«Национальная школа лидерства» форумонть пингстэ Эрзянь ды мокшонь Нацтеатрасо панжовсь «Наши герои СВО» выставка.

Сонзэ анокстыцякс кармасть «Защитники Отечества» фондонь минек региононь филиалось ды РФ-нь финнэнь-угрань раськетнень Ассоциациясь, лездась раськетнень тевтнень коряс Федеральной агентствась. Фотовыставкась алтазь Кудораськень, вечкемань ды кемемань чинтень.

Фотографиятнесэ – специальной военной операциянь ветерантнэ малавиксэст марто. Снимкатнень теинзе Саранскоень фотографось Олеся Варламова.

– Минь аштетяно каштанчисэ эрьва кодамо раськень боецтнэнь кувалма, эдь тосо, фронтсо, сынь вейсэ идить масторонок. Сюконятано специальной военной операциянь ветерантнэнень, конат парсте топавтызь воинской тевест. СВО-нь участниктненень арсян ансяк Изнямо! – кортась РФ-нь финнэнь-угрань раськетнень Ассоциациянь прявтось, РФ-нь сенаторось Пётр Тултаев.

«Защитники Отечества» фондонь филиалонь прявтонь полавтыцясь Екатерина Глазунова тешкстызе, фотографиятне теезь «Семья. Отечество. Герои» фондонь фотопроектэнть лувсо. Иенть прядовомс фотовыставкась невтеви Мордовиянь эрьва районсо. «Эрьва снимкась – те минек масторонь ды семиянь история, сынст эряви ванстомс эйкакшонок-нуцьканок туртов», – мерсь Екатерина Глазунова.

Вейке портретсэнть невтезь Рузаевкань районсто СВО-нь ветеранонть Сергей Кочневень семиязо. Спецоперациядонть икеле сон важодсь Левжань музыкальной школасо тонавтыцякс. Фронтов тусь эсь олясо, казезь Мужествань орденсэ. Снимкасонть сон Артём цёранзо ды Кира тейтерензэ марто. «Истят фотопроекттнэ пек эрявикст тенек, ветерантнэнень. Сынь ванстыть сехте питнеенть, течинь чиде ледстнематнень – ламо иес», – мерсь сон.

– Тетям монень эрьва мейсэ сехте паро невтевкс. Сонзэ вельде седеяк пек карминь вечкеме тиринь мастором ды тиринь ёнксом. Аштян каштанчисэ кувалманзо! – мерсь Артём Кочнев.

Выставканть панжомсто музыкальной казне анокстасть морыцятне Сергей ды Виктория Моряковтне, Анна Гранина.

«Наши герои СВО» выставкась сёксня невтеви Московсо.

Анокстызе

Татьяна Маторкина.