Суббота, ноября 28, 2020
Важное


ВАСИЛИЙ МАКСИМОВИЧ КОЛОМАСОВ
(1909 – 1987)


В.М.Коломасов чачсь 1909 иень августонь 14-це чистэ Покш Березникень райононь Эрзянь Найман велесэ сокицянь-видицянь семиясо.

1933 иестэ тонавтнесь Мордовиянь совпартшколасо, мейле важодсь «Эрзянь коммуна» газетасо, «Сятко» журналсо литературной сотрудникекс, Покш Березникень райононь «Молния» колхозонь председателекс, мейле школасо тонавтыцякс. Заочна прядызе Мордовиянь учителень институтонть.

1941 иень декабрясто саезель армияв. Тосо ульнесь связистэкс. Тюрсь ятонть каршо Воронеж ало, Дононь стептнесэ, Северной Донец леенть лангсо, Донбассо, Запорожьясо. 1943 иестэ стакасто ранязель ды нолдызь кудов. Казезь Трудовой Якстере Знамянь, Отечественной войнань II степенень ордентнэсэ ды медальсэ.
1956 иестэ сась эрямо Саранскоев, роботась Мордовиянь книгань издательствасо. Меельце иетнень (1970-1987) эринзе Молния посёлкасо.

Василий Максимович сёрмадома тевенть ушодызе 1931 иестэ. Литературантень совась кода прозаик ды драматург. Сонзэ сёрмадомань юмористической ёнксось лангс лиссь уш васенце прозаической произведениятнесэ – «Прокопыч» ёвтнемасонть ды «Яхим Лавгинов» повестьсэнть, конатнестэ кассь писателенть сехте покш произведениязо – «Лавгинов» романось. Эйсэнзэ невтеви эрзянь велесэ коллективизациясь. Романось совась эрзянь-мокшонь литературань сырнень фондс. 1962 иестэ «Лавгинов» романонть коряс путозель спектакля ды невтезель телевизорсо. Романось нолдазь рузонь кельсэяк. Ютавтыцязо – Л.Елисеев сёрмадыцясь.
Василий Максимович Коломасов, «Лавгинов» романдонть башка, сёрмадсь ламо ёвтнемат ды пьесат. Истя жо сон содавикс кода лия кельстэ ютавтыця. Эрзянь кельс ютавтынзе Болгариянь сёрмадыцятнень произведенияст, Н.В.Гоголень «Ревизор» комедиянть, Г.Гейнень зярыя стихотворениянзо, М.Шолоховонь «Судьба человека» ёвтнеманть ды лият.

КУЗЬМА ГРИГОРЬЕВИЧ АБРАМОВ
(1914 – 2008)

Эрзянь прозаикесь, драматургось, Мордовиянь заслуженной ды народной писателесь, МАССР-нь Государственной премиянь лауреатось, Мордовия Республикань Почётной гражданинэсь Кузьма Григорьевич Абрамов чачсь Покш Березникень райононь Эрзянь Найман велесэ. 1941 иень июльстэ саезь Абрамов лейтенантось воёвась Западной фронтсо, ульнесь миномётонь взводонь, ротань, батареянь командирэкс. Вейке тюремасонть стакасто ранязель ды понгсь госпитальс. Ульнесь фашистэнь концлагерьсэ, фильтрационной лагерьсэ. Казезь Якстере Тештень, Отечественной войнань II степенень ордентнэсэ, «За победу над Германией в Великой Отечественной войне 1941-1945 гг.» медальсэ.
Кузьма Григорьевич вейке интервьюсонть мерсь: «…войнадонть видестэ сёрмады ансяк се, кона эйстэнзэ соды весе, кона кортнесь командованиянть марто ды содылинзе сынст арсемаст ды аравтлувост.

