Кияев Василий Никифорович чачсь Кочкурбуень Сурвелесэ. Прядсь Волгоградонь политехнической институт. 1977 иестэ саезь 1999 иенть самс важодсь Волгоградонь сталепроволочноканатонь заводсо, васня бригадирэкс, мейле производствань ды микшнемань коряс прявтонь полавтыцякс, 2000 иестэ саезь – «Югканат» ООО-нь прявт.
Волгоградонь Красноармейской райононь 45 № округканть 2004, 2008 иетнестэ кочказель народной депутатонь Волгоградонь ошонь Советэнь депутатокс.
Ней В. Н. Кияев топавты Волгоград ошсо электромеханической заводонь («ВЭМЗ» ОАО-нь) директоронь Советэнь прявтонь тевтнень.
В. Н. Кияев васенцетнень ютксо, кинь ушодксост коряс Волгоград ошсо теезель эрзянь-мокшонь раськень вейсэндявкс, косо седе ламо тевтнень топавты сонсь. Аволь весть кочказель эрзянь-мокшонь раськень инекужонь делегатокс.
Казне – чачома велензэ туртов
Кочкурбуень Сурвелень (Сабаевань) эрицятнень туртов покш казне таго тейсь Василий Никифорович Кияев. Неть читнестэ велев совамо таркатнесэ кавто ёндо (Саранскоенть ды Морд. Давыдованть ёндо) стявтозельть 7 метрань сэрьсэ ды 4 метрань эчкесэ кавто крёстт. Сынь валозь кшнисэ (пси цинксэ), сёрмадовкстнэ – пижесэ (руз. – медь). Лангозост сёрмадозь кавто валт: «Спаси и сохрани». Крёсттнэ кшнисэ валозельть Волгоградонь судостроительной заводсо, сёрмадовкстнэ ды лия пелькстнэ – Волгоградонь электромеханической заводсо («ВЭМЗ» ОАО-со), косо В. Н. Кияев топавты директоронь Советэнь прявтонь тевтнень. Аволь умок (таштамковонь 30-це чистэ) кавто крёсттнэ, конатнень сталмост 1,5 тоннат, ускозельть Сабаевав. Сынст стявтомо сакшность Кочкуровань администрациясто ломанть, Кочкуровань ды Сабаевань церьковасто Геннадий ды Владимир настоятельтне, велень эрицят. Ютксост ульнесь казнень азороськак. Сонзэ сеть читнестэ тердекшнизь Саранскоев Мордовия Республикань Прявтокс А. А. Здуновонь аравтома промксос. Казнень азорось, кода уш меринек, Василий Никифорович Кияев, кинь миньгак, «Эрзянь правдасо» важодицятне, ловтано эсенек пек паро ялгакс. Эрьва иестэ сонзэ ярмак лангс сёрмадстнетяно минек газета Сурвелесэ эриця зярыя ломанень лемс.
Сурвелесэ сонзэ седе пек содасызь, кода Микей Васянь. Сабаевась – веле, косо чачсь ды косо ютась Василий Никифоровичень эйкакшпингезэ. Виде, Сурвелесэ сонензэ савсь эрямс аволь кувать. Кевейкее иесэ кадовсь урозокс. Покш патязо саизе эрямо эстензэ. Истя цёрынесь понгсь Украинав, кармась эрямо Кривой Рог ошсо. Тосо тонавтнесь школасо-интернатсо. Мейле Криворожской горно-экономической техникумонть прядомадо мейле кучизь Волгоград ошов сталень уськень-канатонь заводов.
Волгоградсо сон теевсь покш ды содавикс ломанекс. В. Н. Кияевень тосо содасызь аволь ансяк кода «Югканат» ООО-нь прявтонть, содасызь кода Волгоград ошонь Советэнь депутатонть, ков сонзэ кочксизь аволь вестькак.
Курок В. Н. Кияев теевсь содавиксэкс Мордовиясояк. Васняяк, кода Волгоград ошсо эрзянь-мокшонь вейсэндявксонь теиця, конань васенце бажамозо – пурнамс вейс эрзянь-мокшонь раськень весе ломантнень, кить эрить Волгоградсо ды Волгоградонь ёнкссо. Омбоцекс, кода меценат, кинь ушодксонзо коряс Саранскойсэ панжозель «Югканат» предприятиянь представительства, косо мусть эстест тев зярыя ломанть.
Но весемеде покш лезкс В. Н. Кияев канды эсензэ чачома велентень. Те сонзэ ярмак лангс Сурвелесэ витнезель-одкстомтозель Ине Отечественной войнасо маштовозтненень кеврунгось, панжозь стела. Ламосо сонзэ ушодксонзо коряс ды лездамонзо пингстэ одс вельмевтезель Троицясто седикеле ладсо ютавтневиця коеськак, кона ней тешкстави эрьва иестэ малав комсь иень перть.
