Крештениясто храмтнесэ службатне пек молить Роштовансетнень ёнов. Пазнэнь кемицятне икеле чистэнть истя жо кирдить казямо пост веденть светямонь ушодовомань шканть самс. Текенень, эряви меремс, поладови кенярксчинь литургиясь.
Церьковань койтнень-кирдатнень ютксо топавтовить истят тевть, кода леентень крёст марто ютамось, веденть светямось. Те коенть ушодызь палестинань христиантнэ, кить те кенярксчистэнть ютасть Иордан леентень лемдевеме.
Кода лия христианской покш читнестэяк, служави кенярксчинь литургия, косо весе духовенствась орши ашо оршамопельть (ризат). Те чистэнть прявт тевекс свал эрси ведень светямось, конась ютавтови службанть прядовомадо мейле.
Раськетнень койтнень-кирдатнень коряс Крештенияс од тейтертне прядылизь орожиямост. Писаниянть коряс жо тунь а мереви орожиямс ды колдовамс, ансяк историясто фактонть ковгак а ёртсак.
Крештениянь сочельникстэ васня светявить храмонь купельтне, январень 19-це чистэ – лейтне ды эрькетне. Кезэрень шкасто саезь церьковасо службадонть мейле ломантне крёст марто ютыльть анксематнес ды озномадо мейле васня саильть тосто ведь, мейле чопавтильть эйзэнзэ пежетьксэст нолдамга.
СОЧЕЛЬНИКЕНЬ ЯРСАМОПЕЛЬДЕНТЬ
Крештениянь кенярксчистэнть Пазнэнь кемицятне пост а кирдить, ансяк икеле чистэнть, Крештениянь сочельникстэ, а стувтома казямо постось. Те шкастонть мереви ярсамс постной ярсамопельде, конатнень ютксо пидезь товзюрось ды медь марто костязь фруктатне. Истя жо пидить-панить постной прякат, конатнеде ярсыть костязь фруктасто теезь компот марто.
ИНЕВАНЬКС ВЕДТЕНТЬ
Те кенярксчистэнть ведентень явить башка мель. Ломантне кемить светязь ведентень, бажить сонзэ вельде лецямс ормаст, ванськавтомс кудост-кардост. Священнослужительтнень валост коряс, ведесь кенярксчистэнть саи покш тарка. Теке шкасто сон светяви куш кодамо таркасо. Содазь, Крештениянь ведесь ванстови иень перть ды а коли, ансяк сонзэ каяма суликань кедьгес. Светязь ведесь, конась кандови храмсто или саеви анксемасто экшелямодо икеле, старецтнэнь пачтямост коряс, тееви истямо ведекс, кона чудсь Иордан лейганть се шкастонть, зярдо тосо лемдевсь Христос. Кода пачтяви Писаниясонть, тосо лекси Иневанькс (Святой) Духось, секс ули истямо ёвтамо: Крештениясто ведесь эрьва косо иневанькс, косо озныть Пазонтень, ды аволь ансяк се таркасонть, косо священнослужителесь ютавтсь служба. Сонсь ведень светямось – те церьковань покш чи, конась корты ломантненень масторлангсо Пазонть улемадонзо. Иорданокс лемдить се анксеманть, кона керязь крёстокс ды конань Крештениясто светизь священнослужительтне.
Кезэрень шкасто саезь ули истямо кой, бути сеске светямодонзо мейле экшелямс анксемасонть, нолдавить весе пежетькстнэ. Писаниясь минек тонавты, пежетьксэнек шлявить крёст лангсо Христосонь верьсэ, кемицятнень жо оймест идевить ансяк чумочидест пачтямонть вельде, секс эев кельме ведьсэ экшелямось – раськень кой-кирда. Виде, те аволь пежетькс, эйсэнзэ духовной лув арась. Тень лангс апак вано, бути тынь арсиде экшелямо, эряви теемс тень Пазнэнь кемезь ды апак стувто седе, кодамо ведьс соватадо. Сон светямодонзо мейле тееви иневаньксэкс.
КЕНЯРКСЧИНТЕНЬ АНОКСТАМОДО
Умонь шкасто саезь Крештениянтень анокстасть весе вийтнень путозь. Васняяк тенсилизь-шлилизь киякстнэнь, ванськавтылизь весе кудонть. Ломантнень ютксо ульнесь истямо кортамо: аволь ванькс вийтне кекшнить рудазтнэс.
Тейтерь-аватне саильть ладан, нолдыльть вельдензэ качамо ды ютылизь аволь ансяк кудопотмонть, истя жо кардазонть, утомтнень. Весе таркатнева порсо рисовильть крёсткеть: вальматнень, кенкштнень, каштомонть, ортатнень, кардазонть велькссэ. Лововсь, истя кудазоронть ули-парозо ванстови идемевстенть.
Сочельникень чокшнестэ, зярдо менельсэнть кирвазиль васенце тештесь, ломантне озномадо мейле озыльть кенярксчинь столь экшс, косо путозель ансяк постной ярсамопель.
КРЕШТЕНИЯНЬ ТЕШКСТНЭДЕ
Крештениянь кенярксчистэнть, кода Роштованть вастомстояк, кезэрень койтнень-кирдатнень коряс лововсь истя, бути раськень весе поколениятне те чистэнть пурнавить вейс, сестэ те покш семиясь иень перть ванстови, ды мезесь сехте пек кенярдовты, эрясы шумбрачисэ.
Крештениянь тешкстнэнь коряс ломантне бажасть содамс, кодамо карми пертьпельксэсь, сынст эрямо лувост ды уцяскаст!
Улить истят тешкст:
Крештениянь вестэнть тештев менелесь – тундось сы курок, а кизэсь ды сёксесь кармить лембеть ды пиземевть. Бути Крештениясь сави пешксе ковс, сестэ тундось ушодови виев чадыведьстэ ды лейтнень, эрькетнень чирестэ лисемасто.
Крештениясто вармавтомо маней чись ды валдо, ванькс менелесь кортыть сэтьме, паро иеде. Те тешксэсь невти сень лангс, кодамо тев аволиде ушодо: од кудонь путомо, семиянь пурнамо, од важодемас кундамо, весе арсезесь парсте топавтови ды канды лезэ.
Ламо ловонь прамось корты седе: сы Крештенияс кодаткак апаро ормат, эпидемият а кармить, иесь юты шумбрасто.
Виев пиземесь ды даволось невти кода экономикасо, истя политикасо аволь сэтьме шканть лангс.
Крештениянь вестэнть столь лангс путыльть ведь марто сиянь кече. Пелеветь, зярдо ведесь карми лымбакстнеме, эряви сеске арсемс мель ды куроксто верьга вайгельть сонзэ ёвтамс, сестэ топавтови.
Од тейтертне те чистэнть пурнавкшность ванькс паксяс, саильть тосто лов ды эй, конасонть ёзылизь чамаст, штобу сон улевель ашо ды мазый.
Анокстызе Надежда Кеняйкина