Понедельник, марта 01, 2021
Важное

Кезэрень шкатнестэ саезь эрзянь аватне покш мель явсть штердемантень-пельдемантень, кодамонтень ды викшнемантень. Эсь кедьсэ мазылгавтсть оршамопельтнень, нардамотнень, ацамотнень…

Течи жо ламось топавтови неень шкань технологиятнень вельде, ансяк, кенярксос, улить ютксонок кедьчелькев ават, конат весе юткошкаст алтыть викшнемантень ды кодамонтень. А эдь кода лиякс?! Эсь кедьсэ кодазь носкатне ды варьгатне сехте чевтеть ды лембеть!
Орданьбуе ёнксонь Кеченьбие велень эрицясь Надежда Михайловна Аксенова коды од порасто саезь, а вана штердеме тонадсь уш мирденень лисемадо мейле.

– Те тевентень тонавтымим Раиса Трофимовна, ававтонь патязо. Эринек шабрацек. Чокшне ланга яксилинь тенст инжекс, ванылинь, кода ёроковсто сон штерди, ды аламонь-аламонь сурень коряс монськак тонадынь, – ледстни Надежда Михайловна. – Те тевесь аволь стака, улезэ ансяк мель ды бажамо. Арази лавкасто рамат алкуксонь понань суре?!

Надежда Михайловна пингензэ перть эри Кеченьбие велесэ. Тесэ чачсь, прядызе школанзо, лиссь мирденень. Школань прядомадо мейле кавто иеть ялгацек ардтнесть важодеме Саратовав. Кудосто туильть эйзюрковсто-чадыковсто, кизэнь перть важодильть садпиретнесэ ды одов велявтыльть ожоковсто. Кудов сынст пачтясть покш машинасо, тейтертне усксть мартост сюро, умарть, чиньжарамот.

– Мейли лиснинек мирде экшс ды уш лия ёнксов эзинек ардтне, – ёвтни авась. – Важодинек эсенек велень колхозсо, мейле – совхозсо, зярс тонат эзть каладо. Мирдем Юрий Михайлович марто тринек-кастынек колмо тейтерть. Покштне – Таня ды Настя – мирдень кедьсэть, эсест семияст улить. Вишкинесь, Маша, тонавтни Саранскоень кооперативной институтонь васенце курссо.

Велесэ тевтне певтеметь: валске марто скалонть потявтомс, тувотнень, вазтнэнь андомс-симдемс, стаданть панемс, тунда пиретнень путомс, кизна – мотыжамс-кочкомс, сёксня – таргамс-пурнамс эмежтнень. Теде башка, эряви анокстамс тикше…

Весе тевтнень лангс апак вано, Надежда Михайловнань саты шказо кодамскак ды викшнемскак. Видьксты, те шкане сонзэ седеезэ кенярды ды потмоёжозо витеви. Коды эйкакштнень ды нуцькатнень туртов лембе носкат ды варьгат. Телевизоргак а ваны тевтеме, кедьсэнзэ свал салмукс ды суреть.

– Меельце шкастонть седе покш мель яван викшнемантень. Те тевесь тень пек мельс тукшны. Седе пек вечкан викшнеме кизэнь пертьпельксэнть: пиже чувтотнень, сэнь менеленть, ве ёндо неявиця леенть… Те мазычинть теезь, стувтовить весе сизематне, апаротне, ойметь шождалгады! – видькстась авась.

Бути Надежда Михайловнань викшнезь весе картинанзо понгавтнемс кудонь стенатнева – карми теке музейсэ. Ёроков авась эрьва кодамо тюсонь суринетнень вельде викшнесь локсейть, конат састыне укшныть сэнь эрькеванть, Роштовань ве, килейбулонть песэ неявиця церькова, сырнекс валозь сюронь паксянть песэ сэрей пичеть, велень кудыне эрьва кодамо ракша марто, мазый цецяпусмот ды ламо лия мезе. Весе важодевкстнэ валдот ды казить лембе.

Надежда Михайловна рамси викшнемань анок схемат, эрьва важодевксэнть лангс ютыть кавто-колмо ковт. Мейле викшневксэнть макссы багетной мастерскойс, косо кочкить-теить мазый рамка. Викшнезь малав весе картинатнень авась бажи каземс: тейтертненень, малавикстнэнень, ялгатненень.

Надежда Михайловнань кудосонзо свал ванькс, лембе, качады тантей ярсамопелень чине. Кизна кудосонзо ды пиресэнзэ ламо цецят ды, нама, эрьва кодат эмежть. Истямо сон – сырнень кедь ломанесь!

Татьяна Иконникова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».