Воскресенье, июля 21, 2024
Важное

 

Мирдть-нить Пётр Семёнович ды Татьяна Николаевна Прокинтнэ эрямост алтызь тонавтыцянь тевентень. Сынь нейгак важодить. Июлень 9-це чистэ топодсть 55 иеть, кода Прокинтнэ налксесть свадьба ды эрить вейсэ. Кода весемесь ушодовсь? Теде ловнодо минек материалстонок.



Пётр Семёнович чачсь 1946 иестэ сестэнь Козловской райононь (ней Отяжбуе) Вере Чукало (руз. Чукалы-на-Нуе) велесэ. Тетязо, Семён Алексеевич, эсь шкастонзо прядызе Козловкань педагогической училищанть, роботась эсест велесэ начальной школань прявтокс. 1939 иень ноябрясто саизь служамо армияв – погранвойскатнес. Ковонь ютазь чачсь Елизавета васенце тейтернезэ. Кавто иень ютазь ушодовсь Ине Отечественной войнась, сон тусь фронтов. 1941 иестэ Донецк ало пек стакасто ранязель, рунгозо весе порксазель. Аштесь ёжовтомо, ансяк врачтне идизь. Сон ульнесь Туркмениянь Ашхабадонь покш госпитальсэ, косо лецявсть тёжат минек солдатт. Семён Алексеевич кучсь велев сёрма, ёвтась, косо ашти, энялдсь саемензэ тосто. Лиякс – кучсызь инвалидэнь кудос. Керш кедезэ порксазель, вить кедьсэнзэ кадовсть ниле сурт, прясонзо кадовсть ламо осколкат, сон теевсь васенце группань инвалидэкс. Тень лангс апак вано, од цёранть покш мелезэль эрямс, улемс малавиксэнзэ вакссо. Нина Михайловна низэ бойкаль. Сон, военкоматонь трокс кевкстнезь-искувазь, сыргась мирдензэ мельга. Комсь чить ардсь Туркменияв. Муизе. «Нина, те мон!» – пшкадсь тензэ мирдезэ. Нина аволь сеске содызе. Армияв туемадо икеле сталмозоль малав 90 кг, ней жо кадовсть ансяк 50 кг. Кодат ансяк ранявозть тосо арасельть, Нина кувать ледстнесь госпиталенть. Поездсэ макссть тенст тарка, саизе мирдензэ велев. Отяжелестэ лишмесэ пачтизе кудов. Мейле пингензэ пес якась мельганзо ды зярдояк теде эзь янксе! Вана кодашка ульнесь аванть виезэ! Семён Алексеевич эрясь 76 иеть ды кулось 1993 иестэ. Нина Михайловна эрясь 86 иеть.

Прокинтнэ чачтсть-кастсть колмо эйкакшт. Петрадо мейле, 1949 иестэ, чачсь эштё вейке цёраст – Алексей. Сон прядызе пединститутонть ды кадовсь эрямо тиринь ёнкссо, тетянзо-аванзо вакссо седе малас. 35 иеть роботась Отяжбуень Низовкань школань прявтокс, низэяк тонавтыцяль. Эряви меремс, семиясост пек ламо педагогт. Патянь-лелянь сазортнэяк важодсть учителекс.


