Среда, августа 17, 2022
Важное

Ютазь пингень 1992 иень февральстэ телевидениянь ды радиовещаниянь коряс Мордовской ССР-нь Государственной комитетэнть ды сонензэ кандовиця Радиотелецентранть юрсо теевсь «Мордовия» Государственной телерадиовещательной компаниясь, мезесь лездась седе вадрясто ладямс радионть ды телевидениянть важодемаст.

Лиссть редявикс полавтомат, панжовсть зярыя од редакцият: кулянь, общественно-политической, художественной ды раськень, конантень максовсь «Сияжар» мазый лемесь. Сестэ «Сияжаронь» программатне лисильть зярыя рубрика ало, ютксост «Национальной культурась течи ды ванды», «Анась вал писательсь» («Вал вешсь сёрмадыцясь»), «Критиксь литературать колга» («Критикесь литературадонть») ды лият.

Весе 30 иетнень перть, 1992 иень апрелень 4-це чистэ саезь, «Мордовия» ГТРК-нь «Сияжар» раськень редакциянь творческой группась эфирсэ эрьва ёндо невти эрзянь ды мокшонь кельтнень ды литературань виевгавтомань ды ванстомань, раськень культурань вельмевтемань кевкстематнень, ёвтни минек раськетнень койтнеде-кирдатнеде ды фольклордонть, содавты ёроков ломантнень марто.   

Раськень теле- ды радиопрограмматнень анокстамонть лангсо эрьва кодамо шкасто важодсть ёроков журналисттнэ: Анна Павловна Исаева, Виктор Иванович Сидоров, Николай Михайлович Лобанов, Михаил Васильевич Фадеев, Михаил Васильевич Маторкин, Анна Петровна Паршина, Татьяна Ивановна Ларина, Павел Николаевич Калигин, Лидия Семёновна Годяева, Лариса Дмитриевна Дряхлова, Лина Васильевна Буянкина, Татьяна Николаевна Михалкина, Светлана Васильевна Пивкина ды лиятне. Эряви меремс, Мордовиянь журналисттнэнь эйстэ ламотне эсь профессиональной кист ушодокшнызь «Сияжар» редакциясонть.

Неень шкане «Мордовия» ГТРК-нь раськень редакциянь журналисттнэ – эсь тевень содыця специалистт, конат поладыть теле- ды радиожурналистикань ветерантнэнь виде тевест, вельмевтить ды кепедить тиринь эрзянь ды мокшонь кельтнень, раськень культуранть ды историянть.

«Сияжар» раськень редакциянть прявтсо вана уш зярыя иеть ашти эрзянь ёроков тейтересь, превей этножурналистэсь, эсь тевенть вадрясто содыцясь Ольга Чернова. Ольга Николаевна ломанесь чарькодиця, машты муемс кель-вал эрьванть марто, машты ладямс важодема лувонть. Секскак сынст редакциясь – те вейке покш семия, косо прявт таркасо ашти ояксчись. Тесэ важодемадонть кортамсто сон тешкстызе: «Сияжарось» монь туртов – те аволь ансяк эрьва чинь важодема, те – вечкевикс тев, эрямо ды уцяска! Мекс уцяска? Тевесь сеньсэ, мартон важодить виев, тевень содыця журналистт, вадря ломанть ды алкуксонь ялгат. Редакцияв свал сыть паро мельсэ, мизолкс марто! Сынь свал анокт венстемс кедь, лездамс эрьва кодамо тевсэ, маштыть ванстомо алкуксонь ояксчинть! Кода корты прявтонок Наталия Анатольевна Грановская, эряви свал молемс ансяк икелев, од тёкшс! Раськень куронь ветерантнэнь тевест каштанчисэ поладозь, минь весе вийсэ топавттано те кармавтоманть – важодтяно неень шкань вешематнень лувсо. «Сияжаронь» юбилейстэ коллеган туртов арсян кеме шумбрачи, эрямонь вийть, ламо изнявкст, од казнеть ды покш лемть!» 

«Сияжаронь» важодицятнень ютксо превей ды ёроков журналистэсь, шокшонь мазый тейтересь Елена Полшкова. Елена Дмитриевна эрязасто ды тевень содазь топавты весементь, апак пеле кунды куш кодамо тевс. Сонзэ содасызь аволь ансяк Мордовиясо, васоло регионтнэсэяк, косо аволь весть ульнесь репортажонь анокстамсто. Седе сеедьстэ самай сонзэ пельде весе теевить содавиксэкс соцсеттнесэ «Сияжаронь» куросо «пси» кулятнень марто.

Александр Данильчев – эрзянь цёрась, кона ёндолкс совась редакциянь коллективентень, эсь чевте обуцясонзо, лиятнень марямосо-чарькодемасо, мизолкссонзо солавтынзе весень седеест. Эрьва стендапось – те вишка история, конанть мельспаросо пачти корреспондентэсь. Александр Алексеевичнень пек малавикст эрзянь, мокшонь кельтнеде, тонавтомадо тематне. Ды те а стяко. 2021 иень пелькстамонь невтематнень коряс, сон – Весероссиянь тиринь келень сехте вадря тонавтыця.

«Од тештинекс» редакциясонть лемдить Екатерина Евстигнеевань. Валдо ойме, чевте седей, паронь арсиця! Сон вадря журналист домка содамочи ды ёрокчи марто. Важодемань нурька шканть перть сонзэ репортажонзо невтевсть «Финнэнь-угрань мастор» тележурналонь нолдавкстнэсэ, Смотрим.ру платформанть лувсо весероссиянь проектсэ, конасонть Екатерина Ивановна ёвтнесь Мордовиясо эриця эрзятнень, мокшотнень, татартнэнь раськень койтнеде.

Редакциянь эштё вейке журналистэсь, мокшонь кельсэ нолдавксонь ветицясь – Пётр Капков. «Сияжарсо» важоди 1993 иестэ саезь. Сонензэ пек малавикст велень эрямодо, велень ломантнеде, морамонь койтнеде тематне. Теде весемеденть мельспаросо ёвтни эфиртнэсэ. Ламо шкань перть паро важодемань кис Пётр Николаевич казезь Россиянь Президентэнь Шнамонь конёвсо.

Тесэ пурнавсь алкуксонь команда, раськень журналистикань профессионалт. «Сияжаронь» корреспонденттнэ ламоксть лиснесть республикань, весероссиянь ды регионъютконь пелькстамотнень изницякс, ламот тешкстазь покш казнесэ. Ды кода тешкстыть сынсь, весе теньсэ покш путовксозо «Мордовия» ГТРК-нь прявтонть Наталия Анатольевна Грановскаянь. Этножурналистиканть виевгавтомга ды келейгавтомга, лия раськетнеде содамочитнень сюпалгавтомга сон свалшкане кучни командировкав раськень регионтнэсэ улиця ВГТРК-нь филиалтнэс. Пек лезды «Сияжаронь» од проекттнэнь ды арсевкстнэнь топавтомасо, свал кармавты явомс мель пелькстамотненень ды фестивальтненень, конат улить журналисттнэнь туртов. Ды кода тешкстыть «Сияжаронь» важодицятне, сон алкуксонь прявт!

30 иеть – те мазый од пора. Секскак «Сияжар» куронь ялганок туртов арсетяно свал улемс одокс, анокстамс ды невтемс а стувтовикс сюжетт, теемс эштёяк ламо тиринь раськень келень, культурань, историянь ванстомга-виевгавтомга! Уледе шумбрат!

 

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».