Пятница, марта 29, 2024
Важное

И.А. Бояркинэнь шнамонь ды сялдомань шаржонзо

(Ушодксозо газетань 49-це номерсэнть).


Стихсэ сёрмадозь фельетонтнэнень малавиксэкс аштить шаржтне. Сынст алов автортнэ сеедьстэ лемест эзть путне. Тенстемеяк весе содасть, кие сынст сёрмали. Те – И.А. Бояркин. Сонзэ шаржтне явовсть кавто пельксэв: шнамонь (лиякс мерсть, ялгань) ды сялдомань. Васенцетнесэ авторось мазый валсо шнась ды невтсь сетнень паро ёнксост, кить эсест тевсэст кандыть лезэ масторонтень, паролгавтыть ды сюпалгавтыть весе эрямонть. Саемс Н.М. Суродеевнень алтазь шаржонть. Сон ушодови пачтямосто, кие истямось Суродеев, мезень кисэ арсить сонзэ шнамс. “Дубенской райононь Ленин лемсэ колхозсонть кавксоце ие роботы председателекс Н.М. Суродеев ялгась. Сонзэ руководстванзо коряс артелесь иестэ иес кемексты.

Виеть путат эрьва козонь,
Трудонь маякокс светят.
Ленинэнь лемсэ колхозонть
Славань киява ветят” (“Э.п., 1962 иень январень 1-це чи).
Газетань ловныцятне сельмест икельде аволизь менстя шаржтнень ды шнамонь валморынетнень, конат лиснесть «Ялгань шаржт» лементь ало. Сынь алтавсть истят ломантненень, кить парсте топавтсть тевест, ульнесть паро ды седеймариця ломанекс. Вана кода сёрмады И. Бояркин «Мордовстрой» трестэнь се шкань малярдонть Рая Тремаскинадо.
Тон кудо фасадонь кудрят
Мазылгавтат яла, пудрят.
Вечкат трудямс ламо, ламо,
Обуцят тонь уш истямо:
Эрямс весе марто вейсэ,
Вечкемс ломанть покш седейсэ.

Нейгак седеень апак тално а ловновить лембе валтнэ, конат алтазельть эрзянь содавикс морыцянтень Раиса Беспалованень. Ней минь, эрзятне, чуросто зярдо ледстнетяно те лементь, стувтынек сеньгак, кодамо сон ине морыцяль. Теде кортыть покш лемтнеяк. Раиса Макаровна Беспалова – Мордовской АССР-нь ды РСФСР-нь народной артистка. 1960-80 иетнестэ сондензэ сёрмалесть весе газетатне. Ды вана кодамо валсо казизе И. Бояркин «Эрзянь правдань» вейке номерсэнть:

Кода цёков тундонь садсо,
Луга лангсо маень цеця.
Эрямонтень эйкакш ладсо
Седейшкава моразь кецят.
Арсетяно Од иестэ
Седеяк верьга, гайтевстэ
Мирэнть кисэ
Мирэнть келес
Нолдамс Оймень
Гай вайгеленть!” (“Э.п., 1962 иень январень 1-це чи).

Эрьва валморыненть марто И. Бояркин эсензэ артовкстнэнь вельде невтсь сеть ломантнень чачост, кинь лемс ёвтазельть шнамонь валтнэ. Неть артовкстнэсэ нетяно, кодамоль се-тона ломанесь обуцянь коряс. Саемс Е. Пятаевнень алтазь ялгань шаржонть. Сеске сельметь икелев сти эрямонтень кенярдыця, паронь арсиця ломань, кона эсензэ оймень ёжомарямотнень чамдсь валморонзо вельде. А стяко И. Бояркингак сёрмадсь сондензэ истя:
Алянть сырнень кедензэ,
Прок шивеч сты стизензэ.
Сынь слава кандыть тензэ.
Но минь мертяно: аламо! –
Те секс, што машты «стамо».

