Аволь умок тиринь газетань лопатнесэ ловныцянок туртов пачтинек Покш Березникень муниципальной райононь Парынзэлесэ «Од веле» велетнень касомань-кепедемань Мордовиянь общественной вейсэндявксонь «Моё село: от культурных традиций к гражданским инициативам» проектэнть тевс нолдамодо. Ледстясынек, республикасонок сон топавтови РФ-нь Президентэнь фондонть вельде.
Те паро тевесь анокставсь ды неень шкане совавтови эрямос Мордовия Республикань Государственной Собраниянь депутатонть, социологической наукань кандидатонть, «Од веле» общественной куронь прявтонть Евгений Евгеньевич Ледяйкинэнь прявт ало. Тешкстасынек, те сонзэ ушодксонзо коряс Мордовиясо васенцеде теевсь «Коень-кирдань ванстомань кудо» музейно-культурной центрась (руз. – Музейно-культурный центр «Дом традиций») Парынзэле тиринь велесэнзэ.
Те проектэнть коряс теезель ламо, икелепеле учи эштё седеяк покш важодема, конань коряс арсематнеде карминек содамо тосо улемстэ. Сындест ёвтнесть Покш Березникень ды шабра районтнэнь велетнень виевгавтомаст, тосонь ломантнень эрямост паролгавтомаст коряс тонавтомань васенце семинарсонть, конань панжизе ды ветясь те тевенть ушодыцясь Евгений Ледяйкин.
Те вастовоманть прявт тевезэ – кода эряви важодемс проектэнь коряс, кода а пелемс васень варштавкс лангс а теевиця тевтнень эйстэ, эдь самай сынст вельде путови юр паро ушодкстнэнень. Кода мерсь Евгений Евгеньевич, велетнень лезэс паро тевтне вановттомо а кадовить, виевстэ важодицятненень кармить венстеме лезксэнь кедь покш прявттнэ.
Эрзя-мокшонь раськесь масторонь келес содавикс инжень вастома койтнесэ, сыцятнень тантейстэ каванямосо ды паро ёжонь каземасо. Истямо лувось кезэрень шкасто ветяви Парынзэлесэяк. Неень шкане тенень тонавтыть сыненст эрьва косто сыця инжетнень. Вана минекак кши-сал марто, гармониясо седязь, нурька моронь моразь вастымизь Коень-кирдань ванстомань кудосо те велень эрицятне, Евгений Ледяйкиннэнь лездыцятне. Виде, сон неявиксстэ полавтовсь паро ёнов се шкастонть саезь, кода меельцеде, 2019 иестэ, вейсэ Общероссийской народной фронтонь региононь отделенияс совицятнень марто ульнинек тосо «Мейстэ ушодови тиринь таркась?» («С чего начинается Родина?») проектэнть коряс.
Мазылгавтовсь совамо таркась, кудыкельксэсь пешксе кезэрень ули-пародонть. Евгений Ледяйкин меленек явизе кезэрень шкане теевть кенкшентень, конань ванстызь-кадызь се шкань эрямодонть ледстнемга. Тоско жо понгавтозь ламо инструменттнэ, мейсэ теезель те кенкшесь ды целанек кудось. Неявикс таркасо понгавтозь теленень сехте лембе оршамопелесь – тулупось.
Истя жо икелень эрямодонть ледстнить ламо кедьёнкст, конатнесэ пивтсть скалой, анокстасть ламо лия ярсамопель ды кодасть оршамопельть.
Удалце кудось кенярдовтымизь лембе каштомосо, сон аволь ансяк невтемга путозь, эйсэнзэ ламо тантей ярсамопель пидеви-паневи нейгак, каванявить сыненст сыця инжеть.
Нама, эрьва сыцясь яви мель мазыйстэ ладсезь кезэрень фотографиятненень. Те веленть неень шкань ды икелень эрицятне редить юткстост малавиксэст, раськест. Икельце кудованть якамсто, тосо уликс экспонаттнэнь ванномсто, натой кандоват ведьгеменце-кодгеменце иетнес, зярдо тосо эрясть Евгений Евгеньевичень тетязо-авазо. Сехте неявикс таркасо Богородицань пазавась, конась весень васты чевте варштавкссонзо.
Тосо ванстовсь покштянзо Макар Гавриловичень кедьсэ теезь удома таркась, конань велькссэ понгавтозь малавикс ломантнень фотографият. Се шкадонть ёвтнить оршамопелень кирдемань шкафось, кукушка марто кезэрень частнэ ды ламо лия ули-парось. Виде, улить ютксост истят экспонатт, конатнень кандызь Парынзэлень ды маласо велень эрицятне. Се шкань эрямо лувонть лездасть пурнамс-невтемс С. Д. Эрьзя лемсэ республикань изобразительной искусствань музеень важодицятне. Нурькинестэ, весемесь теезь истя, васенцеде тов совицясь саи мель эштё ламоксть содавтомс те лембе, эйкакш пингень ледстнемань мазый тарканть.
