Четверг, марта 28, 2024
Важное

  Тамара Сергеевна Баргова  чачсь 1955 иень  умарьковонь (августонь)  13-це чистэ  Покш Игнатбуень Андреевка велесэ. Профессиянь коряс сон – журналист. Прядсь М.Горький лемсэ Уральской университетэнь  журналистикань  факультет (Екатеринбург, 1977 ие). 

Сонзэ прядомадо мейле сась эсензэ чачома районов, кармась тосонь «Восход» газетань корреспондентэкс, мейле  журналистикань тевензэ поладызе «Эрзянь правда» газетасо, косо кемголмово иень перть  васня корреспондентэль, мейле отделэнь прявтоль. Седе тов эрямо кизэ ветизе книгань  издательствав, конань туртов макссь аволь вейке кемень иеть.

         Сови Россиянь Журналистэнь вейсэндявксос (1982), Писателей вейсэндявксос  (2003).

         Васенце сёрмадовксонзо – новеллат, зарисовкат – лиснесть  райононь «Восход» газетасо, зярдо тонавтнесь кавксоце классо. Мейле сынь ульнесть  пурназь вейс ды нолдазь башка книгас, конань лемезэ «Вечкемань усия» (1997). Седе тов мельга-мельцек кармить лисеме зярыя книгат, ков совить художественно-публицистической очеркензэ ды зарисовканзо, неть: «Покш Игнатова» (2000), «Близкий сердцу край» (2003) ды лият. Весемезэ нолдась 13 книгат.

         Те, кода мерить, «коське» фактт. Сынст  экшсэ – эрямонь аволь шожда ки, конань эзга молезь, вастневсть эрьва мезть: певтеме стакачить ды пирявкст, седеень раужкавтыця ризкст ды пильге лангсто правтыця мелявкст. Ульнесть, нама, кенярксткак, конатнень ютксто  вейкесь те  – эсензэ тевесь. Вейкеяк чизэ эзь ютне ды нейгак  а ютни апак сёрмадо. Журналистэнь тевентень вечкемась умок уш  совась сонзэ верьс  ды а максы оймамо седеентень. Пандемиянь шкасто кудосо аштемстэяк кедьстэнзэ а нолдтни ручканть. Кортыть, кенерсь сёрмадомо зняро, неть сёрмадовкстнэ   2-3 книгаскак а кельгить…

 

«Эряви вечкемс сень, мезе теят»

        

         Тамара Сергеевнань  марто содатано умок.  Ловт, вейке шкасто сынек «Эрзянь правдав» важодеме. Мон – школадо мейле, сон – Уральской университетэнть прядомадо мейле пельиень ютазь.  Сестэяк, нейгак дивамос пракшнан, косто сайни сон вийть ды шка сёрмадомс апак лотксе. Теке кевкстеманть аволь весть максния эстензэ Баргованеньгак. Тамара Сергеевнань валонзо некетельть: «Эряви вечкемс сень, мезе теят».

         Кода сонсь вечксы эсь тевензэ, монень савсь неемс ламоксть. Весемеде а стувтовиксэкс ульнесь кортамонок, кона ульнесь, зярдо Тамара Сергеевна  «Эрзянь правдасто» туемадо мейле кемгавтово иеть кода важодсь Мордовиянь  книгань издательствасо. Сакшнынь кедьстэнзэ  интервьюнь саеме. Эсень сёрмадовксом сестэ ушодыя истят валтнэсэ: «Мезесь васенцекс каяты сельмс сонзэ кабинетэнтень совамсто – книгатне. Сынь эрьва косот ды эрьва кодат: покшт-вишкинеть, эчкть-човинеть. Пешксеть сындест стенанть келес ды сэрьс стявтозь лавцятнеяк. Вачказь-путнезь аволь кода понгсь. Эрьва книгась таркасонзо, ды весе вейсэ сынь ладсезь истя мазыйстэ, теке выставкань экспонатт.

