Эрзянь мастор, раськень вечкевикс ёнкс! Зяро тон эсеть модат лангсо трить-кастыть паро ломанть, конатне весе эрямост перть, косо бу авольть эря ды авольть важоде, эсест мельга свал кадыть ламо паро тевть.
«Эрзянь правда» газетань инжесь – Владислав Андреевич Догоров.
Те ломаненть Мордовиясо ламот содасызь ды свал мельспаросо кувалманзо аштить эсензэ раськензэ, оянзо-ялганзо, весе сеть ломантне, конатнень марто тензэ савкшнось важодемс, вастневемс.
Владислав Андреевич эрямонзо алтызе Рузаевкань муниципальной райононтень, косо важодсь ламо иеть. Секскак районсонть те ломанесь пек содавикс. Сон – важодемань вечкиця, ёроков, эсензэ тевензэ содыця, ломанень кис мелявтыця. Владислав Андреевич стака 90-це иетнестэ Рузаевкань райононь ломантнень марто вейсэ кепедсь удалов кадовиця совхозтнэнь, парсте ветясь райононь тевтнень…
УШОДКСОСЬ САЕВИ ТИРИНЬ ЁНКССТО…
Покш Березникень район, Парынзэле… 1949 иень сундерьковонь 20-це чистэ Андрей Фёдорович ды Александра Спиридоновна Догоровтнень семиясо чачсь цёра, конань лемдизь Славакс. Цёрынесь кассь Нина ды Валя кавто сазоронзо ютксо превеекс, кунсолыцякс, ёроковокс. Тетязо, Андрей Фёдорович, важодсь школасо математикань тонавтыцякс, авазо, Александра Спиридоновна – вишка классонь тонавтыцякс. Сынь содасть ды вечксть вейкест-вейкест эштё войнадо икеле, секскак войнадо мейле, 1946 иестэ, венчасть-урьвакстсть. Мирдть-нить трясть-кастсть колмо эйкакшт: кавто тейтерть (Нина, Валя) ды Слава цёраст. Кувать кецямс эйкакшонзо перька тетянтень эзь саво – сон кулось. Нать, войнань шкань кадовозь томбавоматне ды сэредькстнэ ковгак васов эзть туе. Славанень сестэ ульнесть ансяк кемень иеть. Кудоютконь стака тевтне кадовсть аванзо, сазоронзо ды Славань лангс. Аванзо туртов сон ульнесь васенце лездыцякс, цёрань тевтнень теицякс. Слава рана покшолгадсь ды кармась седе домкасто весементь чарькодеме ды эрьва тевсэ аванстэнь лездамо. Авазо, Александра Спиридоновна, эрясь кувака пинге – сядо иеть.
1966 иестэ Владислав парсте прядызе Парынзэлень средней школанть ды секе иестэнть кармась тонавтнеме Куйбышевань Велень хозяйствань институтонь агрономиянь факультетсэ. 1972 иестэ, институтонть прядомадо мейле, кучизь важодеме Брянской областень «Борятинский» покш совхозов. Тов туемадо икеле сон урьвакстсь, тосо Догоровтнень чачсь васенце цёраст – Сергей. Брянской областень велень хозяйствасонть од ломантнень тевест мольсть вадрясто, ансяк Владиславонь седеесь свал тердсь эсензэ тиринь ёнксов – Мордовияв.
МЕКЕВ ВЕЧКЕВИКС МОРДОВИЯВ
Кавто иень ютазь Догоровтне велявтсть Мордовияв. Владислав Андреевич зярыя шка важодсь «Ялга» хозяйствасонть прявт агрономокс, седе тов – Мордовия Республикань агрохимлабораториясо прявт агрохимикекс.
«Се шкане ялгам, Сергей Орлов агрохимикесь, курировась Рузаевкань райононть. Сон тердимим од тевсэ важодеме. Мон каршо эзинь моле. Вастовинь тосонь велень хозяйствань управлениянь прявтонть А.М. Панкратов марто, кортнинек-теинек, ды мерсь тень молемс важодеме Рузаевкань райононь «Шишкеевский» совхозов экономистэкс. Те хозяйствасонть важодинь малав вете иеть, монсь эштё заочна тонавтнинь Н.П. Огарёв лемсэ МГУ-нь экономической факультетсэ», – корты Владислав Андреевич.
