Ютазь недлясто А.С. Пушкин лемсэ Национальной библиотекасо ютась Эрзянь ды мокшонь раськень регионъютконь общественной вейсэндявксонь исполкомонь президиумонь промкс.
Сонзэ прявт темась ульнесь, кода Мордовиясо топавтови «Сохранение и развитие национальной культуры, государственных языков Республики Мордовия и других языков в Республике Мордовия» государственной программась, конась анокстазель минек республикань Прявтонть Артём Здуновонь лезксэнзэ вельде ды кармась топавтовомо те иестэ саезь.
Панжизе промксонть вейсэндявксонь прявтось Юрий Мишанин. Вастовомантень сакшность МР-нь Прявтонь ды Правительствань Администрациянь, министерстватнень, ведомстватнень, Саранск ошонь, Гуманитарной наукань НИИ-нь представительтне, сетне, кить вейсэ исполкомонть марто топавтыть ды седе товгак кармить топавтомо те пек эрявикс тевенть. Культурань, раськень политикань ды архивень тевень министрань васенце полавтыцясь Александр Карьгин ёвтнесь сеть мероприятиятнеде, конатнень топавты сынст министерствась те госпрограмманть лувсо. Истя жо теде ёвтнесть МР-нь Прявтонь Администрациянь Массовой коммуникациянь сферасонть государственной политикань управлениянь отделэнь прявтось И. И. Скопина, Саранск ошонь Социальной политикань департаментэнь прявтось О. В. Шуляпова, «Педагог13.ру» Центрань ректорось Т. В. Самсонова, МР-нь Правительстванть юрсо гуманитарной наукань НИИ-нь прявтось Г. А. Куршева. Школатнесэ эрзянь ды мокшонь кельтнень тонавтнемань ды тиринь кельсэ учебниктнень нолдамонь коряс мелявкстнэде ёвтнесь педагогической наукань докторось, профессорось А. М. Каторова. Сон тешкстызе, школатнесэ эряви кастомс эрзянь ды мокшонь кельтнень туртов уроктнень кавто часос ды путнемс корязост оценкат. Сестэ тевесь кельтнень тонавтнеманть коряс седе сырги. Учебниктненьгак эряви нолдамс велень ды ошонь школатненень башка-башка.
Промкссонть истя жо кортазель, программанть топавтоманзо коряс ютавтомс мониторинг вейсэ министерстватнень ды ведомстватнень марто.