Вторник, марта 19, 2024
Важное

Аволь умок Россиянь Просвещениянь министрась Сергей Кравцов масторонь журналисттнэнь марто вастовомсто ёвтнесь школатнень дистанционной тонавтнемантень ютамонь стакачитнеде. Сон тешкстызе, эштё иенть ушодовомсто те мельскак эзь саеве, зярдо жо лия кить арасельть, сеске кармась анокставомо важодемань од лув. Кравцов ёвтась, аволь весе школатне ды тонавтыцятне ульнесть тенень анокт. Семиятнень туртов жо те кармась алкуксонь мелявксокс. Ламо стакачить ливтсь онлайн-платформатнень важодемаськак, конат покш роботанть эйстэ свал лоткильть.


Эштё вейке покш мелявксокс кармась ярмаконь тевесь. Аволь эрьва эйкакшонть ды семиянть ули эрявикс техниказо. Нама, лездасть школатнеяк, лезксэнь максома организациятнеяк, рамазельть малав 50 тёжат гаджетт.

Башка темакс кармасть олимпиадатне ды госэкзаментнэ. Пандемиянть кувалма весе школьниктнень, конат пачкодсть Весероссиянь олимпиадань меельце этапонтень, ёвтасызь изницякс. Вейксэце классонь тонавтницятне кармить максомо экзамент ансяк рузонь келень ды математикань коряс, ЕГЭ-тне жо зярс кандозь аштемковс.
Весе неть кевкстематнень ды лиятнень минь ванносынек седе домкасто материалсонть.

ЭКЗАМЕНТНЭНЕНЬ
АНОКСТАМОСО
ЛЕЗДАМГА

Аволь умок Россиянь Просвещениянь министерствась ды «Триколор» компаниясь нолдасть «Моя школа в online» образовательной телеканал. Дистанционной тонавтнеманть шкасто сон лезды покш класстнэнень анокстамс экзаментнэс. Телепроектсэнть тонавтыцятне – Россиянь ветиця педагогтне, конатнень инновационной технологиятнень нолдазь методикатне лездыть чарькодевиксстэ толковамс материалонть. Эсь койсэ видеоуроктне теезь федеральной государственной тонавтомань стандарттнэнь коряс. Телеуроктне ютавтовить эрьва чистэ, вейкенть кувалмозо – 30 минутат.

Видеоуроктнесэ саезь содамочитнень мереви кемекстамс «Российская электронная школа» порталсонть тренировочной заданиятнень решазь ды башка материалонть тонавтнезь.
Теде башка, телеканалсонть невтевить лезэв роликть, конатнень анокстызь WorldSkills Russia национальной сборноень участниктне ды эксперттнэ. Школьниктненень ёвтневи эрьва профессиянть явовтыця ёнкстнэде. Паряк, те весемесь киненьгак лезды эсь тевенть кочкамосо.
Уроктнень расписаниясь максови Минпросвещениянь сайтсэнть.

КАРМАСТЬ ОЛИМПИАДАНЬ ИЗНИЦЯКС

Коронавирусонть кувалма прявт пелькстамовтомо кадовсть ёроков, тонавтнемантень покш мелень явиця эйкакштне. Кода пачтясь РФ-нь Просвещениянь министрась Сергей Кравцов, тедеде школасо тонавтницятнень Весероссиянь олимпиадань меельце этапось ютавтовомо а карми.

Икеле кемекстазь расписаниянть коряс, олимпиадатне ушодовольть бу эйзюрковсто. Ды васняяк кортавсь шкатнень полавтомадо. Арсевсь, школьниктне финальной пелькстамотнесэ содамочист невтьсызь дистанционна, олимпиадань заданиятнень эсь велетнесэ-оштнесэ топавтозь. Ансяк тевтне ладявсть истя, олимпиадатне эзть ютавтово овсе.

Кевейкееце классонь весе тонавтницятне, кить пурнасть эрявикс баллт финалс ютамонтень, ёвтазь изницякс. Сыненст максовить дипломт. Тезэ а совить сеть, кие финалс ютась региононь квотань коряс. Сеть жо, кие ютась финалс, школанть жо тедеде а пряды, получасть путёвка 2021 иень олимпиадантень. Ды тень туртов 9-це, 10-це класстнэсэ тонавтницятненень а эряви одс ютамс школань, муниципальной ды региональной этаптнень.

Ансяк вана тонавтыцятнень ды вейксэце классос молиця эйкакштненьгак улить кевкстемаст, бути тедеде олимпиадас апонгицятне автоматически молить сы иестэ, кармить-арась квотат лиятнень туртов? Ды тонавтыцятнеяк мелявтыть. Сынь важодсть, анокстасть эйкакштнень, неень мелявкстнэнь марто жо кадовить премиявтомо.

