«Герои среди СВОих» региононь кадрань проектэнть прядовомадонзо мейле ветерантнэ-финалисттнэ идизь эсь проектэст, ламот юткстост кармасть важодеме бажавикс таркасо ды ней лембестэ ледстнить тонавтнемань ковтнень.
СВО-нь ветеранось Дмитрий Демидов ней – МР-ва ФНС-нь Управлениянь руководителенть Юрий Горюновонь лездыцязо.
Дмитрий чачсь Хабаровск ошсо. Зярыя иеде икеле нинзэ ды эйкакшонзо марто састь эрямо Мордовияв, тесэ сонзэ роднянзо-раськензэ, ундоксонзо жо шабра Ульяновской областьстэ, тосо чачсть покштязо ды тетязо. Спецоперацияв сон тусь эсь олясо.
«Монь эйкакш пингень ялгатне мобилизовазельть, мон свал ульнинь мартост сюлмавомасо. Арсинь, ули мелем теемс путовкс Донбассонь ванстомантень, теке марто варчамс эсь прянть», – евтнесь ветеранось.
Боецэсь служась «Барс» отрядсонть, ульнесь рядовоекс, штатонь расписаниянть коряс – стрелококс.
«Монь марто отрядсонть служасть весе масторонь ломантне. Сехте стака чикс мон лован сетнень, конатнень ютавтынь тонавтнемань лагерьсэ. Мон парсте тосо анокстынь фронтонтень психологиянь ендо», – мерсь Дмитрий.
Тусь СВО-нь таркасто контрактонть прядовомадо мейле.
«Мон чарькодинь, эряван кудосо нинтень ды ниле эйкакштненень. Куш цератнень икеле, конат кадовсть тоско, передовойсэ, долгонь ежось кадовсь», – тешкстызе Дмитрий Демидов.
«Герои среди СВОих» проекттэнть сон кармась содамо Интернетсэ кулянь лентанть ванкшномсто, арсесь сермадомс анкета.
«Проектэнть перть минь получинек ламо мельстуиця ды лезэв информация, теевинек содавиксэкс ламо ломань марто, конат чарькодить эрьва кодат кевкстематнень. Монень пек вечкевсь театральной вейке школань представителенть марто занятиясь. Маряви, актеронь ерокчись кодаяк а сюлмави государственной службанть марто, ансяк те а истя. Видестэ путозь вайгелесь, интонациятне пек эрявикст публичной выступлениятнень туртов», – евтнесь ветеранось.
Региононь проектэнь участникенть туртов покш тевекс кармась наставникень появамось. Те ульнесь МР-нь Прявтонь ды МР-нь Правительствань Администрациянь кадрань управлениянь прявтось Владимир Куприянов.
«Сон пек ламо монь туртов тейсь. Сонзэ содамочитнень вельде мон ламос тонадынь. Чарькодинь, мезентень алтаса эсь проектэнть, сермадыя сонзэ ды идия», – толковизе боецэсь.
Дмитрий Демидовонь туртов эште вейке нежедьксэкс кармась МР-ва ФНС-нь Управлениянь руководителесь Юрий Горюнов, сон ульнесь вейке занятиясонть спикерэкс.
«Мон чарькодинь, кодамо мельстуиця минек налогонь системась, кодат покш классонь специалистт важодить те енкссонть, ды бажинь кармамс командань пельксэкс. Монь лиссь», – мерсь Дмитрий.
Маень 9-це чистэ кенярксчинь лувсо «Герои среди СВОих» проектэнь участниктненень максовить профессиональной образованиядо удостовереният.
«Евтан сюкпря МР-нь Прявтонтень Артем Здуновнень ды сонзэ весе командантень эсь прянь муеманть ды лезэвекс улеманть кисэ», – мерсь Дмитрий Демидов.
Фотось «Защитники
Отечества» Госфондонть.