Течи ули меленек ёвтнемс Покш Березникень муниципальной райононь эрицядонть, чевте седей ломанденть, эрзянь авадонть Галина Герасимовна Назаркинадо (тейтерьксэнь фамилиязо Богатова), кие неть читнестэ тешкстызе юбилеензэ.
Галина Герасимовна чачсь-кассь теке ёнксонь Парынзэлесэ, ламо эйкакшонь триця семиясо. Тетянзо-аванзо, Герасим Максимович ды Марфа Михайловна, ульнесть алкуксонь азорт, нужачинть лангс апак вано, трясть-кастсть кавксо эйкакшт. Ине Отечественной войнанть ушодовомсто кудазорось Герасим Максимович тусь масторонть идеме, ятонть каршо тюреме. Сонсь содась, кодамо стакачинь пачк савсь ютамс нинзэ туртов истямо покш семиянть марто ськамонзо кадовомсто. Покш цёраст Андрей, кода тетязояк, истя жо туекшнесь ятонть каршо тюреме.
Зяро сельведть савсь валомс, стака робота теемс довантень эйкакштнень кастомсто, сынст пильге лангс стявтомсто ды эйстэст алкуксонь ломанень ливтемстэ. Весе кассть алкуксонь ломанекс. Кинь кисэяк юткстост визьксчамас эзь сова. Виде, ней масторлангсонть кадовсь ансяк вейке тейтерест – Галина Герасимовна, кинень Пазось макссь кувака пинге ды куш одсто нужачисэ, ялатеке уцяскав эрямо. Сон эштё вишка пингстэ арсесь улемс медицинской сестракс, ансяк арсемась а сеске топавтовсь, куш школасо ульнесь сехте парсте тонавтницятнень ютксо.
1958 иестэ средней образованиянь аттестатонть получамодо мейле кизэнь перть важодсь шабра велесэ уликс участковой больницясонть.
Теде мейле тусь эрямо Покш Березникев, тевензэ тагояк поладызе райбольницясо. Стакат ульнесть шкатне.
Эйкакшпингень мелензэ топавтомс лездась сестэ эштё Покш Березникень райононь прявт врачось Н.Я. Назаркин. Ледстясынек, шкань ютазь сон малав кемень иень перть карми улеме Мордовской АССР-нь Здравоохранениянь министракс.
– Кода сон кармась Покш Березникень райбольницянь прявт врачокс, ламо паро полавтомат ульнесть пингстэнзэ, – ёвтни Галина Герасимовна. – Сехте пек кенярдынек медицинской сестрань анокстамонь курсатнень панжомантень. Лекциятнень тенек ловность эйкакшонь, терапевтической, инфекционной, хирургической ды лия отделениятнень врачтне.
Сонзэ ледстнематнень коряс, Николай Яковлевич пек лездась тензэ топавтомс эрямонь арсеманзо.
Г.Г. Назаркинань пачтямонзо коряс, сестэ специализированной медицинской литература пек аламоль. Прявт врачось нинзэ Тамара Ивановна марто Саранскойстэ тенст усксть тонавтнемань пособият, ламо справочной литература, конань вельде сынь тонавтнесть важодеме. Неть книгатне те шкас сонзэ ванстовсть, ней казинзе нуцьканзо Вадимень туртов, кие пряды тонавтнеманзо Н.П. Огарёв лемсэ МГУ-нь мединститутсо.
Нейгак эзть стувтово Галина Герасимовнанень, кодамо покш каштанчи саизе, зярдо торжественной лувсо максызь тенст медицинской курсатнень прядомадо свидетельстватнень, те – эрямосост ульнесь покш тешкс. Видьстэ меремс, велень тейтерькатне пельсть туемс тонавтнеме Саранскоев, ды конкурсоськак тосо свал пек покшоль.
Вана истя, прявт врачонть ды эсензэ покш бажамонзо вельде сон теевсь хирургической отделениянь медсестракс. Чарькодеви, сеть шкатнестэ эрясть общежитиясо, косо веденть эрявсь кандомс лисьмасто ды лия условиятнеяк ульнесть содавикст, ялатеке сон ялганзо марто седейшкава тонавтнесь вечкевикс тевензэ, мезеяк лангс зярдояк апак пеняця.
Галина Герасимовна пингень перть важодсь весть кочказь тевсэнзэ. Сонзэ содылизь аволь ансяк Покш Березникень, весе райононь эрицятне, путсь седей эрьва ормалгадозентень. Маштсь лездамо аволь ансяк надобиясо, истя жо оймавтыця чевте валсо, эрьвантень башка мелень явомасо, мизолксонь каземасо.
Шкань ютазь, кода Покш Березниксэ панжизь эйдень васенце кужонть, Галина Герасимовнань тердизь тов важодеме. Тосо сон ульнесь пенсияв лисемазонзо.
Ламо шка ютавтсь важодема таркасо, куш семиясояк тевензэ певтемельть. Вейсэ мирдензэ Владимир Фёдорович марто трясть-кастсть ниле эйкакшт, эрьвантень макссть образования, лездасть муемс эрямонь эсест кист-яност. Ней эрьванть ули эсензэ семиязо. Тейтерест – Альбина Картышкина ды Лариса Ворожейкина – важодить Покш Березникень эйкакшонь кудосо, Ирина Федотова – МР-нь Эрицятнень социальной ванстомань ды трудонь занятостень министерствасо. Цёраст Александр Назаркин – МР-со Общероссийской народной фронтонь региононь отделениянь исполкомонь прявтонь полавтыця. Покш мельспаросот кемгавтово нуцькаст ды кото правнукост кувалма, кить сеедьстэ содавтнить покштяст-бабаст.
Кода уш вере тешкстынек, неть читнестэ Галина Герасимовнань лемс ёвтавсть ламо поздоровт, конатненень вейсэндявтано миньгак, «Эрзянь правда» газетань теицятне.
Галина Герасимовна! Арсетяно кеме шумбрачи тыненк ды весе малавиксэнк туртов. Кадык эрямось кази паро ёжомарямо ды уцяскав кувака пинге!
Валентина Юдина
Галина Герасимовна!
Мереде ёвтамс тенк седейшкавань поздоровт юбилеень тешкстамонь коряс, арсемс кеме шумбрачи, весе арсеманк топавтома!
Покштояк покш сюкпря тенк эйкакшпингень мазылгавтомань, седейшкавань мелень явомань кисэ. Кадык Пазось кеменьксть велявтсы се паронть, конань тынь теиде ды поладтадо каземе монь туртов.
Мила Богатова