Саранскойсэ пожарно-спасательной куншкакуронть юрсо ютавтозель 2020 иень чадыведентень анокстазь Мордовия Республикава Россиянь МЧС-нь Главной управлениянь средстватнень ды вийтнень ванкшномась.
Сонзэ эйсэ участвовасть МР-нь Правительствань Председателень полавтыцясь – Жилищно-коммунальной хозяйствань, энергетикань ды эрицятнень гражданской защитань министрась Игорь Чадов, МР-ва Россиянь МЧС-нь Главной управлениянь прявтось Андрей Наумов, Главной управлениянь прявтонь полавтыцясь, Эрицятнень ванстомань ды гражданской оборонань управлениянь прявтось Юрий Белоуско. Ванкшновсь чадыведень шкасто ломанень идемань туртов эрявикс техникась, мотор марто венчтне, лия инвентаресь.
– Вийтнень ды средстватнень ванкшномась невтизе, МЧС-нь подразделениянь техникась парсте витнезь ды анок чадыведень шкантень, – тешкстызе Игорь Чадов. – Неень шкасто МР-ва Россиянь МЧС-нь Главной управлениянь оперативной штабонть мельга кемекстазь колоньгемень укшномань венчть. Теде башка, комсь укшномань венчть улить гражданской структуратнесэ. Сынст улить соглашенияст МР-ва РФ-нь МЧС-нь Главной управлениянть марто. Истя жо анок важодеме спецтехникась – МЧС-нь управлениянь таркадо таркас ютамонь пунктось, кона теевкшны чадыведень шкасто идицятнень кувать шкань перть важодеманть туртов.
Игорь Чадовонь валонзо коряс, республикасо чадыведьс весемезэ понгить 18 муниципальной районт ды 78 велеть. Те Зубова-Полянань, Темниковань, Ковылкинань, Краснослободскоень, Ташто Шайговань, Ромодановань ды лия районтнэ, истя жо Саранск ошонь округось. МР-нь Правительстванть кармавтоманзо коряс тедеде чадыведентень анокстамонтень явозь 8 миллионт целковойть.
Кодамо карми чадыведесь? Зярс те кевкстеманть лангс каршо вал арась. МР-ва Россиянь МЧС-нь Главной управлениянь прявтонть Андрей Наумовонь валонзо коряс, спасательтне свал анокт ломанень идемантень, сынь куш кодамо шкасто вийсэст ардомс республикань куш кодамо таркас, зярдо те карми эрявомо. «Зярс тевтне-валтнэ а талновтыть, минь аноктано куш кодамо шкантень. Пертьпельксэнь стихиятне а изнявить, ансяк ломантнень зыяндо идемась – те минек тевенек», – мерсь Андрей Наумов.
Пётр ЗИНОВЬЕВ