2026 иенть Россиянь Президентэсь В.В. Путин яволявтызе Раськетнень вейсэндявомань иекс. Россиясь ловови масторлангонь сехте ламо раськень мастортнэстэ вейкекс.
Тесэ эрить 190 ламо раськеть, конат кортыть малав 100 кельтнесэ. Ды эрьва раськесь – те лия енов а молиця культура, койть-кирдат, кель. Те весемесь – покштояк покш сюпавчи. Те сюпавчинть пельксэкс аштить эрзятне ды мокшотне, конат эрить аволь ансяк Мордовиясо, весе масторлангонть келес.
Течи эсь ловныцятнень минь содавтсынек Пенза енксонь эрзянь ды мокшонь раськень культурань сюпавчинть – «Яксарочка» народной фольклорно-этнографической ансамблянть марто, конась тедеде тешксты эсь 80 иень юбилеензэ.
«Яксарочка» раськень фольклорно-этнографической ансамблясь пурназель 1946 иестэ. Пенза енксонь Шемышейской райононь Старая Яксарка велень эрицятне, фронтсто мирдест учозь, пурнавкшность вейс морсеме. Ине Отечественной войнадонть мейле жо арсесть а лоткавтомс те тевенть ды пурнасть ансамбля. Васоло 1946 иестэ коллективенть ульнесь васенце концертэськак – Ине Изнямодонть мейле иень ютазь, маень 9-це чистэ, тиринь велесэ. Ансамблянть шкинемасо эрзянь ды мокшонь ламо вайгельсэ морамонь кезэрень койтнеде-кирдатнеде минь кортынек коллективень ветицянть Ольга Зоткина марто.
«Яксарочка» лемесь мокшонь-эрзянь кельстэ ютавтови кода «яксярго» эли «азгондиця чеядавкс». Ансамблясь важоди Старая Яксарка велесэ. Ольга Зоткина евтни, икеле тунда Сура леесь валовиль, ды велесэнть теевильть ламо чеядавкст, ков ливтильтькак яксярготне.
«Лемесь моли веленть лемензэ эйстэ. А яксяргось эрзянь-мокшонь культурасо ловови иневанькс нармунекс, эдь евксонть коряс, зярдо Пазось тейсь Модамасторонть, яксяргось чопавтсь веденть алов ды тосто нерьсэнзэ таргась мода минек планетанть теемга», – корты Ольга Викторовна.
«Яксарочкань» васенце ветицякс ульнесь Анна Леонтьевна Давыдкина. Велень простой ломанесь, музыкальной образованиявтомо сон пурнынзе перьканзо аватнень, конат бажасть морамс ды эсь шкинемасост кандомс эрзянь-мокшонь культуранть лиятненень. Ине Отечественной войнань шкасто Анна Леонтьевна важодсь сельсоветэнь председателекс, мейле – библиотекарекс. Зярдо цератне фронтсто велявтсть, сон кармась клубонь прявтокс, козонь сеедьстэ пурнавкшность аватне. Истя чачськак коллективесь.
«Яксарочка» ансамблясь весе историянзо перть ульнесь ламо фестивальтнесэ аволь ансяк Пензань областьсэ ды Россиясо, истя жо ардтнесь Литвав, Клайпеда ошов.
«Минек сырькайтне малав весе Советской Союзонть ютызь. Клайпедасо кармасть фестивалень лауреатокс. Нейгак эрьва косо эсь шкинеманок невттяно. Теде башка, морсетяно Пензань областень раськень весе кенярксчитнесэ, эрзянь ды мокшонь мероприятиятнесэ, ардтнетяно Саратовав, Саранскоев. Минь уш зярыяксть кемекстынек «Народной коллектив» лементь», – тешксты Ольга Викторовна.
Ней коллективсэнть морсить сисем ломанть. Неть – Людмила Ивановна Давкина, Лидия Васильевна Радайкина, Любовь Ивановна Бахтеева, Людмила Викторовна Манторова, Вера Ивановна Пантюшова, Валентина Федоровна Табаксюрова ды сонсь Ольга Викторовна Зоткина. Репетициятнень туртов башка чить арасть. Артисткатне вастневить седеень тердемань коряс. Бути эряви, эрьва чистэяк вастовить, ансяк кизна, зярдо ушодовить садпирень тевтне, седе чуросто. Паро коекс жо кармась вейкесь – аватне аволь ансяк вейке коллективсэ морсицят, сынь теевсть малавикс ломанекс.
Ольга Зоткина коллективентень сась малав 34 иеде икеле. Сестэ сон ушодсь важодеме велень Культурань кудосо, кармась седе ламо содамо ансамблядонть ды эзь кадово ве енов.
«Мон сынь коллективентень художественной руководителекс, карминь сырькайтнень марто морсеме. Кода сынь морасть, ней уш те тембрась а саеви. Те сыненст чачомстост Пазонть пельде максозель, авань ловсонть марто потязель. Секс се шкань аватне весе парсте морасть! А ней лавсень моротненьгак кияк а морси. Икеле эйкакшось мари аванзо моронть ды те оймавтыця гайттенть рожомиль, сэтьместэ матедевиль. А ней путызь телефононть коникенть ваксс, нолдызь пиземень шалтонть, электрической нурсемканть, ды эйкакшось сонсь матедеви.
А вана зярдо саят кедезэть эйкакш, лепштясак мештезэть – те ялатеке лия. Лавсень моротне – лия танстень. Эйкакштнень марто икеле налксинек, ней – весе гаджетсэ эсь пряст кенярдовтыть. Ды секскак од ломантне ней сеедьстэ а маштыть морамо, бути сынсь а явить мель. Бути тетятнень-аватнень ули мелест, макссызь эйкакшонть музыкальной школав», – евтнесь Ольга Зоткина.
