйстэ тунь а кадови удалов Давидгак, кона аволь весть лиснесь изницякс вольной борьбань ды футболонь коряс. Сон ламоксть сайнинзе васенце таркатнень кода эсест Ицялонь районсо уликс пелькстамотнесэ, истя жо республикасонок ютавтовиця мероприятиятнесэяк.
Сидоровтнень семиясо теевсь кой – цёрынетне седе сеедьстэ лездыть тетяст туртов цёрань тевтнень топавтомсто. Сынст эйсэ тонавтыть улеме алкуксонь цёракс, кить маштовольть бу аволь ансяк эрьва мезень тееме, эштё тейтертнень, аватнень жалямо, бути эряви, ванстомо. Тейтерькатне жо кастовить кудазоравань тевтнень топавтомо вечкицякс, перькаст весе улезенть лембелгавтыцякс ды мазылгавтыцякс. Невтемакс, Карина Сидорова зярс тонавтни кавксоце классо, тейтерькась эрьва ков кенери. Сон Кемлянь общеобразовательной школасо активистка, тонавтни парсте, пек вечки художественной литературань ловномо, музыкань кунсоломо. Сон эштё тонавтни музыкальной школасо «Фортепиано» классонь коряс. Ёрокчинзэ невтни республиканской пелькстамотнесэ. Домка содамочить невти предметэнь олимпиадатнесэяк. Семияст ланга нурька фильмат теи сисемеце классо тонавтниця веженсь цёрынест Семён. Сон саи весе паронть лелятнень ды патятнень пельде. Вечки морамо, стихотворениянь ёвтнеме. Семёнонь парт невтевксэнзэ кода школань предметтнэнь, истя спортонь коряскак.
Сидоровтнень семиянть башка ёнксонзо – ушодозь тевенть педе-пес прядомась, лия ломантнень марто кортамо маштомась, вейке-вейкенень лездамось ды чарькодемась. Весе те саеви кудораськестэ. Эдь велесэ эрьва семиясь, ломанесь пачк неяви: кодамо сонзэ обуцязо, кить сонзэ тетянзо-аванзо, семиянть эрямо лувозо ды истя седе тов. Те кудораськесь бажи ванстомс ды ламолгавтомс покштятнень-бабатнень койтнень-кирдатнень. Сынь свал тешкстыть истят кенярксчитнень, кода, саемга, Отечествань ванстыцянь чинть, Семиянь, вечкемань ды кемемань чинть, Мартонь 8-це чинть, Авань чинть ды аволь пек умок кемекстазь Тетянь чинть. Сынь покш мель явить эйкакштнень патриотической лувсо кастомантень, теить весементь, штобу сынь содавлизь ды аволизь стувто минек историянть. Семиянь кенярксчитнестэ эсест вийсэ анокстыть концертт, киштить-морыть, невтить ёрокчист. Валерий Васильевич ды Елена Николаевна, неень шкань технологиятнень лангс апак вано, явить покш мель семиянь питнейчитненень, сеть койтненень-кирдатненень, конат ютасть тенст покштяст-бабаст пельде. Вановтост коряс, неень шкане, кода икелеяк, аламо чачтомс ды саемс трямс эйкакшт, ков седе эрявикс тевесь – трямс-кастомс алкуксонь патриотт, ломанькс путыця, шабра марто ды важодема таркасо весень марто ладямо маштыця, шумбра, кеме ломанть, конатнень кувалма аволь уле визькс кода кудосо, истя жо обществасояк ды кить анокт поладомс Сидоровтнень раськенть, ды, бути эряви, ванстомс тиринь ёнксонть. Валентина Юдина