Пятница, марта 29, 2024
Важное

Минек редакциянть стенатнестэ лиссть ламо содавикс ломанть, кить эрямонь тёкшс куземанть ушодызь «Эрзянь правдасто». Юткозост лади совавтомс «Сятко» журналонь неень прявт редакторонть Татьяна Васильевна Разгуляеваньгак. Сонензэяк савсь ютамс минек тиринь газетанть трокс.

 

«Варманть ды чипаенть каршо чиезь»

 

«Ашо прячерь, сэнь сельме, аволь покшке, ансяк чуморксов тейтернесь эрязасто чии чипайсэ кевекс костязь кинть ланга. Мерят, ливтязь ливти, пильгензэ эль токшить масторксонтень. Чийсь варманть ды чипаенть каршо…»

Истя ушодови Татьяна Разгуляевань «Изнязь сэредькс» ёвтнемазо. Истямоль вишка пингстэ сонсь Таняяк. Сон чачсь Орданьбуень Чукало велесэ. Василий Григорьевич тетянзо ды Мария Васильевна аванзо колмо эйкакштнень ютксто сон – меельцель. Те а корты седе: кастсть эйсэнзэ кольневтезь. Велесэ тевтне сатыть весенень, нузялгалемс а максыть киненьгак. Таня вишкинестэ уш тонадсь пирень-кудонь тевтнесэ кашкамо. Косот покштне, тосот – вишкинетнеяк. Мартост Таняяк. Весе, мезе сайсь аванзо-сырькаензэ пельде, маштовсть покшсто касозьгак. Маряви, арась истямо тев, конань тееме сон аволь машто. «Эрзянь правдасо» мартонзо важодицятне те