Пятница, марта 29, 2024
Важное


2020-ЦЕ ИЕНТЬ УШОДОВОМАНЗО МАРТО РОССИЯНЬ ЭРИЦЯТНЕНЬ ТУРТОВ ЛИССТЬ ПОЛАВТОМАТ ЗАКОНОДАТЕЛЬСТВАНЬ ЗЯРЫЯ ЁНКСТНЭСЭ. КОЙ-КОНАТНЕНЬ ЮТКСТОСТ ВАННОСЫНЕК СЕДЕ ДОМКАСТО.
 
ВАЖОДЕМАНТЬ КИС ПАНДОМАТНЕ

Важодицятнень пек мелявты зарплатась. 2020-це иестэ официальна важодицятнень базовой окладост касыть. Сехте вишкине зарплатась, кемекстазь законодательстванть коряс, а ули седе вишкине МРОТ-нть эйстэ. 2020-це иентень МРОТ-сь кемекстазь 12 тёжат 130 целковойть.

ПЕНСИЯТНЕНЬ КОРЯС

Якшамковонь 1-це чистэ пенсияс лисема иетне полавтовсть. Истя, те иестэ сыречинь коряс пенсияс лисить цёратне, конат чачсть 1959-це иестэ, ды 1964-це иестэ чачозь аватне. Кода содатано, Россиясо 2018-це иестэнть саезь моли пенсияс лисема иетнень касомась. Мезень коряс, 2028-це иестэ аватнень туртов пенсияс лисема шкакс кемекставить 60 иетне, цёратнень – 65.
Истя жо якшамковонь 1-це чистэ сыречинь коряс страховой пенсиятнень покшолмась кассь 6.6 %. 2019-це иенть коряс те косо-бути тёжа целковойть средней пенсиянть эйстэ.

«ЗЕМСКИЙ УЧИТЕЛЬ» ФЕДЕРАЛЬНОЙ ПРОГРАММАСЬ

Иенть ушодовомсто тевс нолдавсь «Земский учитель» федеральной программась, конань юрсо кармить явовомо 1 миллион целковойть сетненень, кие моли роботамо велев эли а покшке (50 тёжадо седе аламо эриця марто) ошов. Сетненень жо, кие сырги роботамо Дальневосточной федеральной округов, пандоматне кармить 2 миллионт целковоень покшолмасо. Икеле истят программат ульнесть зярыя регионтнэсэ.

ЭЛЕКТРОННОЙ ТРУДОВОЙ КНИЖКАТНЕ

Якшамковонь 1-це чистэ совась вийс законось, конань коряс 2020 иестэ Россиясо тевс нолдавить электронной трудовой книжкатне. Ломаненть важодемадонть, стаждонть, саевиця должносттнеде, лия роботас ютавтомадонть, панемадонть ды важодемадо лоткамодонть информациясь эрьва ковсто карми пачтявомо Россиянь Пенсионной фондс. 2020 иень аштемковонть самс важодицятненень эряви пачтямс ды толковамс, кодамо ёнкс сынь кочкить эсь трудовой книжкатнень ветямонть коряс – конёв лангсо эли электронной формасонть. Тедедень ацамковонь 31-це чинтень эряви ёвтамс эсь меленть.
Сетненень жо, кие ушодсы важодемань кинзэ 2021-це иестэ, кармить ансяк электронной трудовойть.

ЭЙКАКШ МАРТО АВАТНЕНЕНЬ ПАНДОМАТНЕ

Якшамковонь 1-це чистэнть саезь декретэв туиця аватнень туртов ярмаконь лезксэнть покшолмазо кармась 322 тёжат целковойть (те сехте ламось). Кассть вейке ды пель иенть перть эйкакшонть мельга якамонть кис пандоматнеяк.
Истя жо те иенть ушодовомсто кепедевсь авань капиталонть покшолмазояк. Бути икеле сон ульнесь 453 тёжат целковойде цють седе ламо, ней карми 466 тёжат 617 целковойть. Россиясо программась тевс нолдави 2007-це иестэнть саезь ды арсеви 2021-це иенть самс.
Лиссть полавтомат эйкакштненень пандоматнень коряскак. Якшамковонь 1-це чистэ 50 целковоень покшолмасо пандоматне лоткавтовсть (сынь явовсть эйкакшонть 1 иень 6 ковонь топодемас). Ней васенце ды омбоце эйкакшонть лангс кармить пандовомо малав 12 тёжат целковойть, бути семиянть доходозо эрьванть лангс а ули регионсонть кемекстазь эрямонь минимумонь кавто покшолматнеде ламо. Неть пандоматне кармить топавтовомо эйкакшонть колмо иетнень топодемас.

ОМБО МАСТОРСТО РАМАВКСТНЭНЬ КОРЯС

Интернет вельде омбо масторсто товартнэнь рамамсто, конат 200 евродо седе питнейть ды 31 кг седе стакат, сави пандомс пошлина 15 % питненть эйстэ. Ансяк 2 евродо килограмманть кис аволь седе ламо.
Неть правилатне кемекстазь Таможенной од кодекссэнть, конань примизь ЕЭС-нь весе мастортнэ, теке марто Россияськак. Пошлинась карми саевеме вейке рамавксонть кис (бути сон 31 кг седе стака), ковозонзо жо мереви рамамс куш зяро.

АВТОТРАНСПОРТОНЬ КИРДИЦЯТНЕНЕНЬ

Улить полавтомат водительтнень туртовгак. Васняяк, сон токасы технической ванноманть. Ней сонзэ сави ютамс весенень ды алкукс, аволь кода икеле. 2020-це иестэ техосмотранть мереви ютамс ансяк лицензия ды специализированной оборудования марто станциясо. Диагностической картась максови автомобиленть целанек ванномадо мейле ды электронной формасо. А техосмотрань ютамось карми топавтовомо фото ды видеофиксация вельде, конат кучовить ЕАИСТО-в.
Полавтомат улить автомобиленть регистрациянть коряскак. Ней государственной номертнэнь получамс мереви аволь ансяк ГИБДД-сэ, лия организациятнесэяк (автосалонтнэсэ). Номерэсь максови се региононть коряс, косо сёрмадстозь азорось. Ней автомобиленть рамамодо мейле номертэме ардтнемась а мереви.

КАЛОНЬ КУНДЫЦЯТНЕНЕНЬ
Якшамковонь 1-це чистэ совась вийс од закон калонь кундамонть коряс. Ней калонь кундсемань вечкицятненень мереви кундсемс весе эрькетнесэ ды лейтнесэ, конат кемекстазь законодательствасонть.
А мереви кундамс калт сетьсэ (те а токи Дальней Востоконь, Сибирень ды Северэнь коренной эрицятнень) ды электроульмасо, улить полавтомат ведьалга охотямонть коряскак.
Истя жо улить од полавтомат бизнесэнть туртов, налоговой органтнэнь сферасонть, экзотической ракшатнень кудосо кирдемань ёнкссонть, зярыя товартнэнь лангс акцизтнэнь кепетемасонть ды седе тов. Кода неть од совавтоматне полавтсызь минек эрямонть паро ёнов, невтьсы шкась.

Анокстызе Юлия ЕРЕМИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».