         Ютксост зярыя фотографият. Вейкесэнть – чова чачо ава. Эчке черьбулонзо кодазь кавто пулос ды сюлмазь седикеле ладсо – кавто ёнга. Вановтозо чевте, лембе, кодамо эрси паронь арсиця, кежень а кирдиця ломаненть.

         - Те авам.- Кабинетэнь азоравась невтсь лия фотографиянть лангс.- Оно се – тетям.

          Лангстонзо вансь од, мазый цёра.

         - Те вана – покштям… Велесэ кудонок ней арась. Фотографиятнень тей кандынь. Кадык теске… сельмем икеле. Варштан лангозост – седеезэм  седе шожда».

          Седе тов Тамара Сергеевна ламо мезе ёвтнесь эсензэ эрямодонзо, вишка пингедензэ.  Эйкакшпингесь, кода эйдень лавсь, нурсевти-китордовты седеенть куломазот. Те сехте валдо ды  мазый шка. Кадык эрястькак, кода мейле сёрмадсь, «нужасто нужас, ярмактне ковгак а сацтовильть. Ульнестькак сынь аволь покшт: аванень библиотекарень тевензэ кис пандсть весемезэ кемнилее целковойть. Тетянсетне, нать, а эрсильтькак, важодиль колхозсо: сеть шкатнева тосо пандыльть аламо». Ялатеке эйкакшпингесь кадсь сехте тантей ледстнемат.

«Течи. Ванды. Свал»

        

                  Весе, мезе ули ломаненть обуцясо парось, путови самай се шкастонть, берянесь таштави мейле, покшсто касозь.  «Обуцям монь а ловсак чевте калацякс, лиясто казямокскак ды кежеекскак эрсян. Кодамокс улевлинь, а улиньдерявольть перькам авам, тетям, кавто патям? Ансяк вана парось сеске а редяви. Сонзэ чарькодеме карматано шкань ютазь» - видькстась сон.

         Эрямось – те чувто. Ундокстнэ – тиринь  кудось, тарадтнэ – покштятне-бабтне, тетятне-аватне, лопатне – эйкакштне. Тетязо Куманёв Сергей Филиппович колхоздо мейле важодсь «Восход» райгазетасо. Малав эрьва чи ялго ютыль кемень вайгельпеть. «Сядо иеть эрян»,- кортыль. Зярдояк эзь пеняця шумбрачинзэ лангс.          Калмамодонзо мейле кармась чарькодеме, кодамоль тетязо валдо оймель, чевте седеель. Вечкиль раксеме-пеедькшнеме, ломань ютксо – оймень витицяль, ёжонь паролгавтыцяль. Парсте седиль баянсо, веленек икелензэ киштнеме-морсеме лиснесть.

         Кулось – ней уш а пандсак сонзэ паронзо ды а ёвтат тензэ чевте валт.  Тамара Сергеевна потмо валонзо тетядонзо ёвтынзе эсь книгасо. «Течи. Ванды. Свал» повестесь тетядонзо.

 

 

Книга ютксо касозь…

          

         Авазо Людмила Васильевна Куманёва  урозоль, кассь эйдень кудосо. Тонавтсь эйкакшонзо а пелемс стакачиде, кемемс ансяк эсь вийтнень лангс.

         Сы шкань поланзо марто вастовсть культпросветучилищасо.  Кавонест тосо тонавтнесть. Виде рунго, мазый чачо, кувака черь («эрьва пулозо кумажадо алга, эрьванть эчкезэ кедень эчксэ») тейтересь сеске солавтызе эрзянь цёранть седеензэ. Свадьбаст ваномо сакшнось весе велесь.  Дивсесть одтнэнь мазычист лангс.

         Авазо аламо мезе чарькодсь кудоютконь тевсэ. Тесэ секе чистэнть стявтызь каштомо икелев:  лисить велень цёра экшс, иля пеняця стакачи лангс.