Прокинтнэнь весе эйкакш пингест ютась важодезь, тетянень-аванень лездазь, кудоютконь тевсэ. Трясть скал, реветь, дигат. 1952 иестэ Пётр Семёнович мольсь школав. Васня тонавтнесь Вере Чукалосо, мейле – Низовкасо, прядызе Ламбаськесэ. Уш школасо тонавтнемстэ саезь кармась явомо покш мель спортонтень – шожда атлетикантень.
1962 иестэ Пётр Семёнович сась Саранскоев. Ламповой заводонть пельде прядызе технической училищанть. Бажась тосо важодемс. Тетязо секе-тев тензэ кортась молемс тонавтнеме педагогокс. Пётр вастызе ялганзо, кортазевсть тонавтнемадо. Сонгак мерсь молемс вузов. Мельде-валдо, мездеяк апак арсе, кандынзе документэнзэ М. Е. Евсевьев лемсэ МГПИ-нь химиянь ды биологиянь факультетэв. Сеске нилес ды ветес максынзе экзаментнэнь. Истя кармась тонавтнеме вузсо. Тесэ сон седеяк покш мель кармась явомо спортонтень. Е. И. Маскинсков тренерэсь саизе Мордовиянь сборной командантень. Ардтнесть сынь Весесоюзонь эрьва кодамо пелькстамотнес. Пётр Семёнович анокстась Олимпийской налксематнес Мехикосо. Ансяк пек экшендсь ды ормалгадсь. Савсь мадемс больницяс. Шкань ютазь шумбрачись витевсь.

Самай студентэкс улемстэ сон теевсь содавиксэкс вечкевиксэнзэ марто. Татьяна сась тонавтнеме Ельникинь райононь Сыре Пичингуши велестэ. Вете иеть вейсэ тонавтнесть ды ульнесть паро ялгакс. Вузонь прядомадо мейле макссть тенст важодеме направленият аволь вейке таркас. Мезе теемс, кода явовомс? Сынь арсизь сюлмамс эрямост вейс. А менстямс уцясканть.

Пётр Семёнович сась велев дипломонзо марто. Авазо пек кецязевсь: «Те паро, паро. Ансяк зярдо кармат урьвакстомо?». Цёрась каршонзо мерсь, куш ванды анок урьвакстомс. Свадьбань чись карми июлень 9-це чистэ. Кармасть анокстамо свадьбантень. Рамасть костюм, ашо панар, галстук. Чемоданс путсть перцовкань комсь суликат, аватненень рамасть мазый полушалкат. Ельникинь районов сыргасть сонсь содамось, сазорозо ды сонзэ мирдезэ. Китне сестэ арасельть, кува ардозь, кува ялго савсь молемс. Пётр Семёнович вестькак арасель мокшонь велесэнть. Сон, нама, талнось. Кудосонть мельспаросо вастызь одирьванть авазо ды сырькаезэ. Шкань ютазь калонь кундамсто сась кудазорось, Мокша леесь ашти пек маласо кудост эйстэ. Пидесть штюрьба. Николай Артемьевич – фронтовик. Сон ульнесь танкистэкс ды пачкодсь Берлинэнть видьс. Казезь ламо покш наградасо. Кемзисемге иеть роботась колхозонь председателекс.
Чокшне ёнов пурнавсть инжетнеяк. «Цебярь-цебярь!» – марявсть эрьва ёндо валтнэ. Эрзякс те – «паро». Омбоце чистэ велень советсэ Петрань ды Танянь куроксто сёрмадстызь мирдекс ды никс. Одирьванть марто сыргасть Вере Чукалов. Пачкодсть пелеветь. Эйсэст уш учить. Таго пурнавсть малавикстнэ, свадьбась поладовсь цёранть кедьсэ.
Ледстни теде минек инжесь Пётр Семёнович ды пейди. Теке мерят, исяк те ульнесь, ютасть жо 55 иеть! Шкань апак сатстне сон якась Образованиянь министерствав, косо направленияст таркас макссть лия – вейке районов. Истя Прокинтнэ понгсть Покш Березникбуень Рузонь Найманов. Самай те велесэнть ушодовсь тонавтыцянь кист. Тесэ эрясть малав кемень иеть. 1971-1972 иестэнть П.С. Прокин служась армиясо Хабаровскойсэ зенитно-ракетной войскатнесэ, натой кадсть эйсэнзэ тоско, ансяк эзь лиядо, тиринь ёнксось седе лембе.
1970 иестэ Прокинтнэнь чачсь Олег васенце цёраст. Сон прядызе Н. П. Огарёв лемсэ МГУ-нь механикань ды энергетикань факультетэнть. Важоди Покш Березникбуень РЭС-нь прявтокс. Нина Ивановна низэ – Березникень основной школасо завуч. 1975 иестэ чачсь омбоце цёраст – Александр. Сонгак тонавтнесь Н.П. Огарёв лемсэ МГУ-нь аграрной факультетсэ, важоди ветеринарокс.

