Воскресенье, июля 21, 2024
Важное

Саранскоень 2 № Эйкакшонь творчествань центрась кармась омбоце кудокс ламо эйдетнень туртов. Кодат ансяк кружокт, студият ды секцият тесэ арасть. Школасо уроктнеде мейле эйкакштне капшить самс тей, сынь ардтнить ошонь эрьва кодамо районсто. Творческой центрань прявт зданиясь ашти Грузинской куросонть. Теде башка, филиалт улить Ульяновонь, Марина Расковань ды Роза Люксембургонь ульцятнесэ. Эрьвасонть тевс нолдавить башка ёнкст: технической эли художественно-эстетической, прикладной эли физкультурань-спортонь, эколого-туристической эли инновационной.



Неть читнестэ Эйкакшонь творчествань центрасо ютась покш кенярксчи – «Семья и Родина едины» концерт, конантень анокстасть иень перть. Эйкакштне ламо морасть, невтсть киштемат, ловность стихть. Теде башка, выставкасо невтевсть сынст кедьсэ теевкстнэ – артовкст, викшневкст, эрьва кодат сувенирт. Парикмахерэнь тевс тонавтницятне невтсть прячерень мазыйстэ пурнамонь мастер-класст. Ве таркасо – а ёвтавикс мазычи ды кеняркс. Эйкакштнень ваномо сакшность тетяст-аваст, покштяст-бабаст. Ютксост ульнинек миньгак.

– Кедьсэнек тонавтнить ламо эйкакшт. Бути саемс весе филиалонок – сисем тёжат эйдеть сакшныть кружоктнес. Вете иестэ саезь кемгавксово иесэ эйкакшт. Минь важодтяно эрьва чистэ, субутастояк, недлячистэяк. Тесэ тукшны мелезэст. Теде свал кортыть тетяст-аваст. Кодамо илязо уле ушолксось, цят якшамо эли пиземе, сынь саевтить пряст занятиятнес. Те пек паро, зярдо эйкакштненень вечкеви се, мезе сынь теить. Тетятне-аватнеяк кецнить изнявксост кисэ, – ёвтни 2 № Эйкакшонь творчествань центрань прявтось, "Союз женщин Мордовии" минек региононь отделениянь ветицясь Ольга Игнатова.
Кода корты Ольга Викторовна, тонавтыцятнень эйстэ ламот сынсь эйкакшокс яксесть тей. Вузонь прядомадо мейле састь тей важодеме. Поладыть сеть койтнень, конат ладязельть икеле. Ошонь школатнесэяк неть педагогтне ветить занятият Эйкакшонь творческой центранть пельде.

Башка валт эряви ёвтамс «Колокольчик» эйдень кастомань-тонавтомань школадонть. Сон панжозь малав 30 иеде икеле. Васня эйзэнзэ якасть тонавтыцятнень эйкакшост. Те – школадо икеле эйкакштнень анокстамось. Ветнить вете иень эйдетнень. Тонавтомась моли кавто иень перть. Сынь важодить кортамонть лангсо, ёвтнить ёвкст, налксить рольть. Улить «Весёлая математика», «Конструирование», «Англань кель», «Аэробика» ды ламо лия занятият. Те школанть прядомадо мейле явшить дипломт ды медальть. Сехте вишкинетнень кенярксост эрси а ёвтавишка.

– Минек прявт меленек – эйкакштне вечкевлизь тонавтнеманть. Кадык те вечкемась, содамочитненень бажамось моли мартост эрямонь перть. Школасо тонавтнемстэяк эрьва эскельксэсь, эрьва изнявксось кандоволь кеняркс. Свал кортан тетятнень-аватнень туртов, кадык сакшныть эйкакшост марто миненек. Ды зярдо шкань ютазь марят пельдест сюкпрянь валт, кода весемесь маштовсь эрямосонть, оймесэ кенярдат, лисни, минь аволь стяко важодтяно, – корты Ольга Викторовна.

Роза Люксембург лемсэ ульцясонть аштиця эйкакшонь центрасонть ладязь спортонь ёнксось. Тесэ ули велоспорт, рукопашной тюрема, каратэ, важоди тренажёрной зал. Ульяновонь куросонть ветяви школантень анокстамось, парсте ладязь киштемань-морамонь ёнксось. Марина Расковань куросонть тонавтнить парикмахерэнь тевентень, важодить прикладной творчествань кружоктне, англань келень тонавтнемась. Прявт зданиясонть ветявить эрьва кодат кружокт. Кружоктне питневтеметь, тонавтнеманть кисэ пандомс а сави. Кить яксить кавто-колмо иеть, сетненень максыть курсатнень ды программатнень ютамодо удостоверения, конась мельс саеви училищав ды вузов тонавтнеме молемстэ. Максовить характеристикат, грамотат. Парсте тонавтницятне кучовить оймсеме Весероссиянь лагеревгак.

