Российской Федерациянь внутренней тевень органтнэсэ важодицятненень алтазь кенярксчиденть икеле иневанькс воинэнть Феодор Ушаков лемсэ Кафедральной соборсонть ютавтовсь панихида служебной долгост топавтомсто полициянь маштовозь сотрудниктнень валдо лемест ледстнемга.
Саранской ды Мордовской епархиянь митрополитэнть Зиновиень баславамонзо коряс Пазнэнь озноманть ютавтызе епархиянь секретаресь ды соборонь ключаресь протоиереесь Виктор Хохлов.
Панихидасонть ульнесть МР-ва Россиянь МВД-нь министерствань Личной составонь коряс важодемань управлениянь прявтось, полициянь полковникесь Игорь Зубаров ды те ведомствань лия важодицят. Сонзэ прядовомадо мейле Зиновий митрополитэнть пшкадеманзо ловнызе Виктор протоиереесь.
Внутренней тевень органтнэсэ неень шкане важодиця сотрудниктненень пачтямонзо ёвтамсто, сон тешкстась:
– Тынк эйстэ ашти граждантнэнь эрямонь сэтьмечись, эйкакштнень, минек вандынь чинть ванстомась, экономикань виевгавтомась, культуранть эрямос совавтомась. Тынк служениясь – стака ды аволь сэтьме, сон веши весе виенк максоманть, сон варчни нардевчист аволь ансяк внутренней тевень органтнэсэ важодиця сотрудниктнень, истя жо сынст семиятнень. Преступностенть каршо эрьва кодамо ёнксонь коряс бороцямось – те кежейчинть изнямось. Минь, православной христиантнэ, кемтяно, Пазось а кадсынзе сынст седеймарямосонзо, кить маштовсть боевой постост кандомсто, кить течи топавтыть тевест.
Меельцекс протоиереесь Виктор Хохлов тешкстась, противоэпидемиологиянь вешематнень мельс саезь, панихидась ютавтовсь храмсо аволь ламо озныцятнень пурназь.
– Тень лангс апак вано, минь кемтяно, Пазось максы эсензэ певтеме седеймарямонзо воинтнэнень сынст паро тевест кисэ, – мерсь отец Виктор.
Валентина Юдина