Ансамблясь уш теевсь вейке семиякс. Вастовомсто аватне аволь ансяк репетировить, истя жо кортнить, евтнить эсь тевдест.
«Арсян, цидярдтано эште, зяро вийсэнек. Минь уш истя теевинек ялгакс, карминек вейке семиякс. Эрьва чистэ бажатано пурнавомс, мезе илязо лисе. Кенярдомасояк, ризкссэяк вейсэтяно», – поладсь сон.
Ансамблянть репертуарсо ней – кезэрень ды чуросто вастневиця морот. Сынст ютксо сетнеяк, конат умок уш емавтозь лия регионтнэсэ. Ольга Зоткина тешксты, моротне тонавтневсть марямга, сеть васенце сермадовкстнэнь вельде, конат ванстовсть, васенце составонь артисткатнень морамост вельде.
Ансамблянь ветицясь тешксты, теньсэ истя жо улить башка стакачить. Истят вайгельть, кода коллективень васенце участницатнень, уш арасть, кода арась се тембраськак. Тень лангс апак вано, аватне домкасто важодить вайгелень путоманть лангсо, штобу седе малавгадомс эталононтень.
«Яксарочкань» моротне малав весе максневсть вейкестэ омбоцентень. Технологиятнень касомаст-виевгадомаст марто эште удалась сермадомс кой-кона композициятнень, конатнень морынзе коллективень васенце составось. Артисткатнень кенярдовты, ней эште эрить сеть сырькайтне, конатнень ули виест морамс, витемс лувсонть авидечитнень.
«Ульнесть свадьбань мороткак. Ансяк, свадьбань койтне минек велесэ меельцеде ютавтовсть, паряк, монь свадьбасо. Кодат-бути пелькст кадовить, ансяк малав весемесь стувтови. Икеле те ульнесь театрализованной невтема. Сонсь свадьбась мольсь кавто недлят. Те ульнесь покш цикла. Мельспаро се, башка енкстнэ вельмевтевить. Невтемакс, зярдо одирьвась наряжи, максови баславамо ды лиятне», – евтнесь Ольга Зоткина.
Сон поладызе, икеле коллективесь свадьбаваяк яксиль морсеме. Ней а тердтнить. А уш бути тердема сы, артисткатне мельспаросо молить ды невтьсызь пряст.
«Яксарочка» ансамблянь эрьва моросонть ули домка арсема, конась маряви кунсолыцянтень аволь ансяк текстсэ, истя жо ламо вайгельсэ, тембрасо, интонациясо.
«Эряви эште оймеськак, конань ансамблясь путы моронтень. Сон вайгелень пачк юты ваныцянтень. Ней эсь выступлениятнесэ бажатано пачтямс арсеманть: а эрявить стувтнемс эсь ундокстнэнь. Моротне кардыть, тонавтыть. А раськень моротне – те кода сыре ломантнень пельде урокт», – тешкстась Ольга Зоткина.
Коллективенть репертуарсонзо аволь ансяк эрзянь ды мокшонь, улить рузонь мороткак. Артисткатне поладыть пурнамо фольклор, тонавтнеме од композицият.
«Минь весе – Россиясо эрицят, кирдтяно ялгаксчи весе раськетнень марто. Минь эрятано вейке масторсо ды тонавтнетяно лия раськетнень культураст. Бажатано тонавтнемс татаронь моронтькак, ансяк зярс те миненек стакасто максови», – мизолды Ольга Зоткина.
«Яксарочкань» артисткатнень эрьва оршамопелесь лиятнень енов а молиця. Истямо масторлангсонть алкукс арась, кортыть артисткатне. Васня оршамопельтнень стась васенце составонь ава. Викшнеманть лангсо важодсь Ольга Зоткинань авазо.
Эрьва оршамопелесь теезь эрзянь ды мокшонь культурань койтнесэ, сырькайтнень евтнемаст коряс. Оршамосонть тевс нолдазь кезэрень материалт, панкст ды лия элементт. Коцтось алкуксонь, секскак оршамопельтнесэ аволь пси кизна ды аволь якшамо сексня.
Ольга Зоткина тешкстась, викшневксэськак канды башка информация. Ашось невти ваньксчи, якстересь – чипай, раужось – мода, ды седе тов.
Оршамопелентень поладксокс аштить пряс путоматне ды мазылгавтомкатне.
«Эрьва аванть улест мазылгавтомапелензэ, эрьгензэ… Кода кортыть, эрзянь-мокшонь аванть васня марясак, мейле несак. Сон мазылгавтомапельтнесэ гайги, секс васолдо маряви», – евтнесь Ольга Зоткина.
Од ломантне, «Яксарочканть» шкинеманзо марто вастовозь, пачтить сынст моротнень лиятненень. Вана истя коллективенть моронзо срадсть Россиянть келес. Вейке студентэсь сась велев фольклоронь пурнамо, мейле евтнесь теде Сибирьсэ, омбоцесь «Яксарочканть» шкинеманзо невтизе Московсо.
«Те пек паро! Паро, зярдо морыть минек велень моротнень, эрзянь ды мокшонь раськень моротнень, – корты Ольга Зоткина. – Минь весементь тейтяно, штобу эсь тевентень совавтомс од ломантнень. Эйкакшонокак, нуцьканокак мартонок лиясто морсить. Ней вана коллективенек каштанчизэ – мартонок од морыцясь Алексей Аторин. Сонензэ 16 иеть, ошсто тенек сакшны. Леша бажи молемс тонавтнеме Пензань искусствань колледжев. Лангозонзо покш кемема. Эряви анокстамс тевенек поладыцят, конат минек ладсо кармить ванстомо раськенек сюпав культуранть».
Юлия Еремина
Фототне «Яксарочка» ансамблянть.