Од ломаненть ёрокчинзэ ды роботамо бажамонзо редизь Рузаевкань горкомсо. Владислав, эрязасто ды превейстэ арсезь, совавтсь велень хозяйствас хозрасчёттнэнь. Аламо шкань ютазь сонзэ лия од ялгатнень марто кучизь тонавтнеме велень хозяйствань прявтонь важодемань тевентень Рузаевкань райононь икеле молиця хозяйстватнес, васня – Красное Сельцов (Гладилиннэнь), мейле Арх. Голицынав (Шиловнень).
«Ковонь ютазь тердимим партиянь горкомов васенце секретаресь П.Н. Попов. Сон мерсь монень варчамс велень хозяйствань прявтонь тевенть топавтомо. 1981 иень эйзюрковсто саезь ушодынь важодеме «Хованщинский» совхозонь прявтокс. А мезть сёпомс, васня пек талнынь», – ледстни Владислав Андреевич Догоров.
Тосонь совхозсонть прявттнэ полавтневсть эрьва ие, хозяйствась пек лавшоль. Секс Владислав Андреевич тосонь хозяйстванть кепедеманть ушодсь весе одс. Ансяк сонсь содась, кодамо стакачи марто савкшнось тензэ вастневемс. Сон парсте чарькодсь, штобу ракшатнень кастомс, эрявить парсте андомс. Секскак велень хозяйствань прявтось васня ушодсь тикшень кастомастонть. Од прявтось апак кавтолдо вешсь лезкс райононь велень хозяйствань управлениянть пельде. «Хованщинский» совхозонтень сеске макссть техника ды минеральной удобреният. Уш омбоце иестэнть те хозяйствась пурнась кукурузань вадря урожай. Ракшатненень коромонть сатомга, ушодсть анокстамо силос, олго, ламо иень тикше. Зярыя шкань ютазь коромдонть анокстасть зняро, мик сонзэ кармасть ве ёнов миеме, штобу важодицятнень туртов идемс ярмакт.
«Минь вейсэ кастынек розь, пинеме, шуж, яровой товзюро, силосокс кукуруза, карминек топавтомо аравтлувонть. Строинек утомт, эрямо кудот, скалонь кардот, – ёвтни тенек Владислав Андреевич. – Карминек строямо столовой, эйдень кужо, ветямо эрьва кудос ведь, тееме китнень…»
Райононь прявттнэ таго редизь ды шнамо валсо тешкстызь од ломаненть вадрясто ушодозь тевенть. Ниле иень ютазь сонзэ таго кучсызь удалов кадовозь совхозонь кепедеме – Мокшонь Пишляв, Байкузов лемсэ совхозов.
«Байкузов лемсэ совхозось кандовсь «Мордовплодпром» трестэнтень. Тевтне тосо ульнесть пек стакат: скалтнэнь андомс а мейсэль, водопроводось эзь робота. Скалтнэнь симдемс веденть усксесть боцькасо. Тесэнь хозяйствасонть весе эрявсь теемс одс. Потявтовиця скалтнэде тосо ульнесть мик 600 прят. Таго тенек лездась велень хозяйствань управлениясь, – ледстни Владислав Андреевич. – Монсь ардтнинь шабра велень хозяйствантень, вешинь тикше вазтнэнь туртов. Эдь Байкузов лемсэ совхозсонть арасель мик олгояк! Сонзэ мельга савсь ардомс Арх. Голицынань совхозов. Сестэ олгонть прессовасть видьстэ паксясо, зярдо модась ульнесь эштё кельмезь, а мейле тракторсо усксть пресстнэнь Байкузов лемсэ совхозов. Эрявсь теемс олгонь запас, штобу коромось сатоволь седе кувать. Мокшонь Пишлясо истя жо эрявсь тенек ушодомс растениеводствасто. Мон тердинь хозяйствантень од специалистт: главной агроном, зоотехник ды управляющей. Карминек паксятнень видеме, шкастонзо вадрясто сокамо-изамо. Омбоце иестэнть уш саинек кукурузань вадря урожай ды ламо иень тикше. Урожайностенть гектарсто кастынек 22 центнерс. Кепединек ракшань трямонтькак. Велень хозяйствань управлениянть вельде тенек макссть племакс тёлкат. Весемезэ сюракшов ракшатнеде ульнесть 1700 прят, минь жо ламолгавтынек 2500 пряс. Те – потявтовиця колмо стадат! Теинек совхозсонть хозрасчёт, ушодынек соцсоревнованиятнень. Се шкане минек Байкузов лемсэ совхозонтень максозель РСФСР-нь Министрань Советэнь переходящей Якстере Знамясь. Колхозниктнень зарплататне истя жо касокшность. Монень, кода совхозонь директоронтень, пандсть 250 целковойть, трактористтнэнень ды комбайнёртнэнень вейке ковс малав 1000 целковойть!»