          Пель иень ютазь весе велесь сакшнось ваномо, кода мазыйстэ пурназь-наряжазь Билянь (истя мерсть велесэст Куманёвтненень) кудост. Шаршавт-а шаршавт – сельметь кадовить мазый викшневкстнэнь лангс. Велень аватне сакшность натой пельдензэ тонавтнеме: парсте кодыль ды викшниль. Кудосост свал пек ваньксэль. Авазо а мадиль, бути тевтне апак тее, апак шля киякстнэ-мезтне. Тенень тонавтызе тейтерензэяк. Кода сизезь сон аволь са, а озы ды а мади оймсеме, бути кудосонзо мезеяк а истя.

         Людмила Васильевна эрзякскак тонадсь, кияк эзь фатяяк, кода. Васня вейке валнэяк эзь чарькоде. Ютась таго-зяро шка, кармась кортамо – пештть чулгонесь. Велень эрямонь койтненень тонадсь, буто теске чачськак. Тонадсть сонензэяк. Ды пек вечкилизь. Сехте пек эйкакштне. Сеть, кода неилизь, сеске чиильть: уряж ды уряж. Муильть костояк эрьгине, кандылизь сонензэ: «На, уряж, те тонеть». Людмила Васильевна ламо иеть ульнесь библиотекарекс. Сыльть книга мельга ды кевкстнеме ушодыльть, мезе се-тона книгасонть ёвтневи. Людмила Васильевна пек вечксь ловномо. Кодак библиотекав сыль од книга, васня ловнылизе сонсь. Секс содылизе, мезде сёрмадозь эрьвасонть.

         Книга ютксо касозь, эйкакшонзояк тонадсть сынст вечкеме вишкинестэ саезь.  Свердловскойсэ тонавтнемстэ тейтерензэ туртов  Герцен лемсэ библиотекась теевкшнесь омбоце кудокс. Эрьва чистэ сыль тов ды аштиль-ловныль пекстамозонзо.

         Аванзо-тетядонзо башка Тамарань кисэ пек мелявтсть сыре патянзо Прасковья ды Нина Филипповнатне. Меельцесь эряськак кедьсэст. «Сыре патям кото иесэ прась эзем лангсто, пек томбизе карязонзо – больницяв-ков эзизь сайне, истяк пингезэнзэ кадовсь горбункс. Часиязо ульнесь – минь, ялаксонзо эйкакштне. Понгавтсамизь – вейкенть лавтов лангс, омбоценть – кедьпес, чинь-чоп мартонзо минь»,- сёрмады мейле эсь ёвтнемасонзо Тамара.

 

 

 

 

Тонадсь улемс анококс эрьва мезентень

        

         … Косто саевсь сёрмадома тевентень вечкемась? Паряк, тетянзо лангс ванозь?  Куманёв Сергей Филиппович важодсь Покш Игнатбуень «Восход» газетасо.  Вишкапингстэ Тамараяк ульнекшнесь редакциясо, содынзе тосо важодицятнень. Сонськак тов кармась сёрмалеме школасто тонавтнемстэ саезь.  Те лездась тензэ туемс Свердловскоев журналистэкс тонавтнеме. Районов се шкастонть тосто сакшнось тердема. Арсесть-тейсть, кинь кучомс, кочкизь Тамарань.

         Свердловскоев сон сыргась кавтолдозь ды пелезь: кода тосо карми ськамонзо? Весемеде стакаль васенце иестэнть. Весть автобуссо ардомсто та-кить атят-бабат сёлгадсть. Марясы, эрзят. Сеть сёвныть, сон мельспародонть кутморямс сынст аноколь.

         Эрзятне кува ансяк а эрить. Уралсояк сындест байтяк. Ламо ломанть тов тусть эрямо Андрей велестэяк. Свердловскойсэ эрясь Н.Я. Куманев ды сонзэ авазо Матрё баба. Сынь полавтызьгак тензэ семиянзо.

