Республикань сехте кезэрень храмонтень – Иоанно-Богословонь соборонтень – сентябрянь 10-це чистэ пачтявить Рузонь Православной Церьковань питнейчитне: Пророконть, Пазонь лемдицянть Иоанн-Предтечань пазавась ды Вонифатий мученикенть ликесь сынст иневанькс мощатнень пельксэст марто.
Самай сыненст эрицятне, Пазнэнь кемицятне, сеедьстэ энялдыть винадо симемань пежетькстэнть пичкамодо. Саранск ошонь куншкакуросо, Демократическая куросо аштиця Иоанно-Богословонь соборонтень неть святынятне пачтявить сентябрянь 10-це чистэ ды кармить тосо улеме октябрянь 5-це чис. Те шканть перть весе, кинь ули мелезэ, тердевить эрьва чистэ те храмонтень сыненст сюконямо.
Неень шкань эпидемиологической лувонть ды Роспотребнадзоронь вешематнень мельс саезь, неть святынятне пачтявить ды кармить кирдевеме санитарно-эпидемиологической вешематнень топавтозь. Эрьва чистэ Пазаватнень икеле кармить ютавтовомо озномат ды ловновить акафистт весе православной христиантнэнь кисэ, сехте пек алкоголизмань, наркоманиянь, таргамонь ды лия тонадовозь апаро орматнеде менемань кувалма.
Истя жо теке шкасто храмтнесэ кармить ютавтовомо эрьва кодат мероприятият, конатнесэ толковавить «кренчень ведтенть» симемань зыяновчись ды эрямонь шумбра койтне. Теде башка, арсеви тердемс республикань томбальде специалист, кие парсте содасы трезвенной служениянть.
Неть мероприятиятнень ютавтомсто кармить ловновомо проповедть, конатнень пингстэ весе, кинь ули мелезэ, максыть вал икелепелев а симемс иредстицядонть.