Коень-кирдань ванстомань кудонть икеле колмо цёрат теить од лато. Неть кедьчелькев ломантне: Виктор Чуднов, Алексей Тетюшкин, Пётр Кечуткин. Кода мерсь Евгений Евгеньевич, тесэ карми Парынзэлень эрицятненень ды тенст сыця инжетненень оймсема тарка (беседка) ды экспозициянь невтема куншкакуро. Невтемакс, теемадонзо мейле тов аравтовить сокат, плугт ды лия эрьва кодамо инвентарь.
Неень шкане Парынзэлень куншкакурось допрок полавтовсь. Эштё кавтошка иеде икеле (кадык а саить мельсапаро тосонь эрицятне) зыянов тикшентькак аволь свал леднесть. Ней жо вельтязь паро асфальтсо, кинть чирева анокстазь цецянь озавтома таркат. Кемеви, тунда сынь кармить кенярдовтомо сельметь одкстомтозь клубонтень, кавто од кафетненень сыцятнень.
Пек паро, те веленть вельмевтеме ушодсь аволь ве ёндонь сыцясь, кие а содасынзе икелень эрицятнень, конатне путсть ламо вийть ды содамочить советской шкане ломантнень лезэс. Невтемакс, ламот нейгак ледстнить икелень прявтонть, тиринь велень алкуксонь патриотонть Василий Павлович Лакеевень, кинь пингстэ кепедезель экономикась, теезельть культурань ды социальной ламо объектт. Нать, а стяко Евгений Ледяйкин Парынзэлень «Парго» ремеслань центрантень максызе Василий Лакеевень лементь.
Те таркасонть ве шкасто кармить теевеме кода кезэрень, минек покштятнень-бабатнень стувтозь кедьёнкстнэ, истя жо тевс нолдавить од технологиятне. Весе оборудованиясь тосо ули, специалистткак муевсть, кить маласо шкасто ушодыть важодеме. Кода кемевтимизь Евгений Ледяйкин, сынст туртов теевить оймсемань-шлямонь ды лия эрявикс таркат. Зярс весемезэ кармить важодеме ниле ломанть.
Тоско, веленть куншкакуросо, ашти стада ваныцянь кудось ды лишметнень туртов од кардось. Аволь пек умок сынь рамасть советской породань лишме, конась карми ардтневтеме кода тосо эрицятнень, истя сыненст сыця инжетненьгак. Эйкакштнень туртов казне тейсь Бозаёв велень икелень эрицясь Фёдор Борисович Корнаухов. Сон казсь тенст вишка алашине, конань лемдить «поникс».
Клубсо улемстэ рединек Парынзэлень аватнень мазыйдеяк мазый викшневксэст-кодавксост, конатнень неень пандемиянь шкастонть теить кудосо. Виде, васов аволь весе велетнесэ Культурань кудосто редят истямо шумбрачинь кемекстамонь спортонь зал, косо аштить неень шкань сатышка тренажёрт. Нать, а стяко сонзэ лемдизь «Кувака пинге» («Долголетие»), штобу те велень ломантне ветявольть эрямонь шумбра лув ды кувать эрявольть.
Парынзэле велень «Парынза» ансамблясь умок уш теевсь содавиксэкс аволь ансяк минек республикасо, весе Россиянть келес. Масторлангонь пелькстамотнесэ сынь свал совить изницятнень юткс. Те чистэнть минекак кенярдовтымизь гайтев вайгельсэст ды мазый моросост.
Меельцекс ульнинек «Ашо лисьма» куншкакуросонть. Тостояк од ды паро ёнкс рединек. Покш читнестэ тов сыцятнень туртов теезь паро сцена. Маласонзо лато марто пиземе ды пси чипаенть эйстэ кекшема тарка.
Виде, те эштё аволь весе. Газетань вейке лопантень а саты тарка ёвтамс весементь, зяро эштё арсесь теемс Евгений Ледяйкин. Сынст ютксо: тельня конькасо ардтнема таркань валомась, сокссо кирякстнемань пандонь теемась, ве ёндо туристтнэнь тердемась ды истя седе тов.
Васенце семинарсонть неть весе тевтне невтевсть ды сындест ёвтневсь маласо велетнень эрицятненень а стяко. Сынь тонавтовсть, кода эряви эсест велесэ, посёлкасо одкстомтомс-вадрялгавтомс эрямонть, пурнамс перькаст истят ломанть, кие мелявты: карми-арась улеме ванды сынст велесь республикань ды Покш Березникень райононь картасонть? Шкань ютазь кармить-арась сынст покштяст-бабаст, тетяст-аваст тевтнень поладыцяст эли кадовить ансяк ледстнематнес сынст тиринь велень юрттнэ…