         Васоло ошсо эрямось  ды тонавтнемась ульнесть сехте покш экзаменэкс: цидярдат – ломанекс лисят, а цидярдат – иля пеняця. Велень тейтерь, ошось тензэ марявсь тусто ды чопода вирекс, косо кинь-янонь апак сода а фатяткак кадоват ды ёмат. Сон эзь ёма. Весе шканзо макссь тонавтнемантень. Мезесь сатотсь тензэ вельть шождасто, мезенть кис пондо ливезь савкшнось валомс. Курсасост ськамонзо парсте содылизе газетань нолдамо тевенть. Козонь мезе эряви путомс, кодамо материал козонь ладямс, кода мазылгавтомс сонзэ – тень кис свал путнильть «вететь». Икелень деканост В.А. Чичеланов, кона тонавтсь эйсэст, весень икеле шныль яла эйсэнзэ. Журналист, келя, тейтерь, эйстэть лиси.

         Практикасо улемстэ кучнизь колмо таркава: Казахстанов, Амурской ды Челябинской областев. Комсь иесэ тейтерентень, кона чачома веледе ды се оштонть башка, косо тонавтнесь, ковгак эзь пачколеяк, сыргамс истямо васоло таркав – понгомс космосов. Лия масторт, лия ломанть, лия койть – «велестэ велес, районсто районс а ловови, зяро вайгельпеть» ютась. Самолётсо, поездсэ, лишме лангсо, ялго… Казахстансо улемстэ удызе эрявикс станциянзо. Лиссь пакся куншкас. Мезе теемс – а соды. Кода понгсь ды мейсэ понгсь пачкодсь-таки ков эрявсь.

         Неть практикатне тонавтызь ламонтень. Васняяк улемс анококс эрьва мезентень. Пулев паксятнева ардтнезь,  чертнень тюсосткак лиякстомильть. Сеедьстэ ярсамскак а зярдоль. Чинь перть понги кургозонзо кши куво – сеяк паро. Кудов сазь, репортаж велькссэ веньперть ашти-нувси – валске номерс  сонзэ учить. Вана зярдо Тамара кармась содамо журналистэнь кшинть танстензэ. Университетэнть прядызе 1977-це иестэ ды сеске ушодсь важодеме эсь райононь «Восход» газетасо.

 

 

 

«Сынь тонавтымизь, кода эряви вечкемс эсь тевенть»

 

         Пель иень ютазь  сась «Эрзянь правдав». Тесэ вастызь истя, кода свал эрси, зярдо коллективс сы од ломань. Цёратне пильгть-сэрть онкстнесть. Ульнесь мезе онкстнемс. Се шканть кандомс неень шкантень Тамара топ-модельтнеде мейсэяк аволь кадово. Аватне келят-мелят ушодсть: «Те, беть, сюпав леля тей эцизе. А, паряк, тетязо редакторонть марто кумт-сватт. Сынь эдь вейке районсто».

          «Эрзянь правда» газетань  се шкань редакторось П.П. Борейкин кадык алкукс ульнесь Покш Игнатова районсто ды парсте содылизе Куманевтнень семияст, васоло роднякскак эзь саво тенст.

         Тамарань кисэ пшкадиця ялатеке ульнесь. Ансяк аволь тетязо ды аволь кияк эсест роднясто. Те – эрзянь содавикс сёрмадеесь И.А. Калинкин, кона се шкастонть «Сятко» журналонь редактороль.

         Озавтызь партотделс, косо прявтокс сестэ ульнесь Н.М. Симдянов. Ломанесь сон – ой-ой! – кодамоль. Истятнэде кортыть – эсь тевень уре.  Истя вечкилизе тевензэ, удомстояк, маряви, «строчась». Вейке чис праксташка  статья сёрмадыль ды ки соды зяро «тютелькат». Эрьва номерсэ ансяк сонзэ лемезэ. Од журналистэсь понгсь теке мерят нуема шкасто кузницяв, косо чинек-венек апак лотксе човить-тоцить пелюмат-тарвазт. А зярдоль пря кепедемс. Те эно мезеяк. Тамара стакачиде эзь пеле. Ансяк вана Симдянов ломанесь истямоль: мезе илязат сёрмадо – аволь истя. Сонсь буто акежеель, кортыль кода тетясь тейтерензэ марто. Ансяк вана се, мезе сёрмадат, зярдояк мелезэнзэ эзь тукшно. Вейке цёра-журналист, кона понгонесь сонзэ кедь алов (ней сон содавикс писатель), сизесь сонзэ черькстнематнеде ды весть тейсь истя: саизе эсензэ Симдяновонь вейке статьянзо, полавтнинзе тосо лемтнень ды цифратнень ды максызе тензэ ловномс. Арсесь: ней уш а токасы  эсензэнть. Ды пекень  ёзазь мейле ракась, зярдо кандызь те статьянть педе пев изазь-керсезь.

