Минек перька пек ламо ёроков ды кедьчелькев ломанть. Сынь а аштить ве таркасо, свалшкане вешнить эсест туртов од тев, варчить виест кодамояк од ёнкссо, эрить эсь седеенть ды ёжомарямотнень кунсолозь ды теить сень, мезе тенст вечкеви. Истятнэнень кандови Чаунза ёнксонь Комсомольской посёлкань эрицясь Фёдор Зорин.
Сонзэ свал ульнесь покш мелезэ теемс мезеяк истямо, кодамо зярс кияк эзь тейне. Ды аволь умок те бажамонть цёрась топавтызе.
– Кувать арсинь, мейсэ дивавтомс малавиксэнь ды весень лиятненьгак, мезе бу теемс истямо, мезенть эштё кияк эзь тейне, – ёвтни Фёдор Зорин. – Весть Интернетсэ вешнемань строчкасонть тешкстынь «ярмаконь чувто» ды лиссь статья: Белоруссиясо вейке цёрась тейсь чувто, конань тарадонзо ды лопанзо алкуксонь ярмаконь. Чувтонть сэрезэ лиссь 1,2 метрат, лангозонзо ютавтозь 1200 целковойть (петакт). Арсия, мекс бу а варчамс ды теемс мезе-бути истямо, ансяк эсь явовтыця ёнкс марто.
Цёрась ламо арсесь, кода ды мейстэ ушодомс, педе-пес арсизе важодемань весе лувонть, аламонь-аламонь пурнызе весе эрявиксэнть.
– Зярдо раськень, ялган, содавикс ломантне марясть «ярмаконь чувтонть» теемадо меленть, кармасть кандомо целковойтнень-петактнень. Вейке ялгам макссь цела сумка СССР-нь шкань петакт, омбоценть тейтерьказо колызе таштамонь кескавонть ды пурназь весе целковойтнень максынзе монень. Алтынь, зярдо миса чувтонть, велявтсынь тензэ ярмактнень колмонь покшолмасо, – тешксты Зорин.
Чувтонть лангсо важодеманть цёрась ушодызе 2020 иень медьковонь 20-це чистэ. Весементь туртов тензэ эрявсть ансяк сваркась, молоткась ды шуруптнень крутямкась. Эсензэ чувтонть пурнамонзо-тееманзо лангс ютасть кавто ковт, а вана вете ковт эрявсть сень лангс, штобу теемс варинеть кшнинь целковойтнес-петактнес ды понгавтнемс сынст вейке-вейкес. Истя, валскень 9 чассто саезь чокшнень 6 часос цёрась тейнесь ярмактнень лангс варинетнень, мейле сыргиль кудов (важодиль гаражсо) ды уш тосо тонгонесь сынст кшнинь понгавтоматнес.
– Чувтонть лангсо важодеманть прядыя тедедень Роштованть каршо, – корты Фёдор Зорин. – Тарадтнэнь ды лопатнень таркас эйсэнзэ кшнинь целковойтне ды петактне. Весе сынь эрьва кодамо шкань. Улить умонь пингень, улить СССР-нь шкань, улить неень шкань, улить омбо масторонь еврот ды центт, конат течинь чине нолдавить тевс.
«Ярмаконь чувтонть» сэрезэ лиссь 3 метрат 20 сантиметрат, келезэ – 2 метрат. Алкуксонь чувто. Лангсонзо весемезэ лововить 15 тёжат петакт, конатнень вейсэнь покшолмаст 60 тёжат 800 целковойть. СССР-нь шкань ярмактнеде весемезэ 8 тёжат. А вана чувтонть алксозо целанек теезь неень шкань 5 ды 10 целковоень покшолмань ярмактнестэ. Ды тесэ лововить 18 тёжат целковойть. Бути «ярмаконь чувтостонть» пурнамс весе петактнень ды путомс онкстамо лангс, сынст сталмост 89 килограммат.
Чувтонть лангсо истя жо ули нармунь, конась вансты сехте питней ярмактнень – евротнень, центтнэнь, икелень шкань петактнень.
Содавикс ломантне ярмактнень яла кандыть нейгак, ды кие соды, паряк, чувтось эштёяк касы-келейгады.
«Ярмаконь чувтонть» коряс Зориннэнь уш гайневтекшнесть рамицят, вешсть миемс миллиондо. Азорось зярс эзь алта, учи, паряк, кияк седе покш питне максы. Эдь истямо чувтонть теемстэ путозь ойме ды седейлембе.
Эряви меремс, Фёдор Зоринэнь лия ёнов а молиця истямо теевксэсь аволь вейке. Мелень тунда, зярдо весень куродымизь кезовось ды ламотнень кучизь важодеме кудова, цёрась тейсь мангал-паровоз. Ды теевксэсь лиссь пек вадря.
– Школадо мейле техникумсо тонавтнинь сварщикень тевентень ды эрямосонть те профессиясь монь туртов кармась покш тевекс. Лиссь истя, бути вадрясто содасак сварщикень тевенть ды пряткак парсте роботы, пек стака шкастояк а ёмат, – тешксты Фёдор Зорин. – Истя вана ютазь иень тунда важодема таркасто минек весень пансимизь кудова. Юткошкадонть кармась ламо, тевтеме аштемс жо мель арасель. Истя жо Интернетсэ понгсь тень видео, косо ёвтневсь, кода теемс лия ёнов а молиця сывелень ды лиянь мезень пидемань туртов мангал. Монь мельс мекс-бути сась теемс истямо мангал, конась моли паровоз ёнов. Васняяк анокстынь весе эрявикс чертёжтнень, домкасто ловинь весе покшолматнень, зярыяксть онкстнинь, бажинь мезентькак а стувтомс ды теемс весементь, кода алкуксонь паровозонть.
Ды, эряви меремс, цёранть весемесь лиссь ды кода вадрясто. Мангалонть-паровозонть лангс рамицяяк муевсь пек куроксто. Теевксэсь тусь масторонть томбалев, Белоруссияв.
Ней Фёдор Зоринэнь ули лия арсемазо – теемс эштё вейке «ярмаконь чувто», ансяк ней валютной. Теньсэ тензэ алтасть лездамс Германиясо ды Америкасо эриця ялганзо.
Истя жо Фёдор Зорин сови поисковиктнень вейсэндявксос. Эсь ялгатнень-оятнень марто сынь теить пек покш ды эрявикс тев – лездыть Ине Отечественной войнасо чавовозтнень вешнемасо. Эрьва кизна ардтнить Волгоградонь тюрема таркатнес. Кода тешксты цёрась, те важодемантень минек республикасо явови пек покш мель. Вешницятнень вейсэндявксось иестэ иес касы-виевгады. Ды те пек паро.
Эсь содамочитнень сюпалгавтомась ды од ёнкстнэнь тонавтнемась ашти явовтыця ёнксокс весе кедьчелькев ломантнень. Фёдор Зоринэнь эрямонь путовксозо – топавтомс арсезенть ды зярдояк а лоткамс теезенть лангс. Минь жо арсетяно тензэ од теевкст, конатне кармить кенярксокс лиятнененьгак!
Юлия Еремина