Мон, нама, бу сёрмадовлинь седе, мезе монсь неинь, ансяк истямо мелем арасель. Вейке мерян: войнань темась пек стака. Солдатонтень свал маряви, вере прявттнэ весе теить а истя. Сеедьстэ неть арсематне эрсесть видекс. Эрсесь, вейке сопканть кис зняро ломанть чавовильть…» Тень лангс апак вано, Ине Отечественной войнань иетнестэ Найман веленть эрямозо ды прявт геройтнень уцяскаст невтезь К.Г.Абрамовонь «Найман» трилогиянь «Качамонь пачк» колмоце книгасонть. Авторось ёвтни тылсэ важодицятнень эрямодо, невти передовойсэ боевой действиянь картинкат. Юты Найманонь ламо цёратнень стака фронтовой киваст. Тесэ сёрмадыцясь бажи пачтямс войнань кажонть истя, кодамокс сон кадовсь ломантнень превс ды седейс покш ёмавкстнэнь цидярдомаст ды изнямонь кенярксонть печтямсто.
Кузьма Григорьевичень улить войнадонть лия произведениянзояк: «Ледстнема» стихотворениязо, «Солдат ды ава» ёвтнемазо.

ЛЕВ ВАСИЛЬЕВИЧ САЙГУШЕВ

(1923 – 1945)

Лев Васильевич чачсь Покш Березникень райононь Ало велесэ 1923 иестэ. Эсь велесэ начальной школанть прядомадо мейле, тонавтнеманзо поладызе Шугуровань средней школасо, конань прядызе пек парсте. Уш кемзисемге иесэ кармась тонавтомо математика Парынзэлень школасо. Стихотвореният ушодсь сёрмадомо кемень иесэ. Сынь печатавсть «Сятко», «Пионерэнь вайгель» журналтнэсэ, «Ленинский путь», «Эрзянь коммуна» газетатнесэ ды лиясо.
Сонзэ стихотворениясо прявтокс ульнесь тиринь масторонь темась. Сон невтсь Отчизнанть виевчинзэ, тиринь ёнксонь мазычинть, эрзянь ломантнень од эрямонть. Те темась велувсо валовсь раськетнень ютксо ояксчинь теманть марто. Эсь творчествасонть сон тевс нолдась нармунень, чувтонь, лейтнень, пертьпельксэнь образтнэнь. Истя, килеесь – те мазычинь, виде рунгонь, соланячинь тешкс; тумось – виевчи, нардевчи; умаринась – аваксчинь, мазычинь тешкс. Сонзэ поэзиясонть ломанесь ды пертьпельксэсь а явовикс пелькст. Образтнэнь-тешкстнэнь вельде поэтэсь невти ломанень оймень мазычинть, сонзэ мельтнень-арсематнень ды ризнэматнень.

1941 иестэ Лев Сайгушев эсь олясо прянзо сёрмадстызе фронтов, ансяк эзизе юта комиссиянть – сельмензэ беряньстэ несть. 1943 иестэ тусь фронтов ды сеске понгсь передовойс. Казезель колмо орденсэ. Меельце казнесь Л.В.Сайгушевнень максозель куломадо мейле. Сон чавовсь 1945 иень мартонь 27-це чистэ Польшасо, Данциг ошонть кис тюрематнесэ. Поэтэнть малавиксэнзэ 1945 иестэ получасть истямо сёрма:

«Минек боевой ялганок ды командирэнек мельвановикс малавиксэнзэ! Стака теде сёрмадомс, ансяк тынк сёрматнень лангс, конатнень минь течи получинек, тынк цёранк ды ялаксонк Лев Сайгушев зярдояк уш а сёрмады каршо валт. 1945 иень мартонь 27-це чистэ сон чавовсь. Минась, кона сезевсь сонзэ вакссо, сезизе сонзэ эрямонзо. Весе минь пек мелявтынек кисэнзэ – пек вадряль командирэсь, ламо немецть чавсь, а стяко казизь колмо боевой орденсэ. Колмоце орденэсь сась, зярдо сон уш живстэ арасель. Мезеяк а теят – те война, ёмавкстомо сон а эри. Лёванень эзь саво совамс Берлинс, минь жо соватано тов ды пандсынек сонзэ куломанть кис – кемеде.
Мартонк печтятано седейризкс, тынк цёранк ялганзо В.Иванов, В.Рябчиков».