Рузонь Найман велестэ Прокинтнэ тусть эрямо Покш Березникев. Макссть тенст квартира. Пётр Семёнович важодсь эрьва кодамо таркасо. Сон ульнесь первичной партийной организациянь секретарекс, партиянь райкомонь пропагандань ды агитациянь отделэнь прявтокс, МР-нь образованиянь министрань полавтыцякс, завучокс, школань прявтокс – стявтсь Березниксэ школа. Кеветее иеть роботась райононь образованиянь управлениянь прявтокс. Панжсь районсонть эйкакшонь ды од ломанень спортонь школа, конань прявтсо ашти те шкас (Покш Березникень ДЮСШ). Истя жо сонзэ кочкизь райононь ветеранонь советэнь прявтокс. Свал ломань ютксо, ломань марто. Маряви, сон а соды сизема. Моли ансяк икелев. Теде башка, а кады спортонть. Ней уш Пётр Семёнович пельксты ветерантнэнь ютксо, чийни эрьва кодат дистанцият. Сон 38-ксть лиснесь ветерантнэнь ютксо шожда атлетикань коряс Россиянь чемпионокс. Тедеде пелькстась Московсо панжадо чемпионатсо, косо ульнесть 40 регионт. Изнясь кавто дистанциява – 1,5 ды 3 вайгельбеть. Нинзэ Татьяна Николаевна марто ардтнесть пенсионерэнь Спартакиадав. Тосо низэ уйсь 50 метрат бассейнасо. Сайсь 18-це тарка 70 таркатнень ютксто. Татьяна Николаевна, нама, вечкенезь ды мелявтозь сёвны мирдензэ марто спортонть коряс, жали эйсэнзэ. Ансяк спортось Прокинэнь туртов – весе эрямозо. Нейгак пурны молеме Московов, косо карми шожда атлетикань коряс ветерантнэнь ютксо Россиянь чемпионат. Бажи чиемс колмо дистанцият. Спонсоронзо арасть, весе эсь ярмаконзо лангс. Неть вастовоматне ды пелькстамотне максыть тензэ седеяк ламо вийть, седеень кеняркс. Эрьва чизэ ушодови зарядкасто. Седе тов туи чийнеме вирь чирева зярыя вайгельбеть, мейле чоп котьми пиресэ.
Татьяна Николаевна пингензэ перть важоди тонавтыцякс, нейгак вети химиянь ды биологиянь урокт. Сон – МР-нь заслуженной тонавтыця, РФ-нь общей образованиянь почётной роботник, тонавтыцятнень туртов Президентэнь грантонь изниця. Мирдензэ туртов алкуксонь неже. Цёраст семияст марто истя жо эрить Березниксэ. Прокинтнэнь кавто нуцькаст – Дарина важоди Пенсионной фондсо, Софья прядызе 11-це классонть.

– Пётр Семёнович, 55 иеть семиясо вейсэ эрязь, мезе ёвтавлиде од ломантнень туртов?

– Семиясо свал улезэ вечкема ды лембе. Вейке-вейкенень мелень явома, кемема. Бути кочкинк эстенк те ломаненть – эрядо вейсэ апак манче. Свал лездадо вейкенк-вейкенк туртов. Кунсолодо. Мирдесь – нинть, нись – мирденть. Монь истя тонавтымизь эйкакш пингестэ саезь. Нама, эряви свал важодемс, а нузялгалемс. Сестэ весе карми вадря.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».