Мордовиясо тонавтыцятненень пандовить региональной доплатат олимпиадань изницятнень ды призёртнэнь анокстамонть кис. А тедеде, тонавтыцятне важодсть эйкакштнень марто, ученикест пурнасть эрявикс баллт олимпиадас понгомантень, ансяк финалсо эсь ёрокчинть невтемс эзь удала. Арсетяно, течинь а шожда шкатнестэяк муеви ки, конась лезды тешкстамс тонавтыцятнень ды тонавтницятнень эсь содамочист ды ёрокчист кис.

ВПР-тнень СЁРМАДСЫЗЬ
ТАШТАМКОВСТО

Весероссиянь проверочной роботатне 4-8-це ды 10-11-це класстнэнь туртов кандовить тонавтнемань сы иентень.
Весероссиянь проверочной роботатне – те итоговой контрольной роботатне, конатнень тонавтницятне сёрмадыть иенть прядовомсто эсь содамочитнень невтемга.

«ВПР-тнень тонавтнема иенть прядовомсто сёрмадыть 4-8-це, 10-це ды 11-це класстнэ. Тонавтыцятнень, регионтнэнь, тетятнень-аватнень марто кортамодонть мейле Весероссиянь проверочной роботатнень кемекстазь кандомс тонавтнемань од иенть ушодовомантень», – пачтясь РФ-нь Просвещениянь министрась Сергей Кравцов.
Истя жо министрась мерсь: неть роботатнень кис оценкат путовомо а кармить. Сынст ютавтсызь тонавтницятнень содамочист ванномга ды тонавтнемань программанть ладямга.

ЕГЭ-сь КАРМИ

2020 иестэ ЕГЭ-сь карми очной формасонть весень туртов вейкине расписаниянть коряс. Экзаменэнь ютавтома лувось а полавтови, ванстовить ютавтомань весе ёнкстнэ, конат невтить ЕГЭ-нь виде максоматнень. Экзаменэнь максома пункттнэсэ тееви дезинфекция, карми кирдевеме социальной дистанциясь.

Теке марто экзаменэнь шкатне тедеде полавтозь. Ушодовить сынь аштемковонь 8-це чистэ. Домка расписаниясь ули Минпросвещениянь федеральной порталсонть. Бути эпидемиологической тевтне кармить берянть, шкатне полавтовить.

9-це класстнэнь прядыцятнень туртов Основной государственной экзаменэсь (ОГЭ-сь) карми ансяк кавто предметэнь коряс – рузонь келень ды математикань. Кочказь предметтнэнь максомо а кармить. Эрьва регионось аттестациянть ютавтсы эсь шкасто – аштемковонь 8-це чистэнть саезь 31-це чинть самс.

ТОНАВТНЕМА ИЕСЬ ПРЯДОВИ ШКАДО ИКЕЛЕ

Неть читнестэ Мордовия Республикань Прявтось Владимир Волков пачтясь: начальной школань тонавтницятнень туртов тонавтнема иесь прядовсь панжиковонь 12-це чистэ. Россиянь Просвещениянь министерствась истямо арсеманть кемекстызе.
Лия класстнэнь туртов тонавтнема иесь прядови панжиковонь 22-це чистэ. Вейксэце классонь тонавтницятне экзаментнэнь кармить максомо аштемковонь 16-19-це читнестэ, кевейкееце класстнэсэ ЕГЭ-тне ушодовить аштемковонь 8-це чиденть мейле.

МГУ-со ПРИМАМОНЬ КАМПАНИЯСЬ –
ОД ЛУВСО

Н.П.Огарёв лемсэ МГУ-со пачтясть тедедень примамонь кампаниянь башка ёнкстнэде. Документтнэнь примамось карми топавтовомо ансяк дистанционной режимсэ университетэнь электронной образовательной информационной системанть тевс нолдазь. Почта вельде, курьер марто кучозь ды эсь кандовт документтнэ ванновомо а кармить.
Документтнэнь скан-копиятнень пакетэсь: паспортонь эли лия документэнь копиясь, тонавтнемадо документэнь копиясь (приложения марто), целевой тонавтнемадо договоронь оригиналонь копиясь эли кемекстазь копиясь, квотань коряс тонавтнемадо документтнэнь копиятне, документтнэнь копиятне, конат пачтить башка изнявкстнэде.
Примамонь шкась ладяви ЕГЭ-нь результаттнэнь ёвтамонть коряс. Седе домкасто весемеденть ванодо университетэнь сайтсэнть.

Юлия ЕРЕМИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».