Аштемковонь 12-це чись ламо иес кадови ледстневицякс кода Рузаевка ошонь, истя республикань весе эрицятненень, кить ульнесть те покш кенярксчисэнть. Ошонтень топодсть – 390 иеть, сонзэ тешкстызь келейстэ, седейшкава ды весе икелень койтнень-кирдатнень мельс саезь.
Кенярксчись ушодовсь Свято-Троицкой Соборной храмсо Пазонь литургиянть служамосто. Теевезь коень коряс, ютавтозель ошонь зарядкась, ков сакшность ламо содавикс спортсмент. Те чистэнть тесэнь эрицятнень ды сыненст сыця инжетнень прявт пурнавома таркась – Тёжа иень курось. Сеске сельмс каявсть мазыйстэ теезь покш ортатне, конатнева ютазь эрьва сыцясь прянзо марясь прок ёвксонь ошов совицякс. Мезе ансяк тосо арасель, эрьванть туртов муевсь мелень витемань ды вечкевикс тев. Панжозельть раськень кудоюрттнэ, косо прок кандоват эрзя-мокшонь, рузонь, татаронь ды казаконь кезэрень ды неень шкань культуратнес.
Весень, кинь ульнесь мелезэ, тонавтсть тенстень сюлмамо, карень кодамо ды истя седе тов. Кедьчелькев ломантне невтсть чувтосто керсевкст, эрзянь-мокшонь койтнень кирдезь кодавкст-викшневкст. Тоско панжозельть эрьва кодат студият вишка эйкакштнень тонавтомга ды семиятненень лезэв превс путомань максомга. «Шумбрачинь ярмункасонть» тонавтсть кода ванстомс шумбрачинть ды тевс нолдамс эрямонь шумбра лувтнень. Кодат мазыйть ульнесть Рузаевкань художниктнень артовкстнэ! Истя жо тосо невтсть ёрокчист Рузаевкань художественной школань тонавтницятне, сы шкань артыцятне.
Тов сыця инжетнень ютксто ламот пурнавкшность кванториумонь куншкакуронтень. Эдь тов якиця цёрынетне, сы шкань техникань (роботонь) теицятне, лиссть изницякс масторонь пелькстамосонть.
Библиотекасо важодицятне истя жо весень кенярдовтызь интерактивной выставкасо ды врачтнень лемс мель-арсемань сермадомань лазсонть. Тешкстасынек, сонзэ вакска сюкпрянь валонь, апак сермадо кияк эзь юта.
Торжественной пельксэсь ушодовсь обед малав. Васняяк пуромозтненень поздоровт ды паронь арсемат ёвтась Мордовия Республикань Правительствань Председателень тевтнень топавтыцясь Владимир Сидоров. Сон тешкстызе, Рузаевкань эрицятнень покш путовксост важодемасо ды койтнень-кирдатнень ванстомасо. Ледстинзе те енксонь содавикс ломантнень, конатнень ютксо – Россиянь народной артисткась Александра Куликова, олимпийской чемпионось Алексей Мишин ды лия ёроков ломантнень. Башка мель явсь те ёнксонь Ине Отечественной войнань участниктненень ды Социалистической Трудонь Героентень Пелагея Ивановна Борисованень.
– Течи Рузаевкань эрицятне поладыть важодеме тиринь ёнксонть, эсест ды эйкакшост лезэс, поладыть ды панжить од сёрмадовкст тиринь моданть лангсо, – мерсь Владимир Николаевич.
Седейшкавань поздоровонь вал марто тосо эрицятненень ды инжетненень пшкадсь Рузаевкань муниципальной райононь прявтось Александр Сайгачев. Те кенярксчинть сон лемдизе историянь пельксэкс, конась кадови ледстнематнес.
Александр Иванович паро тевтнеде ёвтнемстэ, ледстизе «Рузхиммаш» предприятиянть, конась те иестэ тешкстынзе 60 иетнень.
Теде башка, парт невтевксэнзэ «Стекольная компания «Развитие» предприятиянть, косо течи важодить 540 ломанть. Текенень поладсь, маласо шкасто ушодови вакссонзо эште вейке од, неень шкантень ладиця заводонь ставтомась, косо кармить нолдавомо суликасто теевкст. Истя жо ледстязельть эште ламо паро полавтоматне, конат учить те ёнксонь эрицятнень.
– Весе неть аволь ансяк невтевкст ды цифрат, парсте пандовиця сядот важодема таркат, мезесь лезды велявтомс одовкс Рузаевкань эрицятнень, конат тусть важодеме лия ошка, – мерсь Александр Сайгачев.
Седе тов сценанть лангсто вейке-омбоце мельга ёвтасть поздоровт ды паронь арсемат кенярксчинтень сыця инжетне. Виде, сынь састь аволь чавонь кедть, казне марто.
