Четверг, июня 13, 2024
Важное

Кода уш а весть тешкстазель, 2024 иесь яволявтозель Семиянь иекс. Тень коряс масторонок келес яволявтозь зярыя од проектт. Вейкесь эйстэст – «Весе семиянек» («Всей семьёй») Россиянь семиянь интерактивной проектэсь, косо эрявсь семиянек топавтомс эрьва кодат заданият.
Эрьва недлясто топавтозь заданиянть кис сыль «Семиясь – те» («Семья – это») сёрмадовкс ды артовкс марто электронной вкладыш, конань теизь Россиянь художниктне-иллюстратортнэ. Проектэсь ушодовсь декабрясто ды мольсь колмо пель марто ковт. Анокстыцязо – «Я помогаю детям» общественной организациясь. Нама, семия марто вейсэ шкань ютавтоманть арась питнепезэ, эдь те седеяк малавгавты тиринь ломантнень. Течинь номерсэнть минь содавттадызь Барсуковтнень семиянть марто, конат невтизь ёрокчист те проектсэнть ды лиссть финалс.

Те семиясь эри Ульяновской областень Кузоватовской райононь Еделева эрзянь велесэ, конань маласо ули эрьке ды перьканзо касы певтеме вирь. Татьяна Барсукова кудазоравась пек вечксы тиринь велензэ. Сон омбоце ие важоди Еделевань школасо рузонь келень ды литературань тонавтыцякс. Теде башка, пельставкасо психологокс. Мирдезэ, Александр, важоди Троицкий Сунгур велесэ «Агро-Нептун» ракшань комплекссэ механизаторокс. Улить кавто эйкакшост. Вероника тейтерькаст тонавтни 3-це классо, Глеб цёрынькаст туртов ансяк 3 иеть. Семиясь од, секскак тенст мельспароль варчамс эсь прянть «Весе семиянек» проектсэнть. Татьяна седе домкасто ёвтнесь тенек те тевденть:

– Те проектсэнть участвовамга эрявсь ютамс ссылкава, регистрировамс эсь прянть ды недлянь перть топавтомс кучозь заданиятнень. Од заданиясь сакшныль личной пачтямосо «ВКонтакте» социальной сетьсэ эрьва пецясто. Секскак икелепелев кияк эзь сода, кодамо карми мельганзо молиця кармавтомась. Алкукс меремс, те ульнесь седеяк мельстуицякс: паро мельсэ учинек, мезе карми седе тов, кодамо ули заданиясь. Бути кенери семиясь топавтомс максозенть, недлянть прядовомсто сёрминесэ сакшныль «Семиясь – те» вкладыш, конась алтазь топавтозь заданиянтень. Те чинтень, зярдо топавтынек весе 15 заданиятнень, минек таштавсть 15 вкладышт. Те минек истямо апокш семиянь коллекциянок, конась кадови проектэнть ледстнемга. Проектэнь изницятненень анокстазельть 100 семейной путешествият. Эйстэст 70 – ве чинь перть эсь регионга, 25 – кавто чинь перть эсь регионга, 5 – вете чинь перть масторонок келес. Лиятне кармасть финалистэкс, сынст ютксо минек семияськак. Миненек алтасть кучомс финалистэнь именной сертификатт. Участниктнеде ульнесть малав 5000 семият, конат пурназельть «ВК-нь» вейсэнь группас.
Миненек казнекс эзь понго путешествиясь, кучсть фотокнига, ды ялатеке лован эсь семиям изницякс. Ёвтнеса, мекс. Те проектэсь аволь ансяк минек семиянок сыремтизе, истя жо ялганокак, шабранокак, ве классо тонавтницянокак, важодиця ялганокак. Сон пурнынзе вейс Россиянь ламо семиятнень вейке покштояк покш семияс. Те ульнесь мельстуиця, кенярксов, лембе, мелень витиця вейсэнь тев – вишкинетнестэ саезь покштнес.