Байкузов лемсэ совхозсонть В.А. Догоров ульнесь прявтокс вете иеть. Те шкастонть тосо эсест важодицятнень туртов строясть кудот, панжсть медпункт, эйдень кужо, средней школань од здания. Теде башка, строясть од утомт, вазонь кардот, ракшань андомань таркат, тикшень костямонь ды ванстомань таркат, велень хозяйствань машинатнень туртов лембе гараж, асфальтонь ки, ушодсть ветямо газ.
«1990 иестэ райсоветэнь сессиясо партиянь горкомось монь кочкимим Рузаевкань райононь Депутатонь советэнь исполкомонь прявтокс. Се шкастонть тевтне совхозсонть мольсть вадрясто, тосонь ломантненень тонадокшнынь ды сыньгак монень, секскак туемс тосто мелем арасель, ансяк кандидатурам кочкизь малав весе депутаттнэ, – ёвтни Владислав Андреевич. – 1992 иестэ саезь 2000 иес важодинь Рузаевкань райононь Администрациянь прявтокс. Шкась сестэ ульнесь аволь шожда, зарплататнень ды пенсиятнень ломантнень туртов шкастонзо эзть максо, савкшнось тенст учнемс ниле-вете ковт. Эрьва чистэ ардтнинек велетнева, вастневинек ломантнень марто, седейшкава мартост кортнинек, оймавтынек эйсэст ды кемевтинек, весе те стака шкась курок юты. Райононь велень хозяйствань предприятиятне кучсть эсест средстватнень школатненень, эйдень кужотненень, штобу тонавтыцятненень ды воспитательтненень получамс эсест зарплатаст. Теде башка, важодицятнень туртов ярмаконь таркас макснильть ярсамопельть: сывель, ловсо, товзюро… Весе се шкань стакачитнень лангс апак вано, Рузаевкань райононь велетнева вейкеяк школа, эйдень кужо, Культурань кудо ды ФАП эзь пекставкшно! Минь кода-бути весе вейсэ лисевинек неть стака шкатнестэ…»
2000 иень кочкамотнестэ В.А. Догоров пштистэ аравтызе кевкстеманть, штобу вейсэндямс райононть ды ошонть. Ды уш теке иень якшамковонь 28-це чистэ Рузаевка ошось ды Рузаевкань районось вейсэндявсть вейке административно-территориальной вейсэндявксос – Рузаевкань муниципальной образованияс. Васенце вейсэндявозь ошонь ды райононь народной Депутатонь советэнь сессиястонть Рузаевкань МО-нь прявтокс кочказель А.Н. Старцев.
2000 иестэ В.А. Догоровонь, кода МР-нь Государственной Собраниянь депутатонть, кочкизь Аграрной кевкстематнень коряс комитетэнь прявтокс.
Ниле иень ютазь сон таго велявтсь Рузаевкав, тесэ кармась важодеме МР-нь Рузаевкань районга РФ-нь Финансонь министерствань Федеральной казначействань отделениянь прявтокс.
Ней Владислав Андреевич пенсиясо. Сынь вейсэ козяйканзо Антонина Ивановна марто важодить кудоютксо, садпиресэст. Теде башка, Антонина Ивановна касты эрьва кодат чаень тикшеть: мята, мелисса, календула, душица ды лият. Телень якшамо читнестэ пурнавкшныть эйкакшост ды нуцькаст марто ды симить тикшень тантей чайде.
Владислав Андреевич ды Антонина Ивановна трясть-кастсть ды кеместэ стявтызь пильге лангс кавто цёраст – Сергеень ды Андреень. Ней Владислав Андреевичень ды Антонина Ивановнань ниле нуцькаст.
Владислав Андреевич парсте важодеманзо кис казезь ламо шнамонь конёвсо ды сюконямонь сёрмасо, ютксост: Мордовия Республикань Госсобраниянь ды Правительствань, сонензэ максозь «Заслуженный работник сельского хозяйства Республики Мордовия» покш лемесь.
