Четверг, марта 28, 2024
Важное

Тиринь кель. Эрзянь кель. Сонзэ мазый сюпавчись юты тенек тетянок-аванок, покштянок-бабанок пельде. Ды раськенек лия пингень эрицятненень ванстомазо ламова ашти минек эйстэ.

Кенярдовты се, кодамо покш мель кармасть явомо республикасонок ды масторсонок тиринь келентень. Кемеви, те тевесь икелепелев седе виевгады ды кемексты. Зярс улить Мордовиянь велетнесэ ды оштнесэ эрзянь келенть кисэ алкуксонь мелявтыцят, эйкакштнень тиринь кельсэ кортамо ды сёрмадомо тонавтыцят, сон а ёми. Истятнэнь ютксо, кить седейшкава вечксызь ды парсте содасызь тиринь келенть, Покш Березникень райононь Шугурова велень средней школань тонавтыцясь Нина Кузьминична Манина.

Покш Березникень райононь Вейсэ поселкантень 90 иетнень тешкстамсто анокстазельть эрьва кодат выставкат. Ледстневи, эйкакштне, кить сакшность кенярксчинтень тетяст-аваст марто, пурнавкшность някань выставканть перька. Тосо аволь пек покш столенть лангс, теке райононь Шугуровань средней школань эрзянь келень ды литературань тонавтыцясь Нина Кузьминична Манина (тейтерьксэнь фамилиязо Исаева) ладсесь эсензэ кедьсэ теезь мазый оршамопельсэ някат. Виде, ней лавкатнесэ налкшкетнеде эрьва кодат, улест ансяк ярмакот. Нина Кузьминичнань някатне жо явовсть васняяк сеньсэ, сынь теезь эсензэ кедьсэ, вечкезь ды оймень путозь.
Умок содаса те эрзянь аванть, кие алкукс вечксы тонавтыцянь тевензэ, кие свал вешни одонть эйкакштненень тиринь келенть ды литературанть вечкеме тонавтомасо. Сон путы весе виензэ эрьва кодамо пелькстамотнес тонавтницянзо анокстамсто, косо бу сынь авольть юта: эсест школасо, районсо, республикасо эли Московсо. Нать, а стяко сонзэ эйкакштне сеедьстэ лиснить изницякс.

Сы шкань профессиянтень ушодксось путозель семиясо. Нина Исаева, ламо эйкакшонь триця семиясо касомсто эштё вишка пингстэ несь, кодамо покш важодема топавтома, штобу пачкодемс тёкшос, совамс изницятнень юткс.

Шугурова кезэрень эрзянь велесэнть те шкас паро валсо ледстнить сонзэ тетянзо-аванзо – Кузьма Васильевич ды Ольга Семеновна Исаевтнень. Авазо профессиянь коряс – строитель. Видькстатано, малав аволь эрьва цёрась кочкасы те а шожда тевенть. Эдь топавтомстонзо эрявить ламо вийть, ёрокчи. Те аволь кельсэ лавгамо, те – кедь вийсэ покш сталмонь кепсема ды теезь объектэнть коряс покш ответственностень кандома. Ольга Семёновна стиль валскень зорят, эдь важодеме туемезэнзэ покш чугун ям пидема, кши панема ды эште шкастонзо ялгатнень марто важодеме шабра Чаунзань районов кенерема. Эдь семиясь покшоль, Исаевтне трясть-кастасть вете эйкакшт.

Нать, эрьва тевенть педе-пев алкукс топавтомась Нина Кузьминичнанень сась аванзо Ольга Семёновнань пельде.
Тетязо, Кузьма Васильевич, ламо иень перть Калинин лемсэ колхозсо складонь прявтоль, тосо ули-пародонть сестэ пек ламоль. Эрьва эскенть-уськенть кис кандсь покш ответственность.
Нина Кузьминичнань ледстнеманзо коряс, сынст кудост свал пешксель инжеде. Эрьва кодамо кевкстема, энялдома марто сыльть Кузьма Васильевичнень кода эсест, истя шабра велень ломантнеяк. Вишкинестэ Нина Исаева пек вечксь «школынесэ» налксеме, ялгатнень ютксо свал ульнесь тонавтыцякс, школасо тонавтнемстэ вожатоень тевесь тензэ ульнесь сехте малавикс, свал перьканзо ламо эйкакшт пурнавильть.
Вечкевикс тонавтыцянзо, Мария Максимовна Абрамовань ды Валентина Михайловна Араповань лангс ванозь, кода сынь парсте содасызь эсь предметэст, кода маштыть ветямо урокост, сайсь мель улемс ансяк тонавтыцякс ды эрямонть алтамс эйкакштнень тонавтомантень.
Школанть парсте прядомадо мейле документэнзэ максынзе М.Е. Евсевьев лемсэ педагогической институтов. Кодамо покшоль велень тейтеренть кенярксозо сы шкань студенттнэнь ютксто эсь лемензэ редямсто!

Тонавтнемань иетне сонзэ туртов ульнесть сюпавт эрьва кодамо событиясо. Содамочитненень покш бажамось, парсте тонавтнемась арасильть пирявксокс вечкевикс ломанензэ экшс мирденень лисемстэ, васенце эйкакшост чачомсто. Сестэ сы шкань эрий ялгазо, Николай Манин, истя жо тонавтнесь теке вузсонть, ансяк физической воспитаниянь факультетсэ.

