Пятница, марта 29, 2024
Важное

Те статьясонть минь ванносынек, кода кочкамс алкуксонь ды лезэв меденть. Мезе жо истямось алкуксонь медесь? Те – нола (нектар), конань мекштне пурныть цецятнестэ, тикшетнестэ ды теить сонзэ медекс. Теке марто мекштнень а мереви андомс сахаронь сиропто. Течи можна рамамс «медь» лементь ало продукта, конань теемасо мекштне арасельть, конась теезь неень шкань технологиятнень тевс нолдазь. Теемс истямо меденть шожда, ансяк вана лезэвчи эйстэнзэ илядо учо.

Мекшень кирдемась – тевесь а шожда. Меденть саемга аламо теемс нешкекудот ды рамамс мекшень семият. Медень пурнамонь покшолматне аштить сень эйстэяк, кодамо пертьпельксэсь – пиземетне, варматне ды коське шкась – берянь тев. Медень максыця аламо цецятнень ды тикшетнень, мекшень лавшо семиятнень кувалма ламо медь а пурнат. Бути иесь эзь удала, пурназь медесь саты бути ансяк эстест мекштненень теленть ютавтомга. Ды, эряви меремс, ансяк нешкень кирдийтнень ёрокчись ды опытэсь лездыть лезэв ды вадря продуктанть саемасо. 

Медень ёнкстнэ

Медесь явови кавто ёнкска: цецянь ды падевой. Цецянь медесь тееви нектарсто, конань мекштне пурныть цецятнестэ. Куш кодамо медесь – донникенсесь, тикшенсесь, чиньжарамонсесь, ликшансесь ды лиятне лововить цецянь медекс.

Падевой медесь вастневи седе сеедьстэ. Сон пурнави унжинетнестэ, конат максыть ламбамо соконть (чувтоунжатне). Истя жо сон пурнави зярыя чувтотнень пургондавкстнэстэ (пештень, тумонь, сиртень, укшторонь, умарень), конат явить соконть. Падевой меденть танстезэ явови, сон сэпшть-мери. Тюсонь коряс седе чопода, лиясто натой раужо.

Седе тов минь ванносынек цецянь меденть, эдь сон вастневи седе сеедьстэ. 

Меденть лезэвчизэ

Витаминтнэ ды микроэлементтнэ, конат совить сонзэ лувс, лездыть шумбрачинь ванстомантень. Меденть улить бактериянь а нолдамонь ёнксонзо, сон вадрялгавты сюлотнень важодеманть ды ламо лия лезэвчинзэ.

Алкуксонь меденть тюсозо эрси кода овсе валдо, истя чопода-тюжа, те ашти медень максыця касовксонть эйстэ. Седе чопода медьсэнть минеральной ды лия лезэв веществатнеде кирдевить седе ламо.

Нектарсонть эфирэнь ойтнень кирдемадонть медень эрьва сортонть эсензэ чинезэ. Теке шкасто обедъёнксонь регионтнэстэ пурназь меденть чинезэ седе марявикс северэнсетнень коряс. Теке марто медесь явови сеньсэяк, кодамо шкасто ды таркасто сон пурназь, ды натой мекштнень породанть коряскак, конат сонзэ пурнызь.

Медесь 80 % ашти сахарсто – глюкозасто ды фруктозасто, кадовозь пельксэсь – ведь, минеральной веществат, ферментт, аминокислотат. Сень коряс, мекс сахарось медьсэнть кирдеви простой формасо, сон шождасто саеви организмантень. Истя, меденть лангс минек организмась энергия а ютавты.

Медесь эрси вецана, тусто, сахарыязь. Ламот сорттнэ ванстома шканть перть полавтыть эсь тюсонть ды тусточинть. Те тевесь лемдеви кристаллизациякс, конась кодаяк а полавты лезэвчитнень. Кристаллизациясь – те глюкозанть кристаллкс теевема. Фруктозась жо кристаллкс а тееви. Секскак, бути медьсэнть ламо глюкоза, сон седеяк куроксто тустоми. Невтемга, чиньжарамонь медесь тустоми малав сеске пурнамодо мейле, а вана ашо акациянсесь вецана тундос. Медень сорттнэнь юткс, конат тустомить седе куроксто, кандовить чиньжарамонсесь, рапсонсесь ды конась пурназь крестоцветтнэстэ. Седе кувать а тустомить – кипреень ды ашо акациянь. А вана аволь алкуксонь медесь а тустоми овсе.

