Эйзюрковонь 3-це чистэ Мордовиянь Прявтонь тевтнень топавтыцясь Артём Здунов Экологиянь, технологической ды атомной надзоронь коряс Федеральной службань Волжско-Окской управлениянь руководителенть Игорь Кокунов марто ваннызе Мордовиянь МЧС-нь аварийной ды толонь мадстемань-идемань техникань анокчинть.
Чадыведентень анокстамонть Мордовиянь идицятне ушодыть ве шкасто кирвазематнень а нолдамонь коряс важодематнень марто. Мордовиява Россиянь МЧС-нь Главной управлениянь прявтось Андрей Наумов тешкстызе, неть зыянтнэнь ютксо шкась аволь ламо. Секскак Артём Здунов кармавтсь улемс покш анокчинь режимсэнть. «Минь пштистэ весементь вансынек, эдь весе те лиси куш зярдо ды пек куроксто. Миненек эряви улемс анококс куш кодат тевтненень», – тешкстызе МР-нь Прявтонь тевтнень топавтыцясь.
Прявт техникатнестэ вейкесь – таркасто таркас шаштневиця управлениянь республикань пунктось. Тов совить кавто автомобильть, вейкесь эйстэст – республикань Прявтонть ды ЧС-нть коряс комиссиянь важодемань таркатне. Омбоце автомобилесь – связень мобильной узелэсь.
Эштё вейке прявт автомобилесь арсезь-анокстазь республикасонть. Сонзэ нолдызе Рузаевкасо «Нефтегазмаш» компаниясь.
2014 иестэ республикань толонь мадстемань техникань паркось одкстомтовсь 70% ламос. Саранскойсэ ды Рузаевкасо сынст полавтызь целанек. Региононь толонь мадстемань эрьва частентень явозь сехте аламо вейкень-вейкень автомобиль, те истя жо теезель 2018 иень Футболонь коряс масторлангонь чемпионатонтень анокстамонть лувсо.
Андрей Наумовонь валонзо коряс, технической оснащённостенть ды техникань анокчинь коряс Мордовиясь васенце таркасо Российской Федерациясо.
Ваннызь укшномань средстватнень, сынь улест свал анокт.
Игорь Кокунов яволявтсь: «Идицятне анокстыть куш кодат тевтненень. Чадыведесь карми, ды ули покш мель арсемс: специализированной те техникась нолдавозо тевс ансяк тонавтоматнень лувсо».
Андрей Наумов мерсь, бути венчтне ды катертнэ а кармить сатомо, ветязь кортамот муниципалитеттнэнь, ГИМС-нь аволь штатной инспектортнэнь ды укшномань средстватнень азортнэнь марто. Сынь анокт явомс лезкс региононь идицятненень.