Течи тешкстави Культурань важодицятнень прявт кенярксчись. Сон истямо жо валдо, мазый ды весёла, кода сетнеяк, кить те сферанть марто сюлмизь эсь эрямост. Сынь свалшкане кепедить оймеёжонть, казить кеняркс ды валдо мельть-арсемат.
Течинь чине минек республикасо культурань ёнкссонть важодить тёжат ломанть. Сынст юткс кандовить «Умарина» моронь ды киштемань государственной ансамблянь артисттнэ. Неть читнестэ вастовинек сонзэ прявтонть, Мордовия Республикань культурань заслуженной роботникенть, хормейстерэнть, дирижёронть Наталья Ивановна Касаткина марто. Сон ёвтнесь ансамблянь касомань-виевгавтомань китнеде-янтнэде, сонзэ юрс совиця ломантнеде ды шкинемань эскелькстнэде.
Мордовиянь «Умарина» моронь ды киштемань государственной ансамблясь пурназель-теезель 1939 иестэ, кода Мордовиянь государственной хоровой капелла, конанть юрсо ульнесь хор, морыцят-солистт, баянист-аккомпаниатор, художественной руководитель (кона истя жо – хормейстер ды дирижёр). Хоронть одкстомтомга 1940 иестэ ансамблянть юрс совавтозельть киштемань группа ды балетмейстер, народной музыкальной инструменттнэнь ансамбля. Коллективень васенце составось, кода тешксты Наталья Касаткина, пурназель Мордовиянь музыкально-драматической техникумонь (ней Саранскоень Л.П. Кирюков лемсэ музыкальной училищась), музыкально-драматической студиянь прядыцятнестэ ды этнографической хоронь морыцятнестэ. «Умаринань» васенце художественной руководителекс ды хормейстерэкс ульнесь Россиянь искусствань заслуженной деятелесь П.П. Емец.
Ансамблясь ансяк кемекстась-виевгадсь, кода ушодовсь Ине Отечественной войнась. Те стака шкастонть коллективесь Советской Армиянть туртов фронтсо макссь нилесядто ламо концертт. Войнадо мейлень иетне – «Умарина» ансамблянть шкинеманзо кемекстамонь иеть.
Меельце иетнестэ коллективенть прявтсо ульнесть культурань ды искусствань заслуженной важодицятне: Н.С. Рузавина, Н.Г. Дехтярёв, Г.И. Сураев-Королёв, И.Г. Резепов, Г.Г. Вдовин, Т.И. Одинакова, В.Д. Жестков, В.Ф. Ирченко, В.А. Белоклоков, С.В. Балабан, В.И. Четыркин.
2019 иестэнть саезь коллективенть прявтсо – Мордовия Республикань культурань заслуженной важодицясь, хормейстерэсь, дирижёрось Наталья Ивановна Касаткина.
Эсь творческой кист ушодызь «Умаринасонть» ды кадсть редявикс тешкс сонзэ художественной ёнкссонть содавикс ломантне, эрзянь ды мокшонь раськень моротнень морыцятне ды Россиянь заслуженной артисттнэ: РСФСР-нь ды МАССР-нь народной артисткась Раиса Макаровна Беспалова, РСФСР-нь заслуженной ды МАССР-нь народной артисттнэ Мария Николаевна Антонова, Дмитрий Иванович Еремеев, Александра Николаевна Куликова, Нина Васильевна Маркова ды лиятне.
Шкась ютась, ансамблянь коллективесь виевгадсь ды вадрялгавтсь эсь шкинеманть аволь репетициянь залтнэнь сэтьмечисэ, а тёжат кунсолыцятнень марто вастовоматнесэ. Эсь важодемань иетнень перть ансамблясь кармась эрзятнень ды мокшотнень музыкальной ды хореографической искусствань, республикань композитортнэнь шкинемань, рузонь раськень моротнень алкуксонь невтицякс.
«Умаринанть» лемензэ марто кеместэ сюлмавозь мокшэрзятнень вокально-хоровой музыканть ды хореографиянь искусстванть касомась-виевгавтомась.
Иестэ иес кассь коллективень артисттнэнь ёрокчись, келейгадсь ансамблянь репертуарось. Концертэнь программатнень одкстомтозь, коллективесь келейгавты морамонь ды киштемань ёрокчитнень, вешни художественной неень шкань ёнкст музыкальной эрьва номерсэнть.
Васенце иетнестэ саезь «Умарина» ансамблясь кармась вечкевикс ды содавикс аволь ансяк Мордовиясо, целанек Россиясо ды масторонть томбале. Коллективенть гастролень китне-янтнэ ладявсть Брестэнть эйстэ Сахалинэнть видьс, Мурманскойстэ Кушкис. Ансамблянь артисттнэ эсь ёрокчист невтизь масторонь прявт оштнень сценатнень лангсо, ульнесть Болгариясо, Германиясо, Польшасо, Чехословакиясо, Финляндиясо ды лия мастортнэсэ.
Ансамблянь васенце программатне пурназельть эрзянь, мокшонь ды рузонь раськетнень моротнестэ Л.П. Кирюковонь, М.И. Душскоень, Б.М. Трошинэнь, С.В. Евсеевень ды лиятнень аранжировкасо. Седе тов коллективень репертуарось келейгавтозель композитортнэнь вийсэ хоронь жанратнень од лувсо теемаст вельде – моротнень, кантататнень, вокально-хоровой циклатнень, вокально-хореографической сюитатнень, мокшонь ды эрзянь койтнень-кирдатнень невтематнень. Ансамблясь кармась ламот содавикс композитортнэнь произведенияст васенце морыцякс.
2019 иестэ ансамблясь тешкстызе 80 иень юбилеенть. «Умаринась» – Мордовия Республикань Государственной премиянь лауреат, Весероссиянь ды раськеютконь премиянь лауреат. Сонзэ артисттнэ казезь эрьва кодамо дипломсо, ламот тешкстазь заслуженной наградатнесэ.
Течинь чине ансамблянть важодемазо – те вейсэнь вешнема, вейсэнь важодема. Ансамблянь морамонь ды киштемань репертуарось одкстомтовсь. Седеень токиця, ёжонь кепетиця эрзянь ды мокшонь моротне, конат домкасто ёвтнить эсь тиринь ёнкстонть, тесэ эриця раськетнень койтнеде-кирдатнеде, тесэнь сэтьме эрямодонть ды кенярксчитнеде, кармасть хоронь, киштемань ды хореографиянь произведениятнень прявтокс.
Неень шкане ансамблясь полады ардтнеме Россиянь ды Мордовиянь оштнева ды велетнева, пурны покш аудиторият. Ансамблянь творчествань вечкицятне покш мельсэ содавтыть концерттнэнь, конатнень вельде тонавтнить эрзятнень ды мокшотнень мазыйдеяк мазый культуранть.
Юлия Еремина