Вторник, октября 27, 2020
Важное

Неть читнестэ тагояк сась паро куля – ошсонок панжовсь эйдень од кужо. Сон ашти Юбилейноень 5№ микрорайонсо, Ремзаводонть вакссо, Ю.Святкин лемсэ куросонть, косо стявтозь зярыя од кудот. Чарькодеви, тосо эрить ламо од семият, косо трить-кастыть вейке, кавто, колмо эйкакшт.

Кужонь панжомо сакшность МР-нь Правительствань Председателесь В.Ф.Сушков, сонзэ полавтыцясь Г.А.Лотванова, Саранск ошонь мэрэсь П.Н.Тултаев ды лия инжеть. Эйдень кужонть стявтсь «Ремстрой» ПАО-сь «Жилище» республикань целевой программань «Ипотека и арендное жилье» проектэнть вельде.

– Сюкпря эряви ёвтамс минек Президентэнтень В.В.Путиннэнь, кона яви тенек мель. Кужонть стявтомга тусть малав 190 млн. целковойть. Сынст ютксо покш пельксэнть максызе федеральной бюджетэсь, – кортась В.Ф.Сушков.

9№ эйдень од кужосонть 240 таркат. Тесэ кемгавтово группат, вейкесь эйстэст алтави беряньстэ кортыця эйдетненень (5 иестэ саезь 7 иес). Тесэ кармить важодеме педагог-психолог, логопед. Кужонь прявтось – Е.А.Аверкина.

Мезе парось, ней малав весе кужотнесэ улить бассейнат. Ниле иестэ саезь эйдетнень кармить тонавтомо укшномо, аштеме ведь лангсо. Занятиятнес кармить якамо кавксонь-кавксонь ломанть. Бассейнанть сэрезэ 60 сантиметрат. Ули эрявикс инвентарь.

Инжетне ванызь медицинань блоконть, ков совить физиокабинетэсь, процедурной кабинетэсь. Тесэ кармить ванномо эйкакштнень. Теде мейле совасть изостудияв, компьютерэнь классов, налксемань нупалев, косо кортасть эйкакштнень марто. Эйдетне мельспаросо невтнесть налкшкест ды мизолдсть, неявсь, кужось тенст вечкеви.

Мейле В.Ф.Сушков вастовсь тетятнень-аватнень марто, конат ёвтасть сюкпрянь валт кужонь панжоманть кисэ. Владимир Фёдорович пачтясь, эйдень кужонь стявтоматне поладовить. Саранскоенть 300 иень эрямонзо перть истят покш полавтомат зярдояк арасельть. Стявтовить-кепедевить эрямонь од микрорайонт, панжовить эйдень кужот, школат, поликлиникат.

– Курок тесэ панжови од школа ды оштё вейке эйдень кужо. Эрявить озавтомс чувтот, зярс сынь тесэ арасть, – мерсь Правительствань Председателесь В.Ф.Сушков.

Эряви меремс, маласо шкасто эйдень од кужо панжови Титовонь куросо. Истя жо эйдень кужот кармить стявтомо Ялгасо, Луховкасо. Тееви весемесь минек эрямонть паролгавтомга.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».