УЧАН ТУНДОНТЬ
Учан, зярдо
Виренть пельксстэ
Тундонь чись лиси.
Потмакстомо
Сэнь менельстэ
Сырнень цитни
Струятнесэ
Моданть эждясы.
Зярдо письмарт
Монь вальмалов
Килей пряс валгить.
Раужо грацтне
Пандонть алов,
Соки тракторонть
Удалов
Бороздас чалгить.
Пиже панарс
Штапо виресь
Рунгонзо кекшсы.
Жойнезеви
Умарь-пиресь.
Мазылгады
Леенть чиресь –
Тень эрьвась вечксы.
Монгак вечксынь
Леенть крайсэ
Кудряв лёмзёртнэнь.
Пиже виренть,
Косо гайсэ
Цёковт морыть
Морост эйсэ,
Ды росань керькстнэнь.
Паро тевсэ
Эйсэть вастан,
Мазы тундо, мон:
Садс письмарнэнь
Кудо стявтан
Ды тонавтнян
Отличнасто,
Сак куроксто тон!

ВАСИЛИЙ АНТОНОВИЧ АНОШКИН
(1901 – 1943)

В.А.Аношкин чачсь 1901 иестэ Покш Березник ёнксонь Шугурова велесэ покш ды нужачисэ эриця семиясо, эйкакштнеде ульнесть кавксо: вете цёрат ды колмо тейтерть. Вася ульнесь сехте веженсесь.
1912 иестэ, омбоце классонть прядомадо мейле, сон тусь Астраханев. Сиведизе прянзо матросокс баржа лангс. Роботась ульнесь пек стака. Савкшнось веньперть виев пиземе ало аштемс штурвалонть экшсэ ды усксемс кавксоньгемень саженень кувалмосо баржанть. Ламо стакачи савсь цядярдомс цёрантень. 1917 иестэ Василий Аношкин велявтсь кудов ды 1920 иенть самс важодсь кудоютксо.
1920 иестэ тусь служамо Якстере Армияв. Алатырьсэ прядызе полковой школанть, мейле служась Казаньсэ, тосто тусь воёвамо Врангелень каршо. Перекоп ало тюрематнесэ стакасто ранязель. Пичкамодо мейле кундсесь дезертирт ды бандитт Минской ды Каменец-Подольской губерниятнесэ.

1924 иестэ, Якстере Армиясто самодо мейле, кувать важодсь Политпросветсэ, мезенть кис 1939 иестэ РСФСР-нь Наркомпросось сёрмадызе сонзэ лемензэ Почётонь книгас, Мордовиянь Наркомпросось жо – Мордовиянь Почётонь книгас ды казизе Почётонь грамотасо. Войнадо икеле Василий Антонович роботась Шугурова тиринь велесэнзэ колхозонь председателекс. Войнань васень читнестэ сон тусь фронтов. Кулось 1943 иестэ стакасто ранявомадо мейле.
Сёрмадомо В.А.Аношкин ушодсь 1934 иестэ. «Волчок» васенце ёвтнемазо печатазель 1934 иестэ «Сятко» журналсо. Сонзэ произведениятнень прявт темась – Гражданской войнась, партизанонь движениясь. Сёрмадозь ламо событиятнень участникекс ульнесь сонсь, секс сонзэ произведениятне вечкевить неень шкань ловныцятнененьгак. В.Аношкин седе ламо сёрмадсь эрзянь кельсэ ды печатавсь «Сятко», «Пионерэнь вайгель» журналтнэсэ, «Эрзянь коммуна», «Сталинэнь киява» газетатнесэ. 1940 иестэ лиссь сонзэ «Ёвтнемат» сборникезэ.

Писателень союзонь промкссо (1938 ие), косо В.А.Аношкинэнь примасть Союзонь членэкс, сестэнь председателесь А.Я.Дорогойченко мерсь: «Аношкинэнь произведениянзо шождасто кадовить мельс. Монь мельс тусть «Валскень гудок», «Раужо крандаз» сонзэ ёвтнематне. Сынь невтить Аношкинэнь покш ёрокчинть».

Теде башка, Василий Антонович Аношкин ульнесь пек паро организатор, сон эсь велесэнзэ теекшнесь литературань кужо, косо тонавтнесть А.С.Пушкинэнь, Н.Островскоень, В.Гюгонь ды лия содавикс сёрмадыцятнень произведенияст. Кужонтень покш мельсэ якасть колхозсо важодицятне ды школасо тонавтницятне.
В.А.Аношкинэнь произведениянзо теевсть хрестоматийноекс, совавтозь школань учебниктнес.

Поладксозо моли
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».