1941-1945 иетнень Ине Отечественной войнась ловови сехте ламо верень валовтыцякс. Сон кандсь покштояк покш зыян масторлангонь весе ломантненень. 1941 иень июнень 22-це чистэ войнась, теке виев давол, апак учне копачакшнызе сэтьме эрямонть, янгинзе эрицятнень уцяскаст ды свалшкас кадовсь стака ледстнемакс.
Арасель вейкеяк семия, кинь бу аволизе тока войнась. Ятонть каршо тюреме саезельть весе, кить вийсэст ульнесть кандомс лезэ Якстере Армиянтень. Тылсэяк малавгавтсть изнямонть, важодсть вишкинетнестэ саезь сыре атятнес-бабатнес…
Монь ули мелем ёвтнемс Ине Отечественной войнань ветерандонть Сорокин Михаил Ивановичте, кона эрясь минек ошсо. Отставкасо авиациянь капитанось войнань шкасто изнявкстнэнь кис казезель ламодояк ламо казнесэ. Теде башка, Михаил Ивановичень ульнесть антигитлеровской коалициянь, конань ушмонзо вейсэ Якстере Армиянть марто тапасть фашистэнь яттнэнь, командованиянть пельде боевой награданзо.
Тешкстаса, Ине Отечественной войнанть молема шкастонть боевой казнесэ казевсть ансяк сехте а пелиця воинтнэ, конатне тиринь масторонть идемга эсь эрямост апак вансто кайсевкшнесть яттнэнь лангс.
Минек ёнкссо чачозесь Сорокин Михаил Иванович самай истятнэнь юткстоль. Свал ульнесь лиятненень мужествань ды апелемачинь коряс примерэкс.
М. И. Сорокин чачсь 1923 иень июльстэ Сыре Шайговань райононь Николаевка велесэ. Якстере Армияв Саранскоень РВК-сь саекшнизе 1940 иень декабрясто. Ульнесь лётчикекс.
Боевой важодеманзо Михаил Иванович ушодызе 1944 иень июлень 15-це чистэ Украинской васенце фронтонь ушмотнесэ. Теке иень июльстэ саезь октябряс тейнесь 24 боевой ливтнемат, конатнень шкасто маштсь ламо ятт ды тапась сынст техника. Бойсэ прянзо ветясь а пелицякс. Вадрясто содылизе эсь оружиянзо ды тевень содазь эйсэнзэ нолдась тюремстэ. Менельсэ аволь весть ятонь самолёттнэ каявкшность сонзэ лангскак. Комсьнилеексть ливтямотнень перть яжась 2 танкт, 12 автомашинат, боеприпас марто 2 складт, маштсь ятонь 50 солдатт ды офицерт.
Апелемачинть кис, конань сон невтизе 24-ксть ливтямотнень шкасто, казевсь правительственной наградасо – Отечественной войнань II степенень орденсэ. Те ульнесь 1944 иень октябрянь 1-це чистэ. А уш теке жо иень октябрянь 20-це чистэ сонензэ максозель Якстере Тештень орденэсь.
Тиринь масторонтень вечкеманть сон кемекстась яттнэнь каршо виень ды эрямонь апак вансто тюремасонть. Якстере Тештень орденсэ каземадо мейле эсь боевой тевензэ поладызе седе товгак. Сон тейсь 22 ливтямот, конатнень пингстэ тапась вейке танк, вейке бронетранспортёр, ятонь солдат марто вейксэ автомашинат ды лия техника.
1944 иень декабрянь 12-це чистэ Словакиянь Сланчик районсонть ятонь техниканть ды ушмотнень лангс штурмовой каявомасонть, зенитной артиллериянь виев толонть лангс апак вано, М.И. Сорокин тейсь кото ливтямот, тень пингстэ таго яжась ламо техника ды маштсь ятонь солдатт ды офицерт. Заданиянть парсте топавтоманть кис группантень яволявтозель благодарность.
1945 иень январень 12-це чистэ Мольдава районсонть штурмовой каявомань шкастонть Михаил Сорокинэнь самолётонзо кирвазтекшнизе ятонь зенитной артиллериясь. Сонсь пряс ранявкшнось, ансяк, тень лангс апак вано, поладсь топавтомо максозь заданиянть. Леднемапельтнень прядовомадо мейле парсте озавтызе яжазь самолётонзо эсь аэродромс.
22-ксть ливтямотнесэ невтезь апелемачинть ды мужестванть кис Правительстванть кармавтоманзо коряс 1945 иень январень 17-це чистэ М. И. Сорокин казезель «Якстере Знамя» орденсэ. Те орденсэнть сон казезель эштё зярыяксть.
Ине Отечественной войнанть прядовомадо мейле, 1946 иестэ саезь 1949 иес, Михаил Сорокин службанзо поладызе Прикарпатиянь военной округсо 206 штурмовой авиадивизиянь 783 штурмовой авиаполконь старшей лётчикекс. 1949 иестэ кармась важодеме Московонь военной округсо старшей лётчикекс 526 штурмовой Запорожской авиадивизиянь 816 гвардейской штурмовой авиаполконь звенань командирэкс.
1958 иень июньстэ саезь Михаил Иванович Сорокин сась эрямо Саранскоев, важодсь «Электровыпрямитель» заводсо. Тесэ сон роботась 30 иеде ламо. 1998 иестэ тусь пенсияс. Сыредезь, Михаил Иванович пек сеедьстэ ледстнесь менельденть, эсь боевой ялгатнеде ды, нама, войнань кажодонть…
Зярдояк а стувтовить сеть ломантне, конатне, виень, шумбрачинь, эрямонь апак вансто, ютасть пек стака ки, тейсть покштояк покш тев – олякстомтызь минек масторонть яттнэде. Неень шкасто минь эрятано сэтьме эрямосо, ды зярдояк а стувтсынек геройтнень, конатне ванстымизь минек фашизмадонть!
Анокстызе Н. Уткина,
1941-1945 иетнень войнань ды трудонь подвигень
мемориальной музеень важодиця.
(Тевс нолдазель «Подвиг народа» сайтэсь).