Овсе лия валсо авторось “кери” сетнень, кить апаро тевсэст кольстить эсест уцяскасткак, лиятнень эрямосткак. Тень весемеде парсте невти стихсэ сёрмадозь шаржонь пурнавксось, кона печатазель “Эрзянь правда” газетань 1962 иень январень 1-це чистэ лисезь номерсэнть. Сонзэ лемезэ “Тенсесынек кинек лангсто”. Эйсэнзэ сисем шаржт ды эрьвась невти истямо ломанень образ, кить кода “маней чистэ раужо пельтне чополгавтыть пертьпельксэнть”, “пезназь сардокс аштить весень кирьгапарьсэ”. Эрямонь чополгавтыцякс авторось лови спекулянтнэнь, самогононь паницятнень, шабашкав якицятнень, нузякстнэнь, салыцятнень, кенгелицятнень, бюрократтнэнь. Эрьва образонть невтемстэ авторось мукшны истят валт, конатне седе а ков видестэ панжить сынст потмо ёжост, обуцянь башка ёнксост. Вана кода сон сёрмады бюрократто.
Понксарёв Иван Иваныч
Эрямонть конёвсто ваны.
Ки тев марто сови течи,–
“Сак ванды”, – сенень отвечи.
Неть валтнэ вечкевсть алянтень –
Истя эцесть сонзэ прянтень,
Што нинстэнь ёвтынзе ламоксть,
Зярдо тердсь тона ярцамо.
Стяко якить ломанть тензэ.
Тев а учови пельдензэ.
Мейс чумондомс Понксарёвонь,
Зярдо прясь сонзэ конёвонь?” (“Э.п.”, 1962 иень январень 1-це чи).
Пек казямосто Иван Бояркин сёрмады салыцятнедеяк.
Трудсо ливезь
Сон а валы,
Парочинек
Яла салы.
Мезекс жо
Те воронть пельде
Кирдемс коронть?
Сон прок чемениязь эске
Пезнавозь
Кадови теске. (“Э.п.”, 1962 иень январень 1-це чи).

Шаржось ды фельетонось лия жанрань произведениятнень эйстэ явовить сень эйсэяк: мезде ёвтневи эйсэст, чарькодьсак уш сонзэ лементь коряс. Автортнэ эсест фельетононть туртов кочкильть истямо лем, кона аволь ансяк панжовлизе произведениясо ёвтазенть смустензэ, теке шкасто сон сонсь уш улевель пшти налтонь кондямокс, конань вакска зярдояк а юты ловныцясь. “Кельмевтезь стройка” (В. Цыганов. “Э.п.”, 1963 иень июнень 2-це чи), “Тенсть комель” (Г. Агейкин. “Э.п.”, 1963 иень июнень 5-це чи), “Кулинань пацязо палы” (Г. Агейкин. “Э.п.”, 1963 иень мартонь 6-це чи), “Планось нувсезь а топавтови” (Д. Учаев. “Э.п.”, 1963 иень июнень 7-це чи), “Кендялонь пизэ” (Н. Алтаев. “Э.п.”, 1963 иень июнень 13-це чи), “Балаев кекшсь конёв экшс” (М. Сергеев. “Э.п.”, 1963 иень июнень 16-це чи), “Сапонь човсто пузырть” (Е. Зотов, М. Лёшин. “Э.п.”, 1961 иень декабрянь 22-це чи), “Совхозов сась ревизор” (Н. Симдянов. “Э.п.”, 1961 иень декабрянь 27-це чи), “Сторожкасо клуб” (А. Пятайкин. “Э.п.”, 1962 иень июнень 27-це чи), “Прят-серькат…” (П. Сурков. “Э.п.”, 1963 иень апрелень 26-це чи), “Вельксэнь вечкицят” (Т. Якушкин. “Э.п.”, 1963 иень маень 19-це чи), “Чопода сулейть” (Г. Агейкин, С. Храмов. “Э.п.”, 1961 иень сентябрянь 10-це чи) ды истя седе тов.

П.А. Ключагин, кода эрзянь кельсэ сёрмадыця
фельетонист

Се шкань фельетонтнэнь ютксо, конат лиснесть «Эрзянь правдасо», весемеде неявикс таркасо, койсэнек, аштить П. Ключагинэнь фельетононзо. Эсь произведениятнесэ сон лангс ливтсь сеть асатыкстнэнь, кодат ульнесть се шкасто велень эрямосонть, колхозонь производствасонть. Сон “каряз ланга” чавсь сеть ломантнень, кить эзть машто ладямо тевтнень, кинь чумост кувалма эзь паролгадо ды эзь сюпалгадо колхозонь эрямось, сялдсь ды кардась мельтемечинть, азортомочинть.