Те аволь весе. Зярыя иеде теде икеле Сурвелев якиця автобусонь лоткамо таркатнесэ теезельть лато ало озамо таркат. Велень эрицятне, кинень ней автобусонь учомсто ули ков озамс ды а савкшны начколемс пиземе ало, нейгак ёвтыть тензэ певтеме сюкпрят.
Покш лезкс В. Н. Кияев максни ознома кудонтень. Тынсь арседе, неть кавто крёсттнэнь теемаст, ускомаст ды стявтомаст кис ютавтозельть аволь вейке сядо тёжат целковойть.
Вейке таркасо аштезь, тевесь а сыргавтови
Весе теде ловнозь, кой-кить, паряк, мерить истяяк: Кияев – сюпав ломань, паряк, ярмаконзо а ков тейнемс, секс «ёртни» эйсэст эрьва кува. Те аволь истя. Кияевнень ули ков ютавтомс эсь ярмактнень. Козяйканзо Светлана Михайловна марто кастсть кавто эйкакшт. Сынст ней эсест семияст, эсест эйкакшост. Теде башка, Василий Никифорович а стувтни эсензэ раськень малавикс ломантнеде. Ламот эйстэст сыредсть, шумбрачисткак лавшомсь. Сеть ломантнень туртов васенце кемемаст Василий Никифоровичень лангс.
Лия ёндо варштазь, Сурвелестэ лиссть пек ламо ломанть, кить теевсть ки соды кодамо сюпавокс. Ансяк сынь а неявить. Вейкеськак эйстэст эзь венстя лезксэнь кедь. Натой нейгак кияк а невтни прянзо, а нолды вайгельнеяк. Куш весе неить, кодамо аволь шожда эрямо печтить тосонь эрицятне. Пекстневсть весе таркатне, косо тосонь эрицятне мукшность эстест важодема. Ламот аштить тевтеме, каизь пряст винас. Од ломантне тукшность лия таркава эрямо. Сурвелесь, кода ламо лиятнеяк, кирясь аволь кавтонь ды колмонь, пек седе ламонь кирда. Тынсь арседе, икеле (ютазь пингень 70-це иетнестэ) школав васенце классос сыргицятнеде лововсть 120-140 эйкакшт. Ней зняро тонавтницят а пурнавить весе класстнэнь ловозь. Сеть эйкакштнеяк сакшныть лия велестэ: Давыдвелестэ, Кацялайстэ, Тат-Умысстэ, Мураньстэ, Зорькасто ды лия таркасто. Мезе учи веленть кемень ды комсь иень ютазь? Апак кевкстеяк чарькодьсак.
Ансяк весе те, маряви, киньгак а мелявтовты. Ськамонзо Василий Никифорович бажи таго-мезе теемс веленть туртов, максомс тензэ од эрямо. Умок уш пря потсонзо кирди мельть-арсемат панжомс Сурвелесэ кодамояк производства: улезэ косо важодемс тосонь эрицятненень. Ансяк те тевенть сыргавтомась седеяк стака. Ськамот мезеяк а теят. Седе шожда улевель тензэ, муиндеряволь чарькодема ды лезксэнь марямо сетнень пельде, кинь эйстэ ашти веленть уцясказо. Сон кеми, зярдо а зярдо те карми улеме. Зярс жо ков сатыть виензэ лезды велентень а максомс пря неень шкань стакачитненень. Тень туртов, Кияевень валонзо коряс, а эряви аштемс вейке таркасо, эряви свал лакамс тевсэ ды весемесэ бажамс топавтомс икелеть аравтозь бажамотнень.
Эсензэ Василий Никифоровичень бажамонзо сатыть аволь вейке кемень иес. Маринек, Сурвелесэ арси теемс вишка эйкакштнень туртов налксема тарка, озавтомс садпире, ацамс китнень (кой-кува уш лездась тень теемс), стявтомс ледстнемань тешкс се таркантень, косо ульнесь гидростанция, ванськавтомс Москамор ды Сэняш лейтнень, конатнень чирева касыця чувтотне допрок копачизь сынст ведест. Весемеде покш бажамозо – теемс Сурвеленть истямо таркакс, ков сакшновольть ламо туристт. Тесэ ули, мезе невтемс. Сурвеленть эрямопингезэ ушодовсь 700 иеде икеле. Те шканть перть тесэнь эрицятне таштасть эрямонь-аштемань эсест койть. Эйстэст ламотне ней, чарькодеви, стувтовсть. Ансяк ледстнемапелекс кадовсть сыре ломантнень пельде марязь ёвтнематне, кода седикеле яксесть озномо репештяв, Троицясто пурнавкшность Пичалов. Неть таркатнень од ломантне ней а содасызь. Паро улевель бу сынст одов муемс-ванськавтомс ды таго вельмевтемс седикелень койтнень-кирдатнень.
