Саранскоень Советской куронь 65-це кудонть стенас ней артозь мурал. Сон панжозь Россиянь Героенть Григорий Слугинэнь ледстнемга. Муралось теезь МР-нь Прявтонть мелензэ коряс Россиянь военно-исторической вейсэндявксонть «Герои и подвиги» проектэнть ды «Единая Россия» партиянть лезксэст вельде.
Покш артовксось панжовсь июнень 18-це чистэ, самай те чистэнть чачсь гвардиянь капитанось Григорий Слугин. Вастовомантень сакшность МР-нь Прявтось Артем Здунов, военнослужащейтне, кадеттнэ, юнармеецтнэ, Григорий Слугинэнь тетязо-авазо ды малавиксэнзэ. Минек ули меленек содавтомс тынк героенть эрямонь ды боевой кинзэ марто. Баеньбуень эрзянь велень церась кавксть казезь Мужествань Орденсэ, «За Отвагу» медальсэ. Сонензэ савсь ютамс стака тюремат, панемс, а нолдамс ятонть минек модатнес. Вана кода ледстни Григорийде авазо – Татьяна Васильевна Слугина:
«Гриша чачсь 1995 иень июнень 18-це чинь рана валске. Те шкас мельсэнь ашти – ульнесь православной покш чи – Духовонь чись. Чачтомань кудосонть сон вейкине церынель, секскак кедезэнзэ биркань путомо эзть карма, истякак а тапави. Мон пек кецнинь, зярдо чачсь омбоце церынем, покшось, Саша, секе тев вешсь ялакске, ютксост 4,5 иеть. Мелезэ топавтовсь. Лемдинек покштянзо лемсэ Григориекс (монь атявтонь), сон паро ломанель, ламо лездась тень. Гриша кассь сэтьме эйкакшокс, мелявкст корязонзо арасельть. Покшось, Саша, свал лездась монень ды кецнесь, зярдо энялдынь аштемс эйкакшонть марто.
2001 иестэ Гриша мольсь васенце классов. Саша марто сынь вейсэ якасть школав, явсть мель спортонтень, эрясть покш ялгаксчисэ. Покшось кармась якамо бороцямос, вишкинеськак бажась тенень. А уш зярдо неинзе Сашань васенце грамотанзо, седеяк чачсь мелезэ ансяк изнямс.
Гриша паро мельсэ тонавтнесь школасо. Вечксь географиянть, историянть, бажась ламо содамс. Тонавтыцятне зярдояк лангозонзо эзть пеняця. Покшсто касозь, сон кармась явомо мель гирянь спортонтень. Тренерэзэ ульнесь содавикс спортсменэсь Валерий Притуленко. Сонзэ вановтонзо ало церам сайнесь васенце таркат райононь ды республикань пелькстамотнесэ. Школанть прядомсто топавтызе покш ломанень разрядонь васенце нормативенть. Изнявкстнэнь кисэ эряви евтамс сюкпря тетянстэнь – Александр Григорьевичнень. Сон эрьва валске 6 чассто стявтылинзе церынетнень чийнеме. Чиильть Баеньбуестэ Тургенева поселканть видьс ды мекев – кавто енов вете вайгельбеть! Ды мезесь дивавты, цератне эзть моле тетяст каршо, натой, сюкпря евтыльть.
Эйкакштне лездасть тень эрьва мейсэ: кудоютконь тевтнесэ, кардазсо, пиресэ ды зярдо стявтынек кудо. Монь авам ранаяк кулось, сеедьстэ якилинь калмолангов. Церан свал якасть мартон, эзимизь кадно ськамон. А уш килангось кодамо берянель! Рудаз шкане резинань кемсэяк пезнылить. Гриша жо кортыль: «Авай, кода касан, мон тейса калмолангов кинть!».
2008 иестэ Саша мерсь, моли тонавтнеме военной училищав. Мон карминь кортавтомо: профессиясь стака, зыянов, кудот-чить а неят, семиятне каладыть… Ансяк тетязо кирдизе церанзо меленть. Саша кармась тонавтнеме Рязанень высшей воздушно-десантной командной училищасо. Лелянзо лангс ванозь, Гришаяк арсесь улемс военноекс. Эзинь карма мезеяк кортамо, арсинь эсь пачкан, мейле эрямост перть кармить корямон, бути молян мелест каршо.
2012 иестэ Гриша прядызе школанзо ды сыргась Рязанень военной училищав. Васня тов эзь понго тонавтнеме ды пек ризнэсь тень кувалма. Вейке ие тонавтнесь Саранскоень кооперативной институтонь юридической факультетсэ. Мелезэ топавтовсь иень ютазь, 2013 иестэ сон кармась десантной училищань курсантокс.