– Кода муиде шка? Стакаль-аволь пурнамс семиянть вейс?
– Те тевесь, пурнавомась, койсэнь, ульнеськак сехте стакакс. Мирдем важоди шабра велесэ. Стякшны 4 чассто, сакшны эрьва кода: лиясто кото чассто, лиясто позда чокшнень кемень чассто. Оймсема чинзэяк чуросто эрсить – кавто недляс кавто чить. Секскак сонзэ «кундамс» а шождаль. Ялатеке муинек шка вейсэндявомс ды топавтомс максозь тевенть. Васня сон мурнесь эйсэнь: «Таня, мезекс теть те стяконь тевесь? Свал эцят ков а эряви...» Мейле жо, кода топавтынек кавксошка заданият, сон сонсь кармась кевкстнеме: «Таня, ну, мезе тосо, зярдо таго тенек сыть заданият?» Эсензэяк мельс пек туекшнесь. Мон проекттэнть мейле тензэ меринь: «Минь кемень иес зяро шка вейсэ эзинек ютавто, кода неть 3,5 ковтнень перть!» Эдь эрявсь эрьва заданиянтень анокстамс, мезе-бути теемс вейсэ ды те вейсэнь тевесь седеяк вейсэндимизь.

– Татьяна, ёвтнеде, мезе вечкить тееме эйкакшонк?
– Монь лездыцям ды мелень витицям – Вероника тейтерем. Сон пек вечки пурнамо алмазонь мозаикасто картинат. Пек вечкеви тензэ те тевесь. Седе ламо шка тенень яви каникуласто, тонавтнемань перть аламо мезе кенери. Теде башка, школадо мейле яки спортивной секцияс. Кудосо кирдтяно кавто «морской свинкат», конатнень мельга яки ансяк Вероника. Сыненст эряви теленень костямс тикшине, андомс, шлямс мельгаст...

Колмо иесэ Глеб цёрынем тусь тетякс, рузкс меремс, «заядлый рыбак». Ававтом цёрадонзо кортась: «Сон эйкакш пингестэ саезь ульманзо саилизе ды Лепелейкав эли Томышовкав сыргиль. Весе эйкакштне сентябрянь 1-це чистэ молить школав, минексесь – лей лангов». Ды ней цёрынезэяк истямо. Иеде икеле макснинек тензэ ульмань таркас кувака палкине ды сон истя ведьпурнавкссто (лужасто) «кундсесь калт». Мейле тетязо кармась сайнеме эсензэ марто калонь кундсеме.

– Заданиятнестэ вейкесэнть эрявсь невтемс семиянек кодамояк тевс мелень явоманть. Лисни, калонь кундамось – те тынк вейсэнь семиянь тев?
– Истя, минь семиянек Интернетсэ вантано калонь кундыцянь ды охотникень каналт. Глеб сонсь веши: «Тетяй, вантано калонь кундамодо?» Мультикть тензэ истя а эрявить, кода ульмамодо каналтнэнь ваномась. Минь весе вейсэ якатано лей лангов, эрьванть эсензэ ульмазо. Глебень ули мелезэ кундамс покш нучко. Ды те иестэ, окойники, тетянок алтась ускомс минек Рав лангов.
Зярдо цёрынем марто ардтано меньгак лей эли эрьке вакска, сон свал кевкстни: «Авай, а тесэ калт улить?» Мерян, улить, сон таго: «Мон бу тестэ калт кундсевлинь». Секскак, эзь кадово вейкеяк эрьке перьканок, косо бу аволинек кундсе калт: Сунгурсояк, Никольскойсэяк, Якстере Балтиясояк, эсенек Еделевань эрькесэяк. Тесэ ули частной эрьке, косо П. А. Ивашин кирди-касты калт, седе ламо, курдат (карпт), зеркальной карпт ды седе вишкине лия калнэть. Минь сайтяно ансяк покш калтнэнь. Вишкинетнень, бути сынь аволь пек керявозь, свал нолдтнетяно. Мекев ведьс калонь нолдтнеме сехте пек вечки Глеб. Сонензэ зяро аволь сынсь калтнэ эрявить, кода лей чиресэ ульма марто аштемась. Весть тетязо сайнизе натой телень ульмамос эсенек а васоло эрькентень. Ды кодамо тельня калонь кундамось, зярдо сынь удыть… Зярыя шкадо мейле, кода покш ломань, мериль тетянтень: «Тесэ калт арасть, адя седе тов шашттано». Ды эряви меремс, кундакшность кавксошка судакт.

