Пятница, июля 01, 2022
Важное

УЛЕДЕ СОДАВИКСЭКС: Юрий Иванович Голов чачсь 1969 иестэ Покш Игнатбуень Отяжеле эрзянь велесэ. 1993 иестэ прядызе Н. П. Огарёв лемсэ МГУ-нь велень хозяйствань факультетэнть, «агрономия» специальностенть коряс.

Роботась Лямбирень райононь «Белотроицкий» совхозсо агрономокс, производствань ды сбытэнь коряс директоронь полавтыцякс, мейле – генеральной директорокс. 2010 иестэ идизе кандидатской диссертациянзо велень хозяйствань наукатнень коряс. 2012 иестэ сонзэ ладизь Мордовиянь Велень хозяйствань ды продовольствиянь министрань полавтыцякс. 2019 иень сентябрясто аравтозь Лямбирень райононь прявтокс. Казезь III степенень Славань орденсэ, Юрий Головнень ветексть максозель МР-нь Государственной премиянь лауреатонь лемесь, 2011 иестэ – Мордовиянь Прявтонь премиянь лауреатонь лемесь. Сон казезь Россиянь Минсельхозонь Почетонь грамотасо ды «Заслуженный работник сельского хозяйства Республики Мордовия» лемсэ.

Лямбирень районось Мордовиясо сехте покштнень ды касыцятнень-кемекстыцятнень ютксо. Весемезэ тесэ малав 34 тёжат эрицят. Вейсэ ялгаксчисэ эрить рузт, татарт, эрзят, мокшот, украинецт ды эштё 39 эрьва кодат раськеть. Рузтнэде тесэ эрицятнестэ 49 процентт. Татартнэде, конатне кармасть эрямо неть модатнесэ эштё XIII пингестэ саезь, – 32 процентт. Эрзятнеде ды мокшотнеде – 17 процентт.

Лямбирь велень лемесь, ловить татартнэ, ютавтови татаронь кельстэ кода «черёмуховый сад». Миненек жо маряви, сон саевсь таки эрзянь кельстэ: «лёмзёр» – черёмуха, «пире» – сад. Кода бу а улевель, тесэнь райцентрась алкукскак ёми чувто потс, коштось ванькс, морыть нармунть. Астяко, нать, Лямбирь ёнксонть пек вечксызь Саранск ошонь эрицятне ды ламот тестэ рамсить кудот, пиреть эли сыть эрямо, а роботамо ардтнить прявт ошов, конась 12 вайгельбень тарка. Райононь прявтось Юрий Иванович Голов тешксты, эрямо кудонь строямонь коряс тедедень аравтлувось (26 тёжат кавонзазь метрат) уш топавтозь. Мелень цифратнень коряс, бути Саранскоесь строясь 181 тёжа кавонзазь метрат, Лямбиресь жо – 29,55 тёжат. Республикасонть омбоце сехте покш ошось – Рузаевкась, ансяк 19 тёжат кавонзазь метрат. Газификациянть коряскак тесэ молить весемеде икеле.


Тесэ арасть мелявкст эйкакшонь чачоманть коряс. Меельце иетнестэ эйкакштнеде чачить пек ламо, секскак велесэнть роботыть кавто школат. Васенцесэнть ней тееви ремонт. Сентябрянь 1-це чистэ сон таго пешкеди тонавтницянь гайтев вайгельде. Юрий Иванович Голов марто вастовомсто минь кувать эзинек аште кабинетсэ, якинек веленть куншкакурова. Школасонть пиксезь пикси робота, витневить-петневить латось, стенатне, киякстнэ. Арсеви мазылгавтомс школань фасадонтькак. Сонзэ одкстомтомс «Образование» нацпроектэнть лувсо весемезэ явозельть 62 миллионт целковойть. Чипаенть ало цивтёрды аволь умок панжозь «Алмаз» Культурань центрась, конась одкстомтозель «Комплексное развитие сельских территорий» нацпроектэнть лувсо. Од, паро полавтовкстнэде ламо, ансяк, кода корты райононь прявтось, мелявкстнэдеяк сатышка. Седеяк пек жилищно-коммунальной хозяйствасонть. Кемголмово населённой пункттнэсэ 70-80-це иетнестэ строязельть ламо этажсо кудот. Сыненст ветязель ведь, канализация ды центральной уштома. Ней велетнесэ строявить од кудот, ансяк инженерной сеттне кадовсть некеть, сынь эль-эль важодить, сеедьстэ эрсить тамашань тевтькак. Секскак сынст эрявить полавтомс, кода ведень ванськавтомань сооружениятненьгак, эдь те ёнксонь ведьсэнть фторось 78-ксть седе ламо аравтозь норматнень коряс. Тень витемга эряви ютавтомс 101 млн целковойть.

Юрий Иванович Голов тешксты, прявтонть тевензэ неявить сень кувалма, кода одкстомтовить китне, стявтовить эйдень кужотне ды кудотне, кода важоди ломанесь эрицятнень вешемаст-мелявксост коряс. Тевтнеде ламо. Оймсемс а зярдо, секскак роботыяк недлязонзо кото чить, лиясто весе сисем. Неень шкане Лямбиресь республикань прявттнэнь покш вановт ало. Тесэ анокстыть татаронь сехте покш кенярксчинтень – Весероссиянь Сабантуентень, конась ютавтови июлень 1-2-це читнестэ. Пельков кадовсь инжетнень вастомс.

– Лямбиресь мельспаросо учи Сабантуенть, кенярдтано тень кувалма, сон карми ютамо минек модатнень лангсо. Тесэ истя жо юты татартнэнь Весемирэнь конгрессэсь, республикань Паксянь чись, «Корэш» кедьсэ тюремань коряс пелькстамот, васенцеде ютыть лишмень ардтнемат, чувтосто керсемань фестиваль, панжови этно-веле, козонь сыть коест-кирдаст, оршамопелест, ярсамопелест невтеме эрзянь, мокшонь, рузонь ды татаронь велетне, раськень моронь фестиваленть юрсо кармить ламо морот ды киштемат… Июлень 1-це чистэ Сабантуесь ушодови Лямбирь велесэ, омбоце чистэнть жо сон поладови Аксёнова веленть маласо площадкасонть. Лямбирень куншкакуросонть ютавттано концерт, чокшне ёнов дискотека ды фейерверк. Тесэ кармить морамо кода минек райононь артисттнэ, истя лияткак. Тень коряс роботы республикань Минкультось. Арсетяно, весемезэ сыть 30 тёжадо ламо инжеть ведьгеменьшка регионсто.

Содан, тей самодо мелензэ ёвтызе Татарстанонь Президентэсь Рустам Миннихановгак. Сабантуесь, кода уш ламот содыть, – те кезэрень «сокамонь кенярксчи», зярдо прядовить весе паксянь тевтне, сестэ сокаськак карми оймсеме. Кезэрень шкатнестэ сонзэ лемс эрьва велесэ татартнэ ютавтнильтькак покш той – Сабантуй. Ней жо сон теевсь Россиянь кенярксчикс, невти раськетнень ютксо ялгаксчинть, ды секскак паро мельсэ учотано неть читнестэ инжекс весень, – кортась Юрий Иванович.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».