Сундерьковонь 20-це чистэ В.А. Догоров тешкстызе чачома чинзэ.
Владислав Андреевич, арсетяно Тенк шумбрачи ды уцяска, кувака пинге ды паро ёжо! Кецядо эрьва чинтень, кадык седейсэнк свал эри кеняркс!
Мила БОГАТОВА
Владислав Андреевич эрямонзо алтызе Рузаевкань муниципальной райононтень, косо важодсь ламо иеть. Секскак районсонть те ломанесь пек содавикс. Сон – важодемань вечкиця, ёроков, эсензэ тевензэ содыця, ломанень кис мелявтыця. Владислав Андреевич стака 90-це иетнестэ Рузаевкань райононь ломантнень марто вейсэ кепедсь удалов кадовиця совхозтнэнь, парсте ветясь райононь тевтнень…
УШОДКСОСЬ САЕВИ ТИРИНЬ ЁНКССТО…
Покш Березникень район, Парынзэле… 1949 иень сундерьковонь 20-це чистэ Андрей Фёдорович ды Александра Спиридоновна Догоровтнень семиясо чачсь цёра, конань лемдизь Славакс. Цёрынесь кассь Нина ды Валя кавто сазоронзо ютксо превеекс, кунсолыцякс, ёроковокс. Тетязо, Андрей Фёдорович, важодсь школасо математикань тонавтыцякс, авазо, Александра Спиридоновна – вишка классонь тонавтыцякс. Сынь содасть ды вечксть вейкест-вейкест эштё войнадо икеле, секскак войнадо мейле, 1946 иестэ, венчасть-урьвакстсть. Мирдть-нить трясть-кастсть колмо эйкакшт: кавто тейтерть (Нина, Валя) ды Слава цёраст. Кувать кецямс эйкакшонзо перька тетянтень эзь саво – сон кулось. Нать, войнань шкань кадовозь томбавоматне ды сэредькстнэ ковгак васов эзть туе. Славанень сестэ ульнесть ансяк кемень иеть. Кудоютконь стака тевтне кадовсть аванзо, сазоронзо ды Славань лангс. Аванзо туртов сон ульнесь васенце лездыцякс, цёрань тевтнень теицякс. Слава рана покшолгадсь ды кармась седе домкасто весементь чарькодеме ды эрьва тевсэ аванстэнь лездамо. Авазо, Александра Спиридоновна, эрясь кувака пинге – сядо иеть.
1966 иестэ Владислав парсте прядызе Парынзэлень средней школанть ды секе иестэнть кармась тонавтнеме Куйбышевань Велень хозяйствань институтонь агрономиянь факультетсэ. 1972 иестэ, институтонть прядомадо мейле, кучизь важодеме Брянской областень «Борятинский» покш совхозов. Тов туемадо икеле сон урьвакстсь, тосо Догоровтнень чачсь васенце цёраст – Сергей. Брянской областень велень хозяйствасонть од ломантнень тевест мольсть вадрясто, ансяк Владиславонь седеесь свал тердсь эсензэ тиринь ёнксов – Мордовияв.
МЕКЕВ ВЕЧКЕВИКС МОРДОВИЯВ
Кавто иень ютазь Догоровтне велявтсть Мордовияв. Владислав Андреевич зярыя шка важодсь «Ялга» хозяйствасонть прявт агрономокс, седе тов – Мордовия Республикань агрохимлабораториясо прявт агрохимикекс.
«Се шкане ялгам, Сергей Орлов агрохимикесь, курировась Рузаевкань райононть. Сон тердимим од тевсэ важодеме. Мон каршо эзинь моле. Вастовинь тосонь велень хозяйствань управлениянь прявтонть А.М. Панкратов марто, кортнинек-теинек, ды мерсь тень молемс важодеме Рузаевкань райононь «Шишкеевский» совхозов экономистэкс. Те хозяйствасонть важодинь малав вете иеть, монсь эштё заочна тонавтнинь Н.П. Огарёв лемсэ МГУ-нь экономической факультетсэ», – корты Владислав Андреевич.
Од ломаненть ёрокчинзэ ды роботамо бажамонзо редизь Рузаевкань горкомсо. Владислав, эрязасто ды превейстэ арсезь, совавтсь велень хозяйствас хозрасчёттнэнь. Аламо шкань ютазь сонзэ лия од ялгатнень марто кучизь тонавтнеме велень хозяйствань прявтонь важодемань тевентень Рузаевкань райононь икеле молиця хозяйстватнес, васня – Красное Сельцов (Гладилиннэнь), мейле Арх. Голицынав (Шиловнень).