Теде башка, мельсэ кирдема сеньгак, бути медесь ванстови лембе таркасо, сон седе кувать а тустоми, якшамосо жо – мекевлангт.

Седе ламо медесь, кона неень шкане микшневи ярмункатнесэ, тееви Китайсэ ды ёвтави Алтаень, Башкириянь эли кодамояк лиякс. Пурнави истямо медесь субтропической зонасонть, косо пси ды начко. Мекштне эсь вийсэст а пачтясызь сонзэ эрявикс тустонтень, секскак мекшень кирдицятне саить пек вецана ды апак кенере меденть. Сень туртов, штобу а нолдамс медень чапаськадоманть, эйзэнзэ каить антибиотикть. Теке марто неень шкане тевс нолдавить манчемкатнеяк, зярдо меденть теить искусственна.

Сехте паро ёнксось вадря меденть рамамосо – рамамс сонзэ содавикс ломантнень кедьстэ, конат васенце таркас путыть аволь сюпалгадоманть, а вадря продуктань анокстамонть. Ансяк вана аволь эрьвань улить истят содавикс ломанензэ. 

Кода редяма меденть вадрячинзэ

Васняяк, медесь улезэ кенерезь. Седе мейле, кода нектарось пурнави, мекштне ушодыть важодеме лангсонзо оштё недляшка. Те шканть перть ливтеви аэрявикс начкось, сахартнэ теевить простойкс, медесь пештяви ферменттэ. Аволь видестэ теиця ломантне саить меденть шкадо икеле ды а учить кенереманть. Истямо медесь, эйсэнзэ ламо веденть кирдеманть коряс, ванстови беряньстэ, чапаськады ды ёмавты лезэвчинзэ.

Кенерезь медесь жо седе тусто, чуди суринекс. Саеде пенчс медь ды кармадо эйсэнзэ велявтнеме, медесь чудеме а карми – сон кенерсь. Апак кенере медесь а кирдеви пенчсэнть ды карми чудеме струясо эли жо петнямо.

Нама, медесь улезэ ламбамо. Сэпшть-мериця танстесь лади ансяк зярыя сорттнэнень. Медесь солы кургосо. Никстинк сонзэ, маринк чиненть. Сахар марто човорязь меденть чинезэ арась ды танстезэяк седе лавшо. Чапамо чине илязо уле, те корты чапаськадоманть ушодомадо. Конфеткань танстесь ды чинесь кортыть седе, медесь эждезь. Бути медесь саезь аволь цецясто, а сахаронь сиропсто, конасонть андсть мекштнень, сон карми ашокс. Теке марто алкуксонь медеськак лиясто эрси ашокс.

Медень рамамсто эряви ваномс сеньгак, кодамо чакшсо миеви продуктась. Чакшось илязо уле кшнинь, эмалень пелькс марто, истямосонть медесь карми чапаськадомо. Икеле меденть кирдсть пекшень парьсэ, конат ваднезельть штасо. Истямосонть сон ванстовиль пек кувать. Оцинкованной ды медной чакштне а меревить овсе, сень коряс, медесь сынст марто кунды реакцияс ды пештяви ядонь салдо. Теке марто продуктанть эряви пештямс коське банкас, штобу ванстоволь вадрясто ды кувать.

Весе арсить, бути медесь лезэв продукта, сонзэ мереви ярсамс куш зяро. Те а истя. Покш ломанентень чинзэ перть мереви ярсамс кавтошка пенчть.

А эряви стувтнемс, медесь – продукта, конась кемексты минек шумбрачинть. Секскак кирдеде мельсэ сеть ёнкстнэнь, кода муемс вадря, алкуксонь медь. Седе паро рамамс аламошка алкуксонь медь, эли жо а рамамс овсе, медень кондямодонть рамамодо. 

Анокстызе Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».