Пятница, марта 29, 2024
Важное

Россиянь МВД-нь кемгавксово иеде вишкинетнень марто важодемань службантень (ПДН) панжиковонь 31-це чистэ топодсть 85 иеть. ПДН-сь – лия ёнов а молиця служба. Сеть, кить тесэ важодить – эрьва тевсэ дока специалистт: полицейскойть, педагогт, ломанть, конат лездыть эрямонь стака тевтнес понгозь эйкакштненень.



Ламо иень перть службань шкастонть Рузаевкань райононь Россиянь ОМВД-нь ОПДН-нь старшей инспекторонтень Андрей Алексеевич Рузанкиннэнь савсь кирдемс аволь аламо теевть, конат сюлмавозь эйкакштнень а шожда эрямонть марто. Самай кирдемс, эдь мелявксов семиятнень, стака обуця марто эйкакштнень марто важодемась – те аволь ансяк служба, те эрямонь лув. Эдь кода явсак эсеть шкат важодеманть эйстэ, зярдо тевесь моли эйкакштнень уцяскадо. Сыненст куш кодамо шкасто эряви лезкс ды сон свал анок тенень.

Андрей Рузанкин эсь тевсэнть уш 24 иеть. Сон мелявты эрьва цёрыньканть ды эрьва тейтерьканть кисэ. Эрьванть марто бажи муемс кель-вал. ПДН-нь отделэнть важодемазо пек келей ды ответственной – тесэ школатнесэ правань коламотне, аватнень-тетятнень ды эсест эйкакштнень марто кортнематне, учётсо аштиця семиятнень марто важодемась. Андрей Алексеевич корты, свал сёвномс эйкакшонть эйсэ – а виде. Эряви лездамс тензэ школадо мейле эсь шканть ютавтомасо, штобу аволь уле шка ды мельть теемс берянь тевть. Прявтось – эйкакшонть улевель тевезэ, невтемга, спортось. Штобу урокто мейле тевтеме аволь яка ушова. Нама, аволь свал весемесь ладяви видестэ, ансяк кемгавксово иеде вишкинетнень марто важодицятнень прявт тевест – ванстомс эйкакштнень праваст.

КУДОНТЬ ДЫ ЭЙДЕНЬ
КУДОНТЬ ЮТКСО

Настя (лемесь полавтозь) аштесь эйкакшонь кудонь верандань латонть ало. Мольсь сэтьме пиземе. Сонзэ вачкоеманть пачк тейтерькась арсесь… Арсесь седе, зярдо кенкшень поровтонть лангс чалги авазо, сестэ сазоронзо ды ялаксонзо марто эйкакшонь кудосо эрямост прядови. Ансяк шкась ютась, а се, кинь истя учось Настенька, эзь гайневть, эзь са – эсь эйкакштнень эрямодо эзь сода.

Эйкакшонь кудос сынь понгсть иешкадо теде икеле. Авазо косояк эзь робота, тейтерьканзо ды цёрыньканзо кастомантень мель эзь яво, сеедьстэ кадылинзе сынст чаво кудос, васькавтсь эсь эрямонзо. Эйкакштне сеедьстэ мадильть вачо. Сестэяк, зярдо авась велявтыль эрямонтень, эйкакштнень мельга якамо эзь бажа. Мелявтыця шабратне шкань-шкань кандыльть тенст оршамот. Кофтатнень, палинетнень ды штанынетнень, конатнень макссть ломантне, авась зярдояк эзь муськене. Рудазов оршамотнень ёртылинзе шукш юткс.

Те семиясь кемгавксово иеде вишкинетнень марто важодемань отделсэнть учётсо ашти уш умок. Эйкакштнень зярыяксть сайнизь Рузаевкань «Солнышко» социально-реабилитационной центрав. Шкань ютазь велявтылизь авантень, кона алтась полавтовомс, ансяк весемесь ушодовиль одс. Ды кода эзть бажа подразделениянь ды опекань важодицятне ладямс те семиянть эрямонзо – эзь удала. Ней удалов ки арась. Аванть саизь праванзо, эйкакштнень – Ялгань эйкакшонь школав-кудов. Велявтомс эсь эйкакштнень аванть мелезэ овсе арась, сон тусь Мордовиясто лия регионов ды таго лиссь мирденень.
Сеедьстэ Андрей Алексеевич ледстни эштё вейке тевенть. Вишка Ванянь (лемесь полавтозь) историянзо. Сонзэ саизь симиця аванть кедьстэ ды, эряви меремс, истя идизь эрямонзо. Кавто чинь ютазь кудось, косо эрясь эйкакшось, палсь, иредьстэ авась толстонть эзь лисеве. Андрей Алексеевич нейгак шкань-шкань содавтни сонзэ эйкакшонь кудосо. Сон мелявты эрьвадонть, кода эсь эйкакштонть.