         Понгонесь пельдензэ Тамараненьгак. Кучсы ковгак ды мери: «Материалось ванды столем лангсо улезэ». Ды – верть судостонзо – ванды валске марто сыль анок репортаж марто. Симдянов прянзояк а кепедьсы, чирк-чирк – черькстнесы-изасы ды венстясы: «На, максык печатамс».

          Ниле иеть аварькшнесь, мекс истя нарьгить материалонзо лангсо. Весть та-кие превс путызе: тон, келя, материалот видьстэ редакторонтень макснек. Истя тейськак. Вансы, статьянзо, репортажонзо апак токше кармасть лиснеме. Ды – боц – путызь отделэнь прявтокс. Ламонь туртов те ульнесь маней чистэ пурьгинекс. Нолготуло, ды уш отделэнь прявт! Совсесть пеняцямо Борейкиннэньгак. Кода истя лиссь, тесэ кой-кить пинге аштить вейке таркасо, а те цягадайкась ниле иес кассь оно ков?

         Борейкин, кода калгодо пештесь, мейсэяк а чулговиль. Мезе мериль, се карми улемеяк. Весе пельсть эйстэнзэ теке толдо. Кабинетэзэнзэ совамсто кеменьксть крёстылизь коняст ды коморо таблеткак симильть: стяко атясь эзь тердтне, секень вант, мезеньгак кис карми сёвномо. Сёвнось сон тевень кис: кинь чумонзо кувалма ильведьксэсь лиссь, кить аволь истя сёрмадсть, кинь келезэ «чувтонь». Секретариатсо понгавтозель ветеце полоса, козонь эрьва чистэ сёрмалилизь сеть материалтнэнь лемест, косо нолдазельть ламо ильведькст. А весть ютнесь Баргова лангаяк. Сон зярдояк эзь киште «начальства» икеле, сэтьме псакинекскак эзь аште. Лият сельме икельга ведь ладсо ацавить, удалга – сельгсэ пургсить. Сон, кода тонавтызьгак тетянзо-аванзо, кортась видьстэ. Кой-зярдо те эзь вечкеве.

         Борейкинэнь, кода эрьва прявтонть, ульнесть вечкема ломанензэ. Совась-эзь сова сынст юткс Баргова – кияк а ёвтасы: Борейкин ней арась. Весе содасть, редакторось вечксь сетнень, кить эзть нузялдо, кить писть-палсть тевсэст. Тамара Сергеевна седе а ков ладясь сынст юткс. Сон алкукс сэредсь газетанть кисэ. Мелявтсь, кода теемс сонзэ седе ловновиксэкс, мельстуицякс. Текень кис вешнесь од темат, мазылгавтсь-сюпалгавтсь келензэ. Симдянов ды Борейкин – неть кавто ломантне свал кадовить сонзэ туртов малавиксэкс. «Сынь тонавтымизь, кода эряви вечкемс эсь тевенть». Кенярдсь, зярдо Симдяновнень макссть Мордовиянь Госпремия ды пек ризнэсь, зярдо сыре журналистэсь кулось. Куломстонзояк, келя, кедьсэнзэль ручка.

Весемеде покш мель яви ломанентень

         …Сёрмады эрьва мезде.  Косо мезе лиссь, кодат изнявкст теевсть республикасонок (ды аволь ансяк).  Кода молить тевтне велень хозяйствасо, производствасо – неть тематненьгак секе тев токши. Сонзэ кедь алдо лиссть ламо книгат, косо сон ёвтни минек кой-кона предприятиятиятнень эрямопингедест. Сайсынек, «Электровыпрямитель», «Теплоизоляция» АО-тнеде книгатнень сёрмадынзе Т.С. Баргова. Нолдась книгат эсензэ райондонть («Большое Игнатово»), Лямбирде, Кочкуровадо. Лиятнесэяк ули сонзэ таликазо. Саемс «Партизанская слава» книганть. Кувать эйсэнзэ пурнасть. Ламо шка лангсонзо савсь аштемс Баргованеньгак. Книгась сеске редязель ды путозель тензэ покш питне. Сонзэ теицятненень Т.С. Баргованень ды С.Н. Леонтьевнень максозь Мордовиянь Госпремия (1999).