– Занятиясь моли 45 минутань перть, мейле аламос оймсить ды таго 45 минутат. Тонавтнемадонть башка, эйкакштне теевить ялгакс, тонавтнить лиятнень марто кортамо ды мездеяк а пелеме. Тесэ аволь кода школасо, тесэ теке тиринь кудосо, косо эйсэть вечкить, учить. Тень эряви тенек ванстомс седе товгак. Тонавтыцянок вечксызь эсь тевест. Эйдетне пандыть тенст текеньсэ, вечкемасо, – корты 2 № Эйкакшонь творческой центрань прявтось.

Ольга Викторовна сонськак вишка шкасто яксесь Пионерэнь кудов. Бабазо ветнесь викшнемань кружоков. Кортыль, авантень эряви маштомс кирдемс кедьсэнзэ салмукс ды суре. Школанть прядомадо мейле тонавтнесь М. Е. Евсевьев лемсэ МГПИ-нь (ней – МГПУ) биологиянь факультетсэ. Зярс-бути важодсь механической заводсо, мейле сась школав, косо ладизь пионервожатоекс. Сеедьстэ полавтнесь ботаникань тонавтыцятнень, ветясь тарказост урокт. Шкань ютазь тердизь важодеме Пионерэнь кудов методистэкс. Мейле ладизь прявтокс. Пионерэнь кудось вейсэндявсь Эйкакшонь творческой центранть марто. Комсте ламо иеть вети прявтонь тевтнень. Тесэ тонавтнесть эсензэ эйкакшонзо ды нуцьканзо.

Улить эйкакшт, конат васня яксить зярыя кружокс, варчнить пряст. Мейле кочкить оймест коряс вейке-кавто ёнкст. Мезе парось, тесэ вадря расписаниясь ды кочкави эрявикс шка. Кие якси «Робототехникас», кие «Конструированияс», кие яви мель «Туризмань» ёнксонтень, кие жо вечки киштеме-морамо.

Эряви меремс, 2 № Эйкакшонь творчествань центрасо ули «Парикмахерэнь тев» направления, ошсонок истямо косояк лиясо арась. Ветить кавто тонавтыцят: И. Н. Колябина ды А. М. Кирдяшкина. Тей сакшныть 12–18 иесэ тейтернетне. Анна Михайловна Кирдяшкина важоди 2 № Эйкакшонь творчествань центрасо кавксо иеть. Сон прядсь Н. П. Огарёв лемсэ МГУ-нь филологиянь факультет. Свал тукшнось мелезэнзэ тейнемс причёскат, артомс ялгатнень прячерест. Авазо натой рамсесь тензэ парикмахерэнь тевенть коряс самоучитель. Колмоце курссо тонавтнемстэ ушосто несь яволявтома, косо пачтясть парикмахерэнь тевентень чокшнень курсань панжомадо. Сон пек кецязевсь. Чить – тонавтнесь вузсо, чокшне ульнесь шказо ютамс курсатнень училищасо.

– Тонавтнинь покш мельсэ, пек вечкевсь тень. Макссть колмоце разрядонь парикмахерэнь специальность. Нама, эзинь арсеяк сестэ, эрямом сюлмаса те профессиянть марто. Вуздо мейле зярс-бути роботынь овсе лия сферасо. Эйкакшонь творчествань центрасо васня ветинь начально-технической моделирования, эйдетнень марто эрьва мезть тейнинек. Мон маштан кодамояк. Ды натой тонавтнинь композиторонть В. С. Родионовонь кедьсэ баянсо седямо. Седе тов ушодынь ветямо «Парикмахер-стилист» направлениянть.
Программанть анокстыя монсь. Ушодтано шожда тевстэнть, тейтернетне содавтовить сень марто, кодат ломантнень прячертне, кода мартост важодемс. Сынь тонавтнить тейнеме причёскат, кудрят, прячерень артомо ды нарамо. Моделекс тердить ялгаст, сазорост, ялаксост ды натой покштяст-бабаст. Эли тейнить вейкест-вейкест туртов. Кодсить эрьва кодат мазый пулот, тейнить прячертнес неень шкань лувсо артомат. Минек ули теория ды практика. Те – парикмахерэнь тевень алкуксонь курс, предпрофессиональной анокстамо. Кадык эйкакшось варчни прянзо те профессиясонть. Тейтернетненень те пек эряви. Нама, аволь весе мейле кармить парикмахерэкс. Ансяк эрьва иестэ тонавтницянок эйстэ зяро-бути молить тонавтнеме парикмахерэкс. Те минек пек кецявты, – ёвтни Анна Михайловна.

А. М. Кирдяшкина невтнизе прянзо «Идея – prof» тонавтыцятнень методической разработкань республикань конкурссо. Сон изнясь васенце тарка «Профиль и профессия» номинациясонть.
2 № Эйкакшонь творчествань центрасонть ламо тонавтыцят, конат важодить тесэ пингест перть. Саемга, художественной отделэнь ветицясь Е. А. Черняева, туристической отделэнь ветицясь В. И. Янкина, «Композиция» художественной ловномань студиянь прявтось Т.П. Бундаева.

– Паро, зярдо ломанесь мусы эрямосонзо вечкевикс тевензэ. Мон кортан тонавтницятнеде ды тонавтыцятнеде. Вечкевикс тевесь свал канды кеняркс, – прядызе кортамонок Ольга Викторовна.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».