Л. П. Кирюков лемсэ Саранскоень музыкальной училищасо ютавтозель кенярксчинь концерт, конась алтазель Тейтерьавань раськеютконь чинтень. Мордовия Республикава «Защитники Отечества» Государственной фондонь филиалонть лезксэнзэ вельде те мероприятиянтень сакшность геройтнень нист ды аваст.

Кенярксчинь программасонть ульнесть музыкальной произведеният, конатнень морызь ды налксизь региононь содавикс артисттнэ: ваныцятне кунсолызь Вячеслав Добрынинэнь «Белая черемуха» моронть, конань морызе МР-нь Прявтонь премиянь лауреатось Елена Сонина, МР-нь Государственной премиянь лауреатось Сергей Плодухин морызе «Волшебная ночь» моронть, Игорь Крутоень «Белая птица» моронть морызе МР-нь Народной артисткась Елена Алышева. Истя жо чокшненть мазылгавтызе Астор Пьяццоллань «Либертангось», конань седизе дуэтэсь – Марина Калинина ды Егор Макаров, моразель «Зимний вечер в Гаграх» кинофильмасто «Дружба» морось, седязельть Иоганн Штраусонь классической композициянзо ды кунсолозель МР-нь культурань заслуженной роботникенть Валерий Галкинэнь прявтсо народной инструментэнь ансамблянть налксемазо. Кенярксчинь программанть прядовомадо мейле весе аватненень казезельть цецят.

Мероприятиядонть эсь мелензэ-арсеманзо евтынзе СВО-со чавовозь участникенть низэ Елена Ильичева: «Концертэнть эйстэ покш мельспаросан, сон пештизе седеем кенярксто ды лембечиде. Сюкпря те музыкань кенярксчинть ды тундонь оймеежонь каземанть кис».