Гриша тонавтнесь парсте, строевой анокчизэ вадряль, кавксть сайнизь Московов Якстере Площадьсэ Изнямонь чинь парадов. Зярдо сакшныль велев отпусков, свал мельспаросо евтнесь тонавтнемадонть. Сашаяк бажиль те шкане саемс отпуск. Неть читне марявсть тень сехте уцяскавт, лембеть! Мон весе седейстэ евтылинь Пазонтень сюкпря – истят паро, алкуксонь церат кастынь.
2018 иестэ Гриша прядызе училищанть гвардиянь лейтенантонь лемсэ ды кучозель Волгоградской областень Камышин ошонь Южной военной округонь 56-це десантно-штурмовой башка бригадав, тосо служась братозояк. Колмо ковонь ютазь сонзэ ладизь разведывательной взводонь парашютно-десантной батальононь командирэкс. Те таркасонть прянзо невтизе парсте. Телефонсо гайневтемстэ пеедькшниль: «Мон ялатеке Сашань сасаса званиянь коряс! Кавтонек карматано полковникекс!».
Камышинсэ сынь урьвакстсть, пурнасть семият, ладизь эрямост од таркасонть.
2021 иестэ Григориень ютавтызь Псков ошов (237-й гвардейский десантно-штурмовой Торуньский Краснознаменный полк 76-й гвардейской десантно-штурмовой Черниговской Краснознаменной ордена Суворова дивизии).
2022 иень февральстэ церан пачтясть, туить тонавтнематнес. Кияк эзь учне, мезе мейле карми. Февралень 23-це чистэ кучинь тенст лембе валт Тиринь масторонь ванстыцянь чинть кувалма. Ансяк сынь эзизь ловнояк. Омбоце чистэ кунсолынь телевизорга кулятнень ды талакадынь. Ансяк колмо недлянь ютазь видеосвязь вельде гайневтсь тень Саша. Мон сеске рединь чамастонзо раужо точкатнень, кевкстия, мезе те. Сон жо оймавтымим, мерсь, тарадсо ватксевсь киськесь. Седе тов неинь госпитальстэ сюжеттнэнь, цератнень чамаст весе раужо точкасо, сынь ранязельть… Ды весе чарькодинь. Урьвам пачтясь, Саша кавксть ранязель, Гриша понгсь леднематнень алов…
Григорийгак ранязель кавксть. Васенцеде 2022 иень июнень 7-це чистэ. Ранявомась стакаль, снарядонь пелькстнэ понгсть пукшос. Кучизь военной госпиталев. Июнень 18-це чистэ, чачома чистэнзэ, минь якинек варштамонзо (мон, тетязо ды Алена низэ). Лецямодо мейле Григорий велявтсь фронтов. Ульнесь фронтонь восточной флангсо батальононь командирэнь полавтыцякс.
Сексня, боевой задачань топавтомсто, омбоцеде ранязель. Лецямодо мейле таго весе вастовинек Московсо. Туемстэ церам кеместэ кутмордымим ды мерсь: «Авай, ознок кисэнь, войнасо ули Пазонь лезкс ды цюдань тевть». Теде мейле церьковасо эзинь менстя вейкеяк служба.
Минек цератнеде сюжет невтсть «Время покажет» программасо. Сентябрянь 8-це чистэ Саша ды Гриша вастовсть СВО-со ды гайневтсть кудов. «Тынь ней вейсэ карматадо?» – сельведень эзть кирдеве. «Минь ней шабрат!» – мерсть каршон. Мон кучовтынь кедьстэст вейсэнь фотография, путыя рамкас истямо вал марто: «Два хороших сына у меня, две надежды, два живых огня».
Сентябрянь 21-це чистэ Гриша пачтясь, сон передовойсэ, мерсь а мелявтомс, весе карми вадря. Теде мейле уш связь арасель мартонзо. 2023 иень сентябрянь 26-це чистэ сон чавовсь…
Григориень кандолазонть ускизе Саша. Калмамсто полконь штабонь прявтось яволявтсь, апелемачинть ды героизманть кисэ гвардиянь капитанось Григорий Слугин казевсь Россиянь Героень лемсэ. Сон идинзе окружениясто лисиця ялгатнень, ансяк эсь прязо эзь ванстово... Гришань командирэсь мерсь, истят алкуксонь офицерт ды виев ломанть, кода Гриша, пек аламо.
Пек стака емавтомс эйкакшот. Эрьва авантень эйкакшозо – сехте паро. Гришань учость ламо изнявкст ды паро тевть Масторонок лезэс, а сон эзь кенере теевемс тетякскак…»
Пезэ сы номерсэ.
Татьяна Маторкина
Фототне МР-нь Прявтонь Пресс-службанть.