Нина Кузьминична нейгак сюкпрянь вал марто ледстни, кода мирденень лисемадо мейле кураторост Раиса Семеновна Ширманкина редизе сонзэ пешксесэ улеманзо ды прок тиринь авазо лездась тензэ ютамс башка (индивидуальной) планс. Сестэ пек ризнэсь од авинесь, кода карми прядомо тонавтнеманзо.

Вана истя сон кармась эрямо тиринь Шугурова велесэ, весе экзаментнэнь жо парсте макссь эсензэ группанть марто Саранскойсэ.
Апак учо тензэ пшкадсь Шугуровань средней школань сестэнь прявтось Василий Терентьевич Арапов школав тонавтыцякс важодеме лисемадо. Самай се шкастонть тусь пенсияв эрзянь келень ды литературань ветицясь Мария Акимовна Горбунова.
Эрьва ков кенерсь од авинесь: вузсо тонавтнеме, школасо важодеме, васенце эйкакшост Володянь ваномо ды эште малавиксэнзэ туртов кудоютксо лездамо.

Нина Кузьминичнанень куш дипломонть максызь 1983 иестэ, сон уш теде икеле кенерсь важодеме тиринь школасо, тонавтомо эсест велень эйкакштнень.
Сонзэ ули покш ёрокчизэ раськень койтнень-кирдатнень, тиринь келенть ды литературанть сюпавчинзэ уроктнесэ истя пачтямс эйкакштненень, неть содамочитне шкань ютазьгак а стувтовить тенст.
Нать, а стяко тонавтницянзо совить изницятнень юткс райононь, республикань ды весероссиянь пелькстамотнесэ. Невтемакс, сынь невтизь содамочист «Живая культура: традиции и современность» весероссиянь научно-исследовательской тонавтницянь конференциясонть, «Родной язык в моей семье» республикань конкурссо-презентациясонть, Мордовия Республикань тонавтницятнень «Шаг в будущее» научно-образовательной форумонь «Родное слово» секциясонть, «Край родной, навек любимый» республикань тонавтницятнень ютксо пелькстамосонть, «Знаменитые люди Мордовии» номинациясонть ды ламо лиятнесэ.

2019 иестэ сонзэ тонавтницянзо лиссть изницякс Московонь Раськеютконь «Одаренные дети – 2019» форумонь отборочной турсо «Театральная» номинациясонть «Ков пурнат-сэрнят» кезэрень сценканть путоманзо кис. Эйкакштне истя жо вейсэ тонавтыцяст марто анокстасть Кузьма Абрамовонь шкинемантень алтазь «Абрамовонь ловноматненень, конат ютавтозельть республикасонть, налксесть Кузьма Абрамовонь «Эрьванть эсензэ ормазо» пьесасто саевксэнть.
Шугуровань средней школань тонавтыцятнень ледстнемаст коряс, колоньгеменце иетнестэ «Вайгельне» драмкружоконтень аволь ансяк те велень эрицятне пурнавкшность, истя жо тов сакшность шабрастояк. Паро, неть койтне-кирдатне велявтовсть, теньсэ покш путовксозо Нина Кузьминичнань ды тонавтыцянь весе коллективенть. Теевезь коень коряс школасонть сеедьстэ ютавтневить содавикс писательтнень, поэттнэнь, Мордовиянь культурасо важодицятнень марто вастовомат. Эрьва иестэ ютавтови эрзянь келень ков.

Ветешка иеде икеле сон невтизе ёрокчинзэ «Всероссийский мастер-класс учителей родных, включая русский, языков» региононь пелькстамосонть, конась ульнесь Саранскойсэ, теде мейле – Московсо.
Кавто иень перть ульнесь пелькстыцякс «Мордовия Республикасо эрзянь ды мокшонь кельтнень коряс сехте паро тонавтыця», косо максозель тензэ призёронь таркась.

Теде башка, Н.К. Манина вети ламо общественной робота. Сон – Эрзянь, мокшонь раськень регионъютконь общественной движениянь первичной организациянь секретарь, ГИА-со эрзянь келень ды литературань коряс тонавтницятнень важодевкстнэнь ванкшномань комиссиянь прявт, этнодиктантонь пурныця-ютавтыця.
Нина Кузьминична сеедьстэ эрси Покш Березникень муниципальной районсо, республикасо ютавтовиця выставкатнесэ, фестивальтнесэ, декоративно-прикладной творчествань выставкатнесэ.

Аволь умок сон ушодсь някань тейнеме, те тевесь истя вечкевсь авантень, лиясто веньперть сты-мазылгавты эйсэст. Нать а стяко аволь весть лиснесь изницякс «Радуга талантов» раськень культурань ошонь панжадо фестивальтнесэ, казезь «Мир кукол» республикань декоративно-прикладной творчествань выставкань дипломсо, Образованиянь профсоюзонь общероссийской Почётонь грамотасо, «Почётный работник общего образования РФ» мештьсэ кандтнемань знаксо, «За заслуги. В ознаменование 1000-летия мордовского народа с народами Российского государства» медальсэ ды ламо лия казнесэ.
Нина Кузьминична свал тонавтни, бажи седе ламо содамс од ды лезэв. Теке шкасто сон мелявтыця ды вечкиця ни, кавто цёрань ава ды кавто нуцькань баба. Лиясто ванат лангозонзо ды арсезеват, косто зняро вийть амольди эрямонь вечкиця, ламо тееме бажиця авась. Нать, сонсь Пазось лезды тензэ эрьва ков кенеремс ды весень марто улемс алкуксонь ломанекс. Бути масторонть лангсо кармить улеме тиринь келень ламо истят тонавтыцят, сестэ келенек а ёми, литературанок а стувтови.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».