Весе минь сынек эйкакшпингестэ
Мезень кис весе тень Кияев теи? Нама, аволь прянть вадрякс невтемга ды лемень кепедемга. Тенстемеяк сонзэ лемензэ, кода уш ёвтынек, содасызь эрьва косо. Тень тееме кармавты седейсэнзэ палыця вечкемась. Эсь масторонтень, ломантненень, чачома велентень.
Кодамо валдо ды виев те вечкемась, кортыть артовкстнэяк (картинатне), конатнень Василий Никифоровичень энялдоманзо коряс теизь Россиясо пек содавикс художниктне А. А. Михайлов ды М. М. Нейфельд. Колмо картинатне, конатне артозельть Кияевень ледстнематнень коряс, те – эйкакшпингестэнзэ саезь пелькс, зярдо сон ульнесь эрямонтень
кенярдыця эйкакшокс: вакссонзольть авазо, тетязо, покштязо. Аламо шкань ютазь сынь туить эрямосто, Вася кадови урозокс. А стяко се шканть Василий Никифорович лови сехте валдокс ды уцяскавокс, ды сонзэ а стувтомга теевтсь колмо артовкст.
Васенценть алтызе Елена Михайловна аванстэнь. Сонзэ ванкшнозь, а кирдеват сельведтнеде. Вишка эйкакшке ашти больницянь орта икеле, каршонзо капшазь чии ава. Эйкакшось – сонсь Василий Никифорович. Сон те шкас эзизе стувто, кода сыргась аванзо вешнеме, зярдо тензэ ульнесть ансяк нилешка-ветешка иеть. Авазо сазорканзо марто аштесть Сабаевань больницясо (ней те больницясь арась). Васянь мелезэ молекшнесь кисэнзэ. Сон киненьгак апак ёвта салава оршнесь ды сыргась аванзо вешнеме. Молемс эрявсь аволь аламо. Больницясь кудост эйстэ аштесь сисем вайгельбень тарка. Шкась – тундо малав. Ловось таркань-таркань соламо лангсоль. Молемстэ цёрыненть пильгензэ начксть тюрякс. Кода пачкодсь, сонськак те шкас дивамос пракшны. Совамс больницяв пельсь: укол тензэ теить. Начко пильге марто зярсыя аштесь больницянь ортатнень икеле. Паро, вальмава неизь тосонь медсазортнэ. Ёвтасть аванстэнь. Тона лиссь каршонзо ды, «Вася, те тон? Сак тей!» сеерезь, сась малазонзо.
Больницясо цёрыненть кайсевтизь, мадстизь тарка лангс, сон истя сизесь, сеске матедевсь ды удось цела чи.
Омбоце артовксонть лангсо – таго сонсь. Ашти крандазсо озадо. Вишкинестэ Вася вечкиль яксеме тетянзо марто, кона крандазс кильдезь алашасо усксесь паксясо важодиця механизатортнэнень эрьва мезть: ведь, трактортнэнь-комбайнатнень туртов уштомапель.
Колмоцесь алтазь аванзо ёндо покштянстэнь. Велесэ тензэ мерсть Аньчатя. Василий Никифоровичень мельс-превс сон кадовсь, кода шержей пря ды кувака сакало атя, кона кирдсь нешке пире, ков лездамо сеедьстэ яксесь Вася цёрынеськак.
Мезенть кис эряви шнамс артыцятнень: весе кудотнень, таркатнень сынь невтизь истя, теке сынь саезь фото лангсто.
«Лиякс мон а маштан»
Те тагояк аволь весе, мезе арси теемс чачома велензэ туртов В. Н. Кияев. Сонзэ покш мелезэ нолдамс книга, конань алтамс ютазь войнасо маштовозтненень. Тень теемс аволь шожда. Ятонть каршо тюреме Сабаевасто тукшность малав 2 тёжат од цёрат ды тейтерть. Юткстост 500 ламотне эзть велявто кудов. Эрявить вешнемс, косо сынь тюрсть, косо маштовсть, мейсэ казезь. Зярс тевесь, кадык састо, ветяви ды, кода кемевти Василий Никифорович Кияев, сон топавтови педе-пев. «Лиякс мон а маштан», – мартонзо кортамсто мерсь Василий Никифорович. Ды сон а кенгели.
Раиса Щанкина,
Россиянь Журналистэнь
вейсэндявксос совиця.