Истя, «Рузхиммаш» АО-нь коллективенть пельде казевсь «Беларусь» тракторонть юрсо теезь коммунальной машина. «Стекольная компания «Развитие» предприятиясь казсь эйкакшонь площадка, «Агросоюз» ООО-сь – эйкакшонь искусствань школанть туртов оборудования, «АгроК-С» ООО-сь – тикшень ледемка, «Газпроммежрегионгаз» ООО-сь – Рузаевка ошонь парконть туртов оборудования ды кедьёнкст (инвентарь).
Рузаевка ошонь поселениянь администрациянь прявтось Алексей Домнин, весе пуромозтнень ды те ёнкссонть эрицятнень лемс поздоровонь ёвтамодо мейле, сюкпрянь валт ёвтась вере ледстязь предприятиянь прявттнэненьгак лемс.
– Тынк ёндо мелень явомась, лезксэсь – пек питней ды эрявикс минек туртов. Ошонь юбилеентень казнетне кувать кармить кандомо лезэ Рузаевкань эрицятненень. Те покш путовкс минек ёнксонть паролгавтомга ды виевгавтомга, – мерсь Алексей Домнин.
Те кенярксчисэнть ульнесь Мордовиянь Прявтонь тевтнень топавтыцясь Артём Здуновгак. Военной техникань менель ало музеентень сон сась «КАМАЗ-мастер» командань спортонь грузовикень кабинасо, тешкстасынек, командась «Ралли Париж-Дакар» эрьва иень марафононь участник. Автомобиленть ветясь командань пилотось Андрей Каргинов. Республикань Прявтонь тевтнень топавтыцянть марто кабинасо ульнесь Рузаевкань 9№ школань сисемеце классо тонавтницясь Анатолий Давыдов – сон ламо эйкакшонь триця семиясто, пек вечки автогонкат ды раллить.
Артём Здунов вейсэ Рузаевкань райононь прявтонть Александр Сайгачев марто ваннызь военной техникань парконть ды выставканть, конань анокстызь гражданско-патриотической тонавтомань курось ды МР-со ДОСААФ-сь. Вейке палаткасо невтсть Россиянь военной фильмат, лиясонть пурнасть вооружениянь ды Ине Отечественной войнань солдаттнэнь ули-паронь выставка. Сынст муизь тюремань таркатнестэ республикань поисковой отрядтнэ. МР-нь Прявтонь тевтнень топавтыцясь морызе весенень содавикс ды вечкевикс «Катюша» фронтонь моронть.
Тёжа иень площадьсэ улемстэ, Артем Здунов теевсь содавиксэкс тесэнь фермертнэнь, декоративно-прикладной искусствань мастертнэнь, фольклорной ансамблятнень ёрокчист марто.
Ошонь эрицятненень ды инжетненень пшкадемстэ МР-нь Прявтонь тевтнень топатыцясь тешкстась, кода сельме икеле полавтови Рузаевкась: теевить общественной од таркат, стявтовить паро кудот.
«Национальной проекттнэнь вельде, конатнень арсинзе РФ-нь Президентэсь Владимир Путин, теевить покш тевть, – тешкстызе Артём Здунов. – Карматано седе товгак паролгавтомо куронок. Минек ули кудотнень перька таркатнень паролгавтомань программанок. Маласо шкасто, окойники, панжсынзе кенкшензэ А.В.Ухтомский лемсэ культурань центрась. Вадрясто витнемат киланготнень. Прядовома лангсо ашти Рузаевканть вакска ардомань кинь теемась. Икеле те ульнесь ансяк мелекс-арсемакс, ней – алкуксонь тев. Сехте эрявиксэсь – улевельть ансяк вийтне, шумбрачись ды ярмактне. Вейсэ минь весементь изнясынек!»
Ошонь чачома чинтень МР-нь Прявтонь тевтнень топавтыцясь Рузаевкань райононь эрицятненень казсь ошонть туртов зярыя спецтехникань рамамс сертификатт.
Истя жо Артём Здунов тешкстынзе ошонь важодиця сехте паро династиятнень. Питней казнесэ казевсь Трибушининтнэнь семиясь, «Рузхиммаш» АО-со сынст важодемань стажось – 131 ие. Гусевтнень семиясь 143 иеть алтась эксплуатационной локомотивень депонтень. Сцена лангс лисемстэ цяпасть сыненст сядо ломанть.
Кенярксчинтень тердезельть содавикс морыцятне Наталья Сенчукова ды Виктор Рыбин, сынь кенярдовтызь пуромозтнень эсест моросост. Покшчинь прядовомсто ошонь менеленть валдомтызе эрьва кодамо тюсонь мазый салютось.
Валентина Юдина