«8-ое Марта» ООО-нь бухгалтериясо теевинек содавиксэкс эрзянь мазый аванть, те хозяйствань бухгалтерэнть Ольга Николаевна Дорофеева марто.
Ольга Дорофеевань (тейтерькс Фадеевань) чачома велезэ – Ташто Селища эрзянь велесь. Истя лиссь сонзэ эрямосо, тетязо-авазо, Николай Евстафьевич ды Любовь Васильевна, эзть эря кувака пинге… Васня, зярдо Ольганень ульнесть 6 иеть, сазоронзо Людмиланень сисем, апак учо эрямосто тусь тетяст Николай Евстафьевич. Кото иень ютазь тейтерькатнень кулось аваст, Любовь Васильевна. Покш седейризксэнть пингстэ сынь вановттомо эзть кадово. Малавикс леляст, аваст ялаксозо, Григорий Васильевич Темаев, кие эри Ташто Чамза велесэ, саинзе эстензэ. Седе тов, кода колхозось явсь тейтерькатненень эрямо тарка, мартост кармась эрямо аваст сазорозо, Надежда Васильевна.
Стакачитнень лангс апак вано, Ольга Николаевна васня тонавтнесь Саранскоень медицинской училищасо (ней сон лемдеви колледжекс) фельдшерэкс. Тонавтнеманзо прядомадо мейле велявтсь тиринь велев, косо сеске эзь муеве тензэ тев дипломонзо коряс, ды сон арсесь поладомс тонавтнеманзо. Омбоце специальностенть мельга, бухгалтерэкс тонавтнеме, сон мольсь Кемлянский совхозов-техникумов (ней лемдеви колледжекс), конань прядомадо мейле кармась важодеме «8-ое Марта» СХПК-со.
Виде, васень шкасто од специалистэнтень а шожда ульнесь кундамс од тевс. Васня сон ветясь кадрань тевтнень, мейле ушодсь бухгалтерэкс важодеме.
Ольга Николаевна те шкас ёвты сюкпрянь валт сеть ломантненень, кить тонавтсть эйсэнзэ важодеме. Неть: велень хозяйствань предприятиятнень главной экономистэсь Людмила Степановна Дорофеева, бухгалтертнэ Татьяна Николаевна Дорофеева ды Раиса Григорьевна Куманёва.
Эдь ламот юткстонок тонавтнемадо мейле кемить эсь вийтнес, арсить, маштыть эрьва мезень тееме. Алкуксонь тевс кундамсто жо чарькодить, кодамо покш питнест профессияс сынст тонавтыцятнень.
Ольга Николаевна мирденень лиссь эсест велень цёра экшс. Одтнэ теде икеле вастневсть малав вете иеть. Николай Дорофеев эсь шкастонзо тонавтнесь Н. П. Огарёв лемсэ Мордовской государственной университетэнь велень хозяйствань факультетсэ (ней – Аграрной институт) «Агрономия» специальностенть коряс. Николай Алексеевич истя жо важоди «8-ое Марта» ООО-со.
Николай ды Ольга Дорофеевтне трить-кастыть колмо тейтерть. Покшось, Анастасия, Н. П. Огарёв лемсэ МГУ-нть прядомадо мейле важоди бухгалтерэкс республикань войнань ды трудонь ветеранонь госпитальсэ. Лия кавто сазортнэнь – Алёнань ды Янань, истя жо ули высшей образованияст.
Алёна якстере диплом марто прядызе Н. П. Огарёв лемсэ МГУ-нь филологиянь факультетэнть, Яна – М. Е. Евсевьев лемсэ МГПУ-нть. Неень шкасто сон важоди Саранскойсэ специальностень коряс.
Текенень поладсынек, Дорофеевтне путсть эстест паро кудо, перьканзо озавтсть сад, кардазпотмост свал пешксе ракшадо. Ламо тевтнень лангс апак вано, кудазоравась телень кувака чокшнетнестэ вечки викшнеме-кодамо.
Течи республикасонок ламо кортави трудовой династиятнеде. Покш Игнатбуень Ташто Чамза велень Дорофеевтнень раськесь истя жо сови сынст юткс. Ольга Николаевнань атявтозо, Алексей Николаевич, кие ламо иень перть ульнесь те хозяйстванть прявтсо, те тевентень алтась 48 иеть. Сонзэ низэ, Раиса Григорьевна, истя жо ламо иеть важодсь МТФ-сэ лаборанткакс. Дорофеевтнень вейсэнь стажост – 118 иеть.
Валентина Юдина.