Кавто чинь перть Саранскойсэ, А. С. Пушкин лемсэ Национальной библиотекасо «Тиринь книга» проектэнть лувсо ютасть Россиянь раськень кельтнестэ художественной произведениянь ютавтомань коряс семинарт-практикумт.
Ульнесть лекцият ды практической занятият, семинарт, творческой вастовомат ды СМИ-нь роботниктнень марто «кругловой столь».
Мордовиясь – те котоце площадка, косо ютавтовить истят семинарт. Теде икеле сынь ульнесть Дагестансо, Якутиясо, Карелиясо, Бурятиясо ды Татарстансо. Проектэсь ютавтови РФ-нь Цифровой развитиянь, связень ды массовой коммуникациянь министерстванть лезксэнзэ вельде. Саранскойсэ сонзэ кураторось – Мордовиянь Писателень союзось, прявтось Татьяна Швецова. Спикертнэ, Мордовиядо башка, сакшность Московсто, Ижевскойстэ ды Казаньстэ.
Июнень 14-це чистэ невтезель Россиянь раськетнень национальной литературатненень лездамонь программась. Московонь поэтэсь, лия кельстэ ютавтыцясь Максим Амелин ёвтнесь раськень кельтнестэ ютавтомадонть лекция, анокстась весень туртов «памятка». Чокшне ёнов пурназель вастовома поэттнэнь ды сёрмадыцятнень марто.
Июнень 15-це чистэ Ижевскойстэ Вера Пантелеева ёвтнесь, кода седе видестэ ютавтомс финнэнь-угрань раськетнень кельтнестэ рузонь кельс, штобу а полавтомс смустенть. Теде мейле ушодовсь «СМИ на национальных языках: нюансы и перспективы развития, перевод» теманть коряс кругловой столесь. Кодат газетат, журналт нолдавить финнэнь-угрань кельтнесэ ды кода эрить Удмуртиясо национальной СМИ-тне, ёвтнесь «Удмурт дунне» газетань прявт редакторось Елена Миннигараева. Минек раськень журналисттнэ макссть тензэ пек ламо кевкстемат ды сайсть зярыя превс путомат эсь мельс. Седе тов пурназель эштё вейке вастовома, косо семинаронь участниктне кортасть лия кельстэ ютавтомадо мелявкстнэде.
Марина Девятова