«Ковонь ютазь тердимим партиянь горкомов васенце секретаресь П.Н. Попов. Сон мерсь монень варчамс велень хозяйствань прявтонь тевенть топавтомо. 1981 иень эйзюрковсто саезь ушодынь важодеме «Хованщинский» совхозонь прявтокс. А мезть сёпомс, васня пек талнынь», – ледстни Владислав Андреевич Догоров.
Тосонь совхозсонть прявттнэ полавтневсть эрьва ие, хозяйствась пек лавшоль. Секс Владислав Андреевич тосонь хозяйстванть кепедеманть ушодсь весе одс. Ансяк сонсь содась, кодамо стакачи марто савкшнось тензэ вастневемс. Сон парсте чарькодсь, штобу ракшатнень кастомс, эрявить парсте андомс. Секскак велень хозяйствань прявтось васня ушодсь тикшень кастомастонть. Од прявтось апак кавтолдо вешсь лезкс райононь велень хозяйствань управлениянть пельде. «Хованщинский» совхозонтень сеске макссть техника ды минеральной удобреният. Уш омбоце иестэнть те хозяйствась пурнась кукурузань вадря урожай. Ракшатненень коромонть сатомга, ушодсть анокстамо силос, олго, ламо иень тикше. Зярыя шкань ютазь коромдонть анокстасть зняро, мик сонзэ кармасть ве ёнов миеме, штобу важодицятнень туртов идемс ярмакт.
«Минь вейсэ кастынек розь, пинеме, шуж, яровой товзюро, силосокс кукуруза, карминек топавтомо аравтлувонть. Строинек утомт, эрямо кудот, скалонь кардот, – ёвтни тенек Владислав Андреевич. – Карминек строямо столовой, эйдень кужо, ветямо эрьва кудос ведь, тееме китнень…»
Райононь прявттнэ таго редизь ды шнамо валсо тешкстызь од ломаненть вадрясто ушодозь тевенть. Ниле иень ютазь сонзэ таго кучсызь удалов кадовозь совхозонь кепедеме – Мокшонь Пишляв, Байкузов лемсэ совхозов.
«Байкузов лемсэ совхозось кандовсь «Мордовплодпром» трестэнтень. Тевтне тосо ульнесть пек стакат: скалтнэнь андомс а мейсэль, водопроводось эзь робота. Скалтнэнь симдемс веденть усксесть боцькасо. Тесэнь хозяйствасонть весе эрявсь теемс одс. Потявтовиця скалтнэде тосо ульнесть мик 600 прят. Таго тенек лездась велень хозяйствань управлениясь, – ледстни Владислав Андреевич. – Монсь ардтнинь шабра велень хозяйствантень, вешинь тикше вазтнэнь туртов. Эдь Байкузов лемсэ совхозсонть арасель мик олгояк! Сонзэ мельга савсь ардомс Арх. Голицынань совхозов. Сестэ олгонть прессовасть видьстэ паксясо, зярдо модась ульнесь эштё кельмезь, а мейле тракторсо усксть пресстнэнь Байкузов лемсэ совхозов. Эрявсь теемс олгонь запас, штобу коромось сатоволь седе кувать. Мокшонь Пишлясо истя жо эрявсь тенек ушодомс растениеводствасто. Мон тердинь хозяйствантень од специалистт: главной агроном, зоотехник ды управляющей. Карминек паксятнень видеме, шкастонзо вадрясто сокамо-изамо. Омбоце иестэнть уш саинек кукурузань вадря урожай ды ламо иень тикше. Урожайностенть гектарсто кастынек 22 центнерс. Кепединек ракшань трямонтькак. Велень хозяйствань управлениянть вельде тенек макссть племакс тёлкат. Весемезэ сюракшов ракшатнеде ульнесть 1700 прят, минь жо ламолгавтынек 2500 пряс. Те – потявтовиця колмо стадат! Теинек совхозсонть хозрасчёт, ушодынек соцсоревнованиятнень. Се шкане минек Байкузов лемсэ совхозонтень максозель РСФСР-нь Министрань Советэнь переходящей Якстере Знамясь. Колхозниктнень зарплататне истя жо касокшность. Монень, кода совхозонь директоронтень, пандсть 250 целковойть, трактористтнэнень ды комбайнёртнэнень вейке ковс малав 1000 целковойть!»