          Весемеде покш мель Баргова яви, нама, ломанентень. Сёрмады аволь ансяк кодамояк «покш» ды содавикс ломанде. Героензэ – велень ават-бабинеть, цёрат-атинеть, истят, кинь эрямост эзь ладяво, эзь туе паро киява, кинь ломанекскак, паряк, эзть лово. Тамара Сергеевна паро ёнкст эйстэст таргси, ойместэст валдо таркинеть вешни. Эсест велень ломантнеде малав эрьвадонть сёрмадсь. Ды истя – те ломанесь, теке мерят, ашти икелеть.  Седеень апак тока а ловновить «Мазый пепе», «Сёрма», «Мико-богатырь», «Чапаня Мата» ёвтнеманзо, конатне саезь  эрямосто.

          Косо мезе паро тевде мариль ды паро ломань вастыль, цела поэма ладсиль-сёрмадыль. Ламот сёрмалесть Покш Березникбуень Кузым велестэ эрзянь цёрадонть Н.А. Кручинкиндэ, кона теизе-пурнызе «Поиск» отрядонть, ней сон – Мемориальной музеень прявт. Ды ялатеке истя лембестэ, истя вечкезь, кода «Пси седейть» эсензэ очерксэнть Т.С. Баргова ёвтни те ломанденть ды сонзэ эрямодо, монень маряви, кияк эзь машто.

          Зяро ломанть, зяро уцяскаткак. Тамара Сергеевна Баргова зярыя очеркть алтась художниктненень. Вейкесэнть – «Апак  прядо кортамо» - ёвтневи Виктор Вечкановдо. Покш художникель, киньгак ёнов а молицяль – апак учо кулось. Тень кувалма Тамара Сергеевна нейгак ризны, сестэ, зярдо лиссь те кажось (те ульнесь 1995 иестэ), апарось сезезь сезсь журналистэнть седеензэ. Вечканов роднядояк малавиксэкс тензэ ульнесь.

Муемс виень ды оймень коряс тев – те покш уцяска

        

         «Олячи ды уцяска» очерксэнть таго ёвтневи художникте. Те – Николай Рябовдо. Эйсэнзэ  Баргова истя парсте ды келейстэ панжизе сень, мезе бажась невтемс художникесь эсензэ артовкстнэсэ, кода артома тевсэ чарькодиця искусствовед.  Улема, тенень тонадсь мирдензэ пельде. Анатолий Баргов – содавикс художник. Сонзэ кедьсэ сёрмадозь артовкстнэ ней косо ансяк арасть. Сынст эйсэ сон невти аволь ансяк  перть-пельксэнть мазычинзэ, эсензэ раськень ломантнень чачост-обуцяст, коест-кирдаст. А стяко тензэ максозь Мордовиянь народной художникень лемесь. Вечкемась, кона сюлмизе сынст эрямост,  кадык эритькак  ней умок уш башка-башка, те шкас эзь куло. Тамара Сергеевна вансты неть ёжомарямотнень седей потсо, ансяк лиясто панжи эйсэст конёв лангс. «Сон теи мазычинть ды невти сонзэ лиянень – кедесь кунсолы эйсэнзэ. Виев кедесь, мазый. Сестэяк, зярдо кирди кисть, зярдо вети машина, зярдо кепеди менельс эйкакш…» - неть   валтнэ алтазь мирденстэнь ды истя сёрмады ансяк вечкиця ломань. 

