(Пезэ. Ушодксось ютазь номерсэ)
Григорийде ледстни довазо Алена Слугина:
«Гриша марто теевинек содавиксэкс единой государственной экзаменсэ. Понгинек вейке аудиторияс. Сон аштесь озадо васенце партанть экшсэ, велявтсь удалов, монь енов, те шкане мон мизолдозевинь, Гришаяк каршон мизолдозевсь.
Се чистэнть саезь карминек вейкенек-вейкенек содамо, кортнеме. Гриша евтась тень, бажи молемс тонавтнеме десантной училищав. Мерсь, якси тренировкав, пек аноксты. Ансяк тонавтнеме понгсь иень ютазь. 2013 иень сентябрясто сон мельспаросо сермадсь седе, кода примась присяга ды кармась курсантокс.
Тонавтнемань весе иетнень перть минь кортнинек, гайневтнинек телефонга, чуросто вастневинек. Мон прядыя Н.П. Огарев лемсэ МГУ-нть, карминь роботамо.
Училищанть прядомадо мейле Гриша яволявтсь урьвакстомадо. Сон сась розань ашо пусмо марто, стясь кумажа лангс, венстясь суркс ды кевкстимим: «Улят монь никс?». Нама, меринь, улян.
Свадьбанок ульнесь 2019 иень февралень 2-це чистэ. Колмо чинь ютазь туинек Камышин ошов, косо ютась Гришань службазо. Служебной эрямо таркав совамсто сеске редия, кода а сатныть тесэ авань кедть. Квартирась пельсчаволь: столь, стул, кровать, холодильник, плита, киякссо ламо книгат, тетрадь марто конспектт. Превезэнь састь валтнэ: «Ну, вана, ушодови офицерэнь нинть эрямось».
Службань васенце читнестэ саезь, Гриша весе прянзо алтась службантень. Свал кортыль: «Весемесь улезэ ды ютазо парсте!». Истя ульнеськак – личной составонть марто важодема, кармавтоматнень топавтома, ламо командировкат, полигонов ардтнемат. Мон ансяк учинь ды кеминь.
Гриша свал аштесь мельсэнь-превсэнь, седейсэнь. Варштан вальмава – юты службасто эли зярдо пелеветь сыль кудов, сыргозилинь зярыя минутадо самодонзо икеле.
2021 иень сексня туинек эрямо Псков ошов. Распределениянь коряс Гришань ютавтызь 237-це одс пурназь полкс. Тесэ тевтнень топавтомга эрявсть ламо вийть ды шка. Кода маштынь, оймавтынь сонзэ.
Февралень васенце читнестэ Гриша евтась командировкав туемадо, ушодовить ученият. Сынь сеедьстэ эрсесть, ансяк вана седеесь мекс-бути ризнэзевсь. Седеесь марясь, ризнэсь аволь стяко, командировкась поладовсь специальной военной операциясо.
Ансяк ковонь ютазь Гриша гайневтсь асодавикс номерстэ ды мон мария вайгелензэ. Кецямодонть эзть кирдеве сельведень.
Военнослужащейтнень нитнень марто карминек кучнеме посылкат, якинек воинтнэнь кисэ молебнас озномо. Гришань пельде сась серма, косо сермадсь фронтонь тевтнеде ды куроксто кудов велявтомадо. Сермась ульнесь эрзянь кельсэ: «Ушось а кецявты, валыть пиземеть. Течи васенце чи, кода лиссь чипай. Кецнетяно, костясынек оршамопеленек». Сон евтнесь вирьсэ землянкасо эрямодо, кода састь задачань топавтомсто ды курок таго сыргить…Сакшнось тенст банякс теезь КамАЗ, цератне шлясть-нардасть ды муськизь оршамопелест.
Гриша кемсь Пазнэнь. Заданияв туемадо икеле свал саиль полконь священникень кедьстэ чанстямо. Мартонзо кандтниль молитвослов ды пазавинеть. Сон ознось аволь ансяк ялганзо кис, ознось яттнэнь кисэяк, кадык Пазось максы тенст превть. Аволь весть озноматне идизь эрямонзо. Кода евтнесь ялгазо, 2022 иень декабрясто, Од иеде икеле, сынь понгсть леднема алов, валявсть окопсо модасо. Кода эриекс кадовсть ды лисевсть, соды ансяк Пазось…
Ранявомадо мейле Гриша сакшнось отпусков, мон кевкстнинь передовойсэ тевтнеде, сон жо мерсь, арась мелезэ теде евтнемс. Ансяк меельцеде кортамстонок алтась весементь евтнемс. Гриша кавксть ранязель: 2022 иень июньстэ ды сентябрясто.
Шкань ютазь, карминь содамо, мереви ардомс Луганскоев ды вастовомс Гришань марто. Мон сыргинь. Неть ульнесть сехте уцяскав колмо чить! Минь пек кецнинек вастовомсто. Сестэ Гриша мерсь, эряви максомс питне эрямонь эрьва минутантень, эрямс ней, а кадомс мезентькак мейленень. Те ульнесь меельце вастовоманок.
2023 иень сентябрянь 20-це чистэ Гриша гайневтсь тень видеосвязь вельде. Сон пачтясь боевой заданияв туемадо, ансяк теде мейле сы отпусков. Кортнинек семиядонок, службадо, отпускто. Сон евтась сюкпря тень кемеманть ды учоманть кисэ. Меельце пельиенть перть васенцеде истя кувать кортнинек.
Сентябрянь 26-це чистэ эзинь муе эстень тарка. Секе тев ванынь частнэнь лангс, учинь важодема чинь прядовоманть, моликсэлинь церьковав озномо. Храмсо стинь Николай Чудотворецэнь пазаванть ваксс ды тусть сельведень. Оймавтынь эсь прям: «Весе карми парсте, весе парсте».
Теде икеле макссть тенек служебной эрямо тарка. Гришань самодо икеле капшинь паролгавтомс квартиранть. Седеем апак лотксе ризнэсь, оймавтынь прясон ды кодаяк эзинь оймаво. Веть сермадынь Гришанень «Ангела-Хранителя», ансяк каршо вал эзь са… Омбоце чистэ роботасо гайневтсть тень ды тердимизь проходноев. Берянь мельтне эзть паневе…Частень командованиясь пачтясь Гришань чавовомадо…
Гриша ульнесь паро мирдекс, эрьва тевсэ лездыцякс, алкуксонь нежекс.
Чавовомадонзо мейле 40 чинь ютазь неинь он, косо Гриша кандсь эйсэнь кедь лангсо ды мерсь, келя, тесэ свал монь вакссо.
Тиринь масторонтень служамось – сонзэ покш мелезэ. Те аштесь эрямосонзо васенце таркасо. Эрямонзояк максызе масторонть, видечинть ды кемеманть кисэ».
Гришань лелязо Александр Слугин:
«Авам свал мериль, кортнеде, лездадо вейкенк-вейкенк туртов, тынь – ве пизэнь нармунть.
Кияк эзь арсеяк, ялаксонь эрямозо карми истямо нурька, сонензэ ульнесть ансяк 28 иеть. Ульнесть ламо мельть-бажамот ды сынь кадовсть апак топавто».
РФ-нь Президентэнть Указонзо коряс (2024 иень мартонь 26-це чинь), воинской тевень топавтомсто апелемачинть ды героизманть невтемга гвардиянь капитанось Григорий Александрович Слугин казевсь Россиянь Героень лемсэ (куломадо мейле).
Татьяна Маторкина