Байкузов лемсэ совхозсонть В.А. Догоров ульнесь прявтокс вете иеть. Те шкастонть тосо эсест важодицятнень туртов строясть кудот, панжсть медпункт, эйдень кужо, средней школань од здания. Теде башка, строясть од утомт, вазонь кардот, ракшань андомань таркат, тикшень костямонь ды ванстомань таркат, велень хозяйствань машинатнень туртов лембе гараж, асфальтонь ки, ушодсть ветямо газ.
«1990 иестэ райсоветэнь сессиясо партиянь горкомось монь кочкимим Рузаевкань райононь Депутатонь советэнь исполкомонь прявтокс. Се шкастонть тевтне совхозсонть мольсть вадрясто, тосонь ломантненень тонадокшнынь ды сыньгак монень, секскак туемс тосто мелем арасель, ансяк кандидатурам кочкизь малав весе депутаттнэ, – ёвтни Владислав Андреевич. – 1992 иестэ саезь 2000 иес важодинь Рузаевкань райононь Администрациянь прявтокс. Шкась сестэ ульнесь аволь шожда, зарплататнень ды пенсиятнень ломантнень туртов шкастонзо эзть максо, савкшнось тенст учнемс ниле-вете ковт. Эрьва чистэ ардтнинек велетнева, вастневинек ломантнень марто, седейшкава мартост кортнинек, оймавтынек эйсэст ды кемевтинек, весе те стака шкась курок юты. Райононь велень хозяйствань предприятиятне кучсть эсест средстватнень школатненень, эйдень кужотненень, штобу тонавтыцятненень ды воспитательтненень получамс эсест зарплатаст. Теде башка, важодицятнень туртов ярмаконь таркас макснильть ярсамопельть: сывель, ловсо, товзюро… Весе се шкань стакачитнень лангс апак вано, Рузаевкань райононь велетнева вейкеяк школа, эйдень кужо, Культурань кудо ды ФАП эзь пекставкшно! Минь кода-бути весе вейсэ лисевинек неть стака шкатнестэ…»
2000 иень кочкамотнестэ В.А. Догоров пштистэ аравтызе кевкстеманть, штобу вейсэндямс райононть ды ошонть. Ды уш теке иень якшамковонь 28-це чистэ Рузаевка ошось ды Рузаевкань районось вейсэндявсть вейке административно-территориальной вейсэндявксос – Рузаевкань муниципальной образованияс. Васенце вейсэндявозь ошонь ды райононь народной Депутатонь советэнь сессиястонть Рузаевкань МО-нь прявтокс кочказель А.Н. Старцев.
2000 иестэ В.А. Догоровонь, кода МР-нь Государственной Собраниянь депутатонть, кочкизь Аграрной кевкстематнень коряс комитетэнь прявтокс.
Ниле иень ютазь сон таго велявтсь Рузаевкав, тесэ кармась важодеме МР-нь Рузаевкань районга РФ-нь Финансонь министерствань Федеральной казначействань отделениянь прявтокс.
Ней Владислав Андреевич пенсиясо. Сынь вейсэ козяйканзо Антонина Ивановна марто важодить кудоютксо, садпиресэст. Теде башка, Антонина Ивановна касты эрьва кодат чаень тикшеть: мята, мелисса, календула, душица ды лият. Телень якшамо читнестэ пурнавкшныть эйкакшост ды нуцькаст марто ды симить тикшень тантей чайде.
Владислав Андреевич ды Антонина Ивановна трясть-кастсть ды кеместэ стявтызь пильге лангс кавто цёраст – Сергеень ды Андреень. Ней Владислав Андреевичень ды Антонина Ивановнань ниле нуцькаст.
Владислав Андреевич парсте важодеманзо кис казезь ламо шнамонь конёвсо ды сюконямонь сёрмасо, ютксост: Мордовия Республикань Госсобраниянь ды Правительствань, сонензэ максозь «Заслуженный работник сельского хозяйства Республики Мордовия» покш лемесь.
Сундерьковонь 20-це чистэ В.А. Догоров тешкстызе чачома чинзэ.
Владислав Андреевич, арсетяно Тенк шумбрачи ды уцяска, кувака пинге ды паро ёжо! Кецядо эрьва чинтень, кадык седейсэнк свал эри кеняркс!
Мила БОГАТОВА