Татьяна Составкинань минек ловныцятне парсте содасызь. Те ероков эрзянь тейтересь «Эрзянь правда» газетань пелькстамонь свалшкань изниця. Сон вадрясто сермады тиринь кельсэ стихть. Те тевсэнть тензэ лезды вечкевикс тонавтыцязо Л.А. Федотова. Неень шкане тейтерькась Отяжелень поселкань 1 № школань 9-це классонь тонавтниця. Стихень сермадомо ушодсь 6-це классо тонавтнемстэ. Седе сеедьстэ Таня сермады тиринь мастордо, чачома веледе, пертьпелькстэ, ракшадо. Тейтеренть сермадовксонзо домкат, смустевть, чарькодевицят, ловновить шождасто.
Юткошкасто, стихень сермадомадо башка, Таня налкси гитарасо ды домрасо, истя жо вечки морамо ды киштеме. Свал невтни эсь ерокчинзэ сцена лангсо. Невти прянзо райононь ды республикань шкинемань эрьва кодамо пелькстамосо, конатнесэ уш аволь весть лиснесь изницякс.
Татьяна арси поладомс сермадомань тевензэ седе товгак, эдь сон вечксы тиринь келензэ ды раськензэ.
Састо сован
тиринь кудос
Састо сован тиринь кудос,
Тосо учи монь авам.
Лембе пачалксеть тень венсти:
«Кода вечктян тонь, тякам!»
Салавинька сови нупальс,
Сон а стявты пелеветь.
Чоподава варшты вальмас,
Састо теи кудонь тевть.
Тон чивалдо, тиринь авай,
Тонь вечкемат – иневедь!
Тон лиятнень ютксо, авай,
Чевте седей, сырнень кедть!
Монь тиринь
кудынем
Монь тиринь кудынем,
Косоль эйкакш шкам!
Ледстяса, тиринем,
Вечкевикс школам.
Ледстяса, авинем
Чевте кшине пансь:
Мольсь товзюронь чине,
Ульнесь ламо тансть.
Содан, зярдо касан,
Васоло карман.
Ансяк свал содаса –
Тиринь кудов сан.
Лей чирень кудынесь
Велесэ учи,
Таго чевте кшине
Авам тень пани.
Сась Од ие
Сась Од ие, шкась уцяскань!
Сокскеть кардосто мон тарган.
Моли лов, капши якшамо,
Тарган кемть, карман оршамо.
Варштак, мазый домка леесь
Теевсь цитни сиянь эекс.
Ванькс ды домка сэнь менелесь,
А онкстави сэненть келесь!
Тонган варьгат, оршан понкскеть,
Саян мартон чувтонь сокскеть.
Пейдезь молян, перькан велян,
Леенть чирева эскелян.