Неть читнестэ Саранскоень 2-це № Эйкакшонь творчествань центрась вастсь ламо инжеть. Тувталокс тенень кармась шахматонь клубонть панжомась. Те тевсэнть лездасть Российской военно-исторической обществась ды МР-нь Шахматонь федерациясь. Те чись кармась алкуксонь кенярксчикс шахматонь ды военной историянь вечкицятнень туртов.
Эйкакшонь творчествань центрань актовой залсо эрьва инженть учить шахматсо налксемань туртов сисем стольть ды паро ёжо. Неть стольтне телень перть кармить аштеме центрасонть, кизэнень сынст арсеви ливтемс ушов. Тень туртов кочказь Пролетарской курось ды А.С. Пушкин лемсэ оймсема парконь аллеясь. Шахматсо налксицятненень мереви саемс налксемапельтнень кудовгак, бути арась шка аштемс центрасонть.
Вастовомань инжекс кармасть школасо тонавтницятне, МР-нь Ветерантнэнь советэнь председателесь Иван Цыганок, МР-нь Шахматонь федерациянь президентэсь Римма Девяткина, республикань Правительстванть юрсо гуманитарной научно-исследовательской институтонь прявтонь полавтыцясь, Российской военно-исторической обществань региональной отделениянь прявтось Евгений Бикейкин ды ламот лият.
Кода эсь кортамосонзо тешкстась Евгений Бикейкин, те интеллектуальной клубонь панжомась пек эряви минек од ломантнень содамочист кастомга. Эряви меремс, минек республикасо улить шахматсо налксицят, конатне те тевсэнть алкуксонь профессионалт, ды неть ломантне а весть невтекшнизь эсь ёрокчист шахматонь пелькстамосо Мордовиянь томбалеяк. Тешкстама, истят интеллектуальной клубт уш ламо иеть важодить Московсо ды Севастопольсэ, истя жо Алтайской, Забайкальской, Краснодарской ды Ставропольской крайтнесэ, Тыва, Хакасия, Северной Осетия, Луганской ды Карачаево-Черкесской республикатнесэ, Архангельской ды Калининградской областтнесэ. Ней истямо вадря ды мелень кепедиця клуб важоди минек регионсояк.
Седе тов кортамонть поладызе Римма Девяткина. Сон мерсь:
– Те клубонь панжомась – покш эскелькс содамочинь масторов сеть эйкакштнень туртов, конат эсь эрямост алтыть шахматсо налксемантень. Арсян, ней, те кенярксчиденть мейле, минек од ломантнень седеяк кепети мелест налксемс ды анокстамс сыця шкань шахматонь турнирс. Кеман, маласо шкастонть те клубонтень сыть эштё сядо налксицят.
Вастовомась прядовсь «Млада» народной ансамблянь мельстуиця морамосонть.
Алёна Артемьева