Четверг, марта 28, 2024
Важное


Икелень шкане жо эрзянь аватненень неть тевтнень теемстэ пек стакаль. Семиятне покшольть, муськематнеде пек ламольть. Эрьва семиянть ульнесь эсензэ муськема чизэ, ансяк сынь зярдояк эзть муськене недлячистэ эли православной ине читнестэ. Банясояк эрзятне зярдояк эзть муськене, ансяк бути кудыкеле. Сехте рудазов понкстнэнь-панартнэнь васняяк пештилизь лакиведь марто очкос, козонь каильть кулов. Истя теевиль щёлок. Пек кезэрень шкатнестэ эдь сапонтькак арасельть. Седе шождаль муськемась кизна. Сестэ аватне ды од тейтертне лисильть муськеме эрьке чирес, мартост саильть валёк. Те чувтосто керязь кундамо марто лаз пе, конасонть муськематне чавовильть эрьва ёндо. А ёмавтомга сон сеедьстэ мазылгавтовиль парсейсэ.

Цёратне вечкевикс тейтерест туртов яла казильть эсь кедьсэ теезь валёк, пеельсэ-уросо керсильть лангозонзо эрьва кодат мазый тешкст: чипай, нармунь, чувто. Муськематнесэ эштё весть чавильть рубеленть ланга. Неть истят жо чувтонь кувака кедьёнкст, молильть валёк ёнов, ансяк ве ёнксось эйсэст керсевиль зубцасо. Анокставильть сынь кеме чувтонь лазсто: тумонь, килеень, поень. Муськемась каявиль ведь марто очкос, тозонь стявтовиль рубелесь ды панарось зярыяксть мекев-васов ютавтовиль рубелень шержей таркаванть. Рудазось истя седе валгиль ведентень. Рубельсэнть азораватне нулатнень валакавтыльтькак – невтемакс, летьке пацянть тапарилизь скалка лангс ды мекев-васов ардтневтилизь столь ланга ды эштё парсте чавилизь рубельсэ. Тевесь пек стакаль, секскак эрявсь аватнень пельде кеме шумбрачи ды ламо вийть.

Кшнинь утюгтнень самодо мейле оршамопельтнень валакавтомань тевесь а пек шождалгадсь. Велетнесэ сон ульнесь ансяк сюпав семиятнесэ. Веенст утюгтне теевильть целанек кшнинь (чугунонь) пельксстэ, конантень кузнецтне педявтыльть кирдемка. Те утюгонть сталмозо, кода кортыть, пондошкаль. Сехте вишкинесь 2,5 килограммат, сехте покшось, конасонть валакавтсть стыцятне, пачкодиль 12 килограммас. Сон калявиль каштомосо, мейле таргавиль, саевиль варьгасо эли кедькирдемась ламоксть тапардавиль нуласо-валасо. Ульнесть эштё истят, конатне теевильть потмо марто, козонь каявильть каштомосто уголият. Утюгось варя мартоль, уголиятнень эрявсь секе-тев пувсемс ды ваномс, кабу а правтомс ды эсь прянть а иредстемс. Кой-кона утюгтнень потс каявиль калязь кшни пелькскак. Вана ней арседе, зярдо аватне эрясть седе шождасто, ней эли ютазь пингетнестэ?
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».