Весе неть асатыкстнэ парсте невтезь сонзэ истят фельетонтнэсэ, кода “Сталмозо 10 килограммат, питнезэ 10 целковойть…” (“Э.п.”, 1961 иень февралень 26-це чи), “Жарков ялганть онозо”, “Раужо ой”, “Пейтне седеяк чулксетить”, “Персональной алаша”, “Картежной турнир”, “Тувотне чумот”, “Эх, мушко, мушко” ды ламо лиятнесэ.

Сехте содавиксэкс ульнесь “Тувонь бунт” фельетонось (“Э.п.”, 1962 иень февралень 16-це чи). Эйсэнзэ авторось “лакси” сеть прявттнэнь, кинь мельтемечист кувалма хозяйствась кевери аловпандт. Истямо азорт ульнесть эрьва косо. Аволь аламольть сындест Ичалкань райононь вельхозартельтнесэяк. Ковгак а маштовиксстэ тевтне мольсть Ламбаське велень Энгельс лемсэ вельхозартельсэнть, косо прявтокс ульнесь Пётр Трофимович Дьяков. Сонзэ аволь ансяк а ловсак паро азорокс, сень кисэ, кода ветясь тевензэ, эряволь кода эряви кевкстемс кедьстэнзэ ды максомс лангозонзо судс. Те артельсэнть беряньстэ анокстасть телентень, эзть ташта сатышка кором, а мейсэль андомс тувотнень (“максыть тенст лавсо почодозь апак пиде модамарть ды весе”). Секс тувотне берякшкельть, седе ламотне кулсесть. Тень кувалма мелявтыцясь ульнесь ськамонзо фермань ванстыцясь Елфимов. Сонзэ седеезэ раздезь раздиль, зярдо пилезэнзэ каятыль тувонь цирнема. “Шабрань артельсэ оно кодат справнат тувотне, кенкшка а кельгить. Тесэ жо прок сеельть. Варштат лангозост, седееть, секень вант, лазови, истят тоштят”, – арси цёрась ды кода машты мурни колхозонь прявттнэнь, кить истя беряньстэ анокстасть телентень.

Вачодо аштиця тувотне эзть цидярдо, кепедсть “бунт”. Кармасть авторямо кенкштнес, бажасть лисеме оляс, кайсевеме вейке-вейке лангс. Весемеде пек понгсь вейке тувонтень. Сонзэ истя раздизь лия тувотне, сон натой киякс куншкас кунст прась, эзь лексеяк. “Сонзэ алце турвазо ульнесь сезезь, вить пилезэ порезель корёнс, щёка боказо ватказель шачк, керш сельмезэ таргазель, судо варяванзо чудсь тусто верь”.

Истямо зыянось а пек тандавтызе артелень прявтонть Дьяковонь. Зярдо неизе весе тень, сон апак янксе мерсь: “– Тарказо! Те аволь туво, кодамо-бути отшепенец. Бути согласиясо эряволь весень марто, то кияк аволизе тока. А сон жо, шайтян, благороднойкс прянзо ловсь, нерензэ верьга кантлесь”.

Лисезденть а пек апаргадсть колхозонь зоотехникесь Яушева ды СТФ-нь прявтось Ермолаев. Васенцесь, “кода специалист, васняяк кедь ёжосо варчизе тувонть пульсонзо, мейле ливчанясто бинтовизе прянзо, штюпизе-теизе рунгонзо ды тейсь заключения: – Ялгат, седеенк илядо сезне. Карми эрямо…”. Омбоцесь (Ермолаев), “кода цёра ломань, эзь талакадо, сеске кундась тевс. Лиякс меремс, сонзэ приказонзо коряс, ульнесть примазь оперативной мерат. Стакасто ранязь тувонть удалце пильгеде ускизь ушов, алонзо ацасть товзюронь свежа олгт”.
Вейке свинаркась арсесь аламодо визделгавтомс мезескак а маштовикс неть прявттнэнь. Келя, аволь тувотне чумот, минсь чумотано, пельсвачодо кирдтяно тувотнень. Колхозонь прявтось Дьяков тень каршо мусь, мезе меремс: “Зыянось лиясо… Минек артеленть пек уш берянь тувонь племазо. Неть идемевсь звертнень кода иля андо, ялатеке а пешкедить… Миненек эряви кундамс истямо породань тувонь трямо-раштамо, конат бу ярсавольть аламо, касовольть вазошка, сывелест улевель куяв ды тантей”.

Раиса Щанкина, Россиянь Журналистэнь союзс совиця.

(Поладксозо сы номерсэнть).
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».