Четверг, сентября 29, 2022
Важное

Кода содатадо, Эрзянь келень чинть тешкстамо кармасть 1993 иестэ саезь Эрзянь келень идемань фондонть ушодксонзо коряс. Тешкстамо шкакс ладязель чись, зярдо чачсь эрзянь васенце профессорось Анатолий Павлович Рябов. Те – чадыковонь (апрелень) 16-це чись.

Се шкастонть саезь те чись кармась улеме весе Россиянть келес ды сонзэ томбале эриця эрзятнень Покш чикс. Сонензэ анокстасть ды вастсть эйсэнзэ келейстэ эрьва косо. Шкань ютазь сон яволявтозель Эрзянь ды мокшонь келень весероссиянь чикс. Сон ней тешкстави ламо таркава, косо эрить эрзят ды мокшот.

Коень коряс Эрзянь келень чинть тешкстамозо ладязель апрелень 16-це чистэ. Эрзятне те коенть эзизь кола тедедеяк. Вастовоманть анокстыцясь ды ютавтыцясь – Эрзянь раськень койтнень-кирдатнень, келень ванстомань ды кастомань-кепетемань фондось, кона теезь Эрзянь келень идемань фондонть таркас ды конань прявтсо Т.И. Ларина.

Вастовомантень сакшность ломанть Мордовиянь ламо буетнестэ. Покш инжетнень ютксольть МР-нь Культурань, национальной политикань ды архивень тевтнень коряс министрань васенце полавтыцясь А. И. Карьгин, МР-нь Госсобраниянь Председателень прявт советникесь И. М. Москаев, Регионъютконь эрзянь ды мокшонь раськень вейсэндявксонь прявтось Ю. А. Мишанин.
Вастовомась, кода свал, панжозель «Тюштя» моросонть. Сонзэ серьгедизь «Морама» ансамблясонть морыцятне Г. Дулкин, И.Ацапкин. Мейле кирвазтезель штатол. Тень теизе «Масторава» эпосонь пурныцясь А. М. Шаронов.
Нурька шкань каштмолемасо ледстязельть сеть ломантнень валдо лемест, кить тусть эрямосто меельце шкастонть. Ютксост Донбассо тюрематнесэ маштовозтнеяк.

Мезе од чачсь эрзятнень эрямосо, кодат лиякстомат теевсть минек культурасо, кить тешкстызь юбилеест ютазь иенть перть, теде ёвтнесь эрзянь содавикс авась Р. Д. Жегалина. Римма Дмитриевнань эрямозо сюлмавозь эрзянь келенть марто. Сон ламо иеть тонавтсь школасо. Пенсияв туезьгак, весе сень, мезе сон таштась эрямонзо перть, бажи пачтямс лиятненень Интернетэнть вельде. Сон панжсь зярыя курот Одноклассниксэ, ВКонтактсо. Сынст вельде вети видеоурокт, вейс пурны эрзянь моротнень, максни минек раськень ломантнеде кулят, лади сюлмот Россиянть келес срадозь эрзятнень марто. Вейкесь эйстэст – Ирина Петрова – эри Самарасо. Тейтересь снимси видеот, тонадсь натой эрзянь кельсэ мультфильмань снимамо, конатнень путни Интернетс. Иринань паро тевдензэ умок уш марясть Саранскойсэ. Сеедьстэ тердтнить эйсэнзэ инжекс. Ульнесь сон эрзятнень ютксо се чистэнтькак ды вастовома шкастонть овсе эзизе лоткавтне камеранзо. Лисни, учок пельдензэ од видео.

Вастовомасонть шнамонь конёвсо ды казнесэ тешкстазельть сеть ломантне, кить покш путовкс тейсть тиринь келенть ванстоманзо лезэс.
Покш казне максозель од морыцянтень Артём Мамаевнень. Сон тешкстазель МР-нь Госсобраниянь Почетной грамотасо.
Кортамотнень поладсть моротне. Морыцятнеде пурнавкшность аволь аламо. Ульнесть эйкакшткак. Морамо сынст тонавты «Мерема» ансамблянь прявтось Е. Модина.

Покш мельсэ вастозельть МР-нь народной артисткатне Анна Атласова ды Нина Спиркина, МР-нь заслуженной артисткась Елена Воронина, «Келу» ансамблясо морыцятне Антонина Масягина, Ирина Рузанкина. Меельце морыцясь кезэрень лувсо лайшемань моросонзо токинзе весень седеест.

Оймес лембе ёжо валсть Ицялбуестэ «Вастома» ансамблясо морыцятне. Сынь сакшность Ицялонь Культурань центрань прявтонть Н. А. Буяновань марто. Надежда Александровна весе седейсэ мелявты эрзянь келенть уцясканзо кисэ, ламо теи сонзэ ванстомга.
Вайгелест седе а ков парсте ладясть колмо аватнень, конат сакшность Покш Игнатбуестэ Р. Д. Жегалина марто.

Вастовомань тёкшокс ульнесь Степан Эрьзянень кеврунгонть икелев цецянь путомась.
Васолдо сыцятнень ды весе пурнавозтнень туртов анокстазельть тантей каванявкст.

Раиса ЩАНКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».