         … Уцяска. Мезе те истямось? Эрьвась сонзэ неи эсензэ ладсо. Вейкесь уцяскав, зярдо лишной трешник-целковой тензэ костояк пры. Омбоцентень саты вина цярка кандомс, ды кеняркстонть-уцяскадонть се ломанесь анок моданть кутморямс ды палсемс. Улить истяткак: лиянень  паро – сынст потсо сукст карыть, лиянень берянь – сынь кенярдыть.

         Барговань уцясказо – Людмила тейтерезэ ды се тевесь, конань муизе эсензэ вийтнень ды ойменть коряс. Мезе илязо лисе эрямосонзо, седей оймавтни тевсэ.

         … Писателесь, кода артистэськак, келя, весть эрямсто сядо эрямот эри. Журналистэсь – седеяк ламо. Киде ансяк а сави сёрмадомс. Эсеть кисэ лиясто эрямскак а кенерят.

         Тамара Сергеевна Баргова  эри эсензэ очеркень, повестень, ёвтнемань геройтнень эрямосост. Эрьванть сон ютавтызе седеензэ пачка, эрьванть оймес совсесь, эрьванть сэредькссэ сэредсь. Пурнынзе сон неть очерктнень-ёвтнематнень ды нолдась книга. Лемдизе – «Вечкемань усият» (1997). Таго вечкемась васенце таркасо. Кода сонтемензэ? Ломанесь сестэ эри, зярдо вечки.

         Книганть вастызь кие кода. Веенстнэнень сон сеске седейс токась, омбонст эрьва кода «лаксесть» книгантькак, сёрмадыцянтькак. Мезекс, келя, эсензэ эрямонть штавтызе весень икелев? Те кона ёндо варштамс. Произведениянть питнезэ аволь ансяк  мазый валтнэнь таркадо-таркас путнемасо, сонзэ питнезэ сень эйсэ, бути эйсэнзэ ули  эрямонь видечи, бути сон сёрмадозь апак манче, потмоёжонь апак кекше. Те весе ули Барговань сёрмадовкстнэсэ. Секс сынь ловновикст ды вечкевикст.

«Панжан конёвонтень оймем…»

         Вейке очерксэнзэ Тамара Сергеевна видькстась: «Эрьва валске сыргозян вейке арсема марто: аволь истя эрян, шкам эйсэ салсить стяконь тевть… Бути ансяк веть, зярдо весе оймсить-мадить, кудо потмось општ мери, кундан тевезэм. Вана столем, валдось пры ванькс конёвонть лангс… Майсян. Арсян. Лиясто конёвось истяк кадовияк тешкстэме. Ды ялатеке шкась эзь ёма стяко… Мон панжан конёвонтень оймем, ризксэм ды, кеман, шождалгавтса теньсэ эсь ёжом.

         Паряк, теде истя, весеменень марямга, а эряви ёвтнемс. Ансяк… кие соды, бульчом, кинь-бути монь ладсо седеензэ пешти а чарькодевикс ризнэма-талнома, ды валом вана токи эйзэнзэ ды валдомтсы седеензэ?..»

         Арасть кавтолдомат, Тамара Сергеевна Барговань валтнэ токить ловныцянть оймес ды валдомтсызь седеензэ. Тень мон эсень пельдеяк мерян, кода ловныця, кода Барговань шкинеманзо вечкиця, сонзэ кисэ, кода эрзянь пек паро аванть кисэ,  мельспаросо аштиця. Тынкак тердян,  вечкевикс ловныцят, муинк ды саинк кедезэнк Барговань  ёвтнеманзо, очеркензэ. Ды тынсь марясынк, кода сынст ловномсто теке ванькс лисьмапрясто карматадо корштнеме тантей, симемань явавтыця ведте.

Раиса Щанкина

         Умарьковонь (августонь) 13 чистэ Т.С. Баргова тешксты чачома чинзэ. Ёвтатано тензэ седейстэ молиця лембе валт. Арсетяно шкинемасо од тёкшт, од муевкст, эрямосо шожда ки,  валдо уцяска,  кеме шумбрачи ды седе ламо кемевикс ялгат-оят, книгань ловномо вечкицят.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».