БАЖАСЬ УЛЕМС ВОЕННОЕКС

Андрей Рузанкин кассь тонавтыцянь семиясо, тетязо-авазо тонавтсть школасо география. Седе мейле тетязо кармась тонавтома учреждениянь прявтокс, мейле аравтовсь ошонь образованиянь управлениянь прявтокс, авазо роботась завучекс. Тетянзо-аванзо кияванть цёрась туемс эзь арсе, сонензэ мелень коряс ульнесть лия профессиятне. Сон бажась улемс покштянзо, Ине Отечественной войнань участникенть, кондямокс. Секскак школадо мейле Андрей арсизе молемс военной училищав. Весе экзаментнэнь максынзе «нилес» ды «ветес», а вана сочинениясь эзь сёрмадово ды тонавтнеме эзь понго. Се шкастонть саезь Н.Гоголень «Горе от ума» пьесанть, конась пекстызе училищав кинть, ловнызе зярыяксть. Эзь понго военнойс, мольсь тонавтнеме Рузаевкань машиностроениянь институтов, конань прядомадо мейле ютызе армиясо службанть. Армиясто велявтомадо мейле од ломаненть тердизь сестэнь милициянь районной отделс. Ды малав васень чистэ саезь роботась кемгавксово иеде седе вишкинетнень марто.

Сонзэ важодемань кизэ прась а шожда 90-це иетнень прядовомантень. Эйкакштне сеедьстэ сюлмавозельть преступной тев марто. Ансяк 2000-це иетнестэ Рузаевкань районсо эйкакштнень кедьсэ теезь 120 зыянонь тевть, учётс путозь 110 эйкакшт. Инспекторось Андрей Рузанкин ды лиятне роботасть истят эйкакштнень ды сынст аватнень-тетятнень марто, кинь-бути удалась велявтомс вадря эрямонтень, лиятне жо преступникень кинть эзизь кадо.

Шкась ютась, тевесь полавтовсь вадря ёнов. Внутренней тевень органтнэнь важодицятнень вийсэ эйкакштнень ютксо теевиця зыянов тевтнень ламочись киртявсь, течи истятнэде кармасть ков седе аламо. Ютазь иенть коряс районсонть кемекстазь 7 преступленият, конатнень теизь кемгавксово иеде седе вишкинетне, 40 эйкакшт путозь учётс. Ды прявт тевесь течи, седеяк вишкалгавтомс неть невтематнень.

ВЕЧКЕДЕ ЭЙКАКШТНЕНЬ

Кода а нолдамс шканть, кода кастомс вадря ломань? Истямо кевкстема седе сеедьстэ макснить ПДН-нь важодицятненень. «Эряви вечкемс эсь эйкакштнень, явомс мель сынст эрямонтень, содамс, мезе вечки эйкакшось, ладямс эсь ютксо эрямонь лувонть», – корты Андрей Рузанкин.

Те аволь чавонь валт. Те видечи, конань коряс сон эри. Андрей Алексеевичень а шожда уцясказо, сон ськамонзо три тейтерензэ. Эйкакшонтень ульнесть кемень иеть, зярдо эрямосто тусь авазо. Стакачитнень кирдезь, сон эзь правтово, мекевланг, пурнынзе виензэ ды тейсь весементь, штобу тейтерьказо касоволь вадря ломанекс.
Ней Андрей Рузанкинэнь тейтеренстэнь 21 ие. Сон – сы шкань юрист. Тейтересь покш каштанчисэ тетянзо коряс, конань весемес саты шказо.

Анокстызе Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».