Ней цёранок аноксты кизэнь калкундамос. Ней уш тетянзо марто таргизь-ваннызь мотор марто венченть. Анокстызь кечказ марто ульматнень – ки соды зяро эйстэдест. Ансяк эрьвась эйстэнек соды, косо ды кинь кодамо ульмазо. Эрьванть эсензэ. Приманкакс сайнетяно сукст. Икелепелев мирдем пиди ямксткак, кснавгак, лопавти эрьва кодат «каванямкат» калтнэнень ды ёртнесынзе веденть ланга. Кизна холодильниксэ банкинесэ кирдтяно ашо суксткак (опарыши), тонадовсь уш миненек…

Васня, зярдо ансяк урьвакстынек-венчинек, мон арсинь, мезе те калонь кундамосонть парось? Шкань ютазь мирдем кармась эйсэнек сеедьстэ сайнеме мартонзо. Ды ансяк сестэ арсезевинь, кодамо те паро тевесь: сэтьмечи, оймсема, ёжонь витема… Мельтне-превтне мездеяк апак пештя, мездеяк стакадо эли берянде те шкастонть а арсят, арсят ансяк седе, мезе моли ней, ды весе. Секскак оймсемань кис те пек вадря.
Тешкстаса, мирдем сонсь ози кундазь калтнэнь марто – салты, ресты, кости. Монень ансяк мери рестамсто салсо-перецьсэ почодомс.
Мирдем истя жо вечксы охотямонтькак. Минек улить кавто гончей кисканок: Харитоннэнь 10 иеть, сон пек превей кискась, алкуксонь охотник. Омбоцесь, Шумок, допрок однэ, тензэ ансяк ие, эштё тонавтни весемес. Мелень сёксня Глебень тетязо сайнизе идем ракшатнень пильгечалгавксост ды пизэст ванномо. Мукшность ривезень, нерьгазонь (барсуконь) пизэть. Ванность пильгечалгавксткак – кодамо ракша кува ютась ды седе тов. Глеб яла корты: «Вана касан, молян охотямо ды ледян идем туво». Миненек натой тонадовсь вейсэ идем ракшатнень марто эрямс – велеванок лиясто мик косулят якить, тонадынек эйзэст, а дивсетяно.

– Татьяна, эсенк тетянк-аванк улить?
– Монь авам – кудазорава. Пек вечки панго мельга яксеме, ягодань-тикшень кочкамо, сюлмси-аноксты банятенстть. Ды аволь ансяк эстензэ, лия ломантнененьгак. Мон чачинь ламо эйкакшонь триця-кастыця семиясо. Эйстэденек колмо патят-сазорт. Ней эрьванть эсензэ семиязо. Покш читнестэ свал вастневтяно авань кудосо, эсь юткова эрятано покш ялгаксчисэ. Мон а чарькодян, кода лиятне а вечксызь эсь малавиксэст, сёвныть, а ладить эсь ютковаст. Тетянок моньгак, мирденьгак арасть, сынь умок кулость. Мирдень авазо важоди больницясо санитаркакс. Истя жо вечки мастумарень-кстыень пурнамо.
Видьстэ меремс, велесэ эрямось аволь берянь. Койсэнь, ошсо аволинь цидярдо. Тесэ сэтьме, ванькс кошт ды певтеме мазычи, сехте пек ней, тунда, зярдо вельми весе пертьпельксэсь.
– Сюкпря мельстуиця ёвтнеманк кис! Шумбрачи ды уцяска семиянк туртов! Топавтовост весе меленк-арсеманк!
Фототне саезь Барсуковтнень семиянь архивстэ

Марина Агафонова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».