Суббота, ноября 28, 2020
Важное

Мордовиянть эйстэ войнань тюремань паксятне васолольть, ансяк велетнес кадовозь ломантне тейсть весементь фронтонть, Изнямонть туртов. Войнань иетнестэ фронтось ды тылэсь сюлмавозельть. Те ульнесь пек стака шка велень хозяйствасо важодицятнень туртов. Эрявсь пачтямс ярсамопельть фронтов, андомс тылэнь эрицятнень, максомс анокставкст промышленностенть туртов. Цёратне тукшность фронтов, секскак видемань-сюронь пурнамонь коряс весе тевтнень эрявсь топавтомс тейтерь-аватненень.


Ламотненень савсь важодемс трактористкакс. Вейкесь юткстост Мария Фёдоровна Наумова (тейтерькс Ерёмина). Сон чачсь 1923 иень сундерьковонь 2-це чистэ Орданьбуень райононь Кеченьбиесэ. Семияст покшоль. Тетядонзо-авадонзо, покштядонзо-бабадонзо башка – сисем эйкакшт. Стакаль эйкакшпораст: савсь кирдемс вачо пеке, кельмсемс, оршамопельть арасельть. Ерёминтнэнь эйкакшост ормалгадсть, кулость мельга-мельцек, живстэ кадовсть ансяк кавто эйкакшост: Маша ды Таня.

Школав Маша кармась якамо 1930 иестэ. Те иесь пек стакаль. Кеченьбиесэ ансяк-ансяк пурнавсь сельхозартель. Коллективизациянть марто ве шкане ветявсь виев бороцямо сёрмас асодамонть каршо. Классонть, конасонть тонавтнесь Маша, ульнесть 40 цёрынькат ды тейтерькат. Озадольть покш парта экшсэ нилень-нилень ломань. Школань портфельтнень таркас ульнесть коцтонь кескавнеть (лиясто пракстань), конатнень стасть аваст эли бабаст. Ручкат арасельть, ансяк карандашт. Эйкакштненень школасо обедстэ максыльть ламбамо чай.
Мария прядсь ниле класст. Школадо мейле сон покштнень марто вейсэ важодсь паксясо. 1940 иенть прядовомсто 17 иесэ тейтересь мольсь тонавтнеме трактористэнь кото ковонь курсас, конатне ветявсть Орданьбуень Куракина велень МТС-нть юрсо. Кеченьбиестэ тов мольсть кото тейтерть. Иень ютазь, чадыковсто, тейтертне велявтсть тиринь велев уш тракторсо. Те велявтомадонть авась куватьс ледстнесь. Ёвтнекшнесь, зярдо ялганзо марто пачкодсть Норолеенть трокс ташто сэдентень, талнозевсть, кие арды васенцекс. Весе пельсть: илязо каладо сэдесь. Мария Фёдоровна сыргась васенцекс. Кортыль яла: «А содан, мезе ланга арсинь се шкане. Кодамояк пелема арасель». Мельганзо лиятнеяк панизь тракторост.

Ушодовсь важодемась. Трактористтнэ важодсть кавто сменасо: валске кото чассто саезь чокшнес, чокшне 6 чассто саезь валскес. Эрьванть ульнесь нормазо – сокамс 3 гектардо аволь седе аламо.
Войнань иетнестэ кияк эзь вансто прянзо, важодсть весе виест путозь. Секскак пек покордыцякс кармась вейке тевесь. Рана валскель, тейтертне прядыльть сменаст. Лоткавтызь тракторост пересменкас. Те шкане ваксозост чийсь Яков Яковлевич бригадирэсь, кона ранявомадо мейле велявтсь фронтсто. Сонзэ стакаль обуцязо. Неизе, трактортнэ аштить, кияк а важоди. Сон каизе кшнань карксонзо ды ушодсь тейтертнень вачкоеме. Тонат – авардеме. Плугаресь неизе те тевенть ды куроксто чийсь конторав пеняцямо Яков Яковлевич лангс. Конторасонть те шкане ульнесь уполномоченноесь, сон сыргась паксяв, саизе мартонзо учётчицанть. Онкстызь соказь паксянть, ды редизь, тейтертне сокасть пельгектардо седе ламо. Бригадирэнть лангс сёрмадозель «конёв». Сон пек тандадсь: одс кучсызь фронтов. Ансяк тейтертнень эйстэ конаськак эзизе путо кедьчелькензэ те сёрмадовксонть алов.

Куватьс Мария Фёдоровна ледстнесь 1945 иень панжиковонть.
Изнямонь чистэнть сон сокась калмазыренть вакссо, тесэ гайгезевсть Мишковонь церьковань баягатне (те Чувашия Республикасо). Тейтересь тандадсь, эдь баягат чавить покш зыянонь лисемстэ. Ансяк сестэ тувталось кенярксоволь, сон яволявтсь Ине Изнямодонть. Сы иестэнть Мария Фёдоровна эштё важодсь тракторсо. Ансяк зярдо фронтсто велявтсть цёратне, трактористкань тевенть савсь кадомс. Мария зярыяксть ардтнесь Ивановань областев торфонь таргамо. 1948 иень ожоковсто, Покровонь чистэ, лиссь мирденень эсест велень цёранть Николай Игнатьевичень экшс. Наумовтнень арасельть эсест эйдест, ансяк кудост свал пешксель эйкакшонь кенярксов вайгельде, Мария Фёдоровна лездась трямс-кастомс сазоронзо эйдетнень. Тонат, эсест пельде, эзизь кадо сонзэ ськамонзо сыречинь вастомо, свал маласольть.

Татьяна ИКОННИКОВА.
(сёрмадомсто тевс нолдазь «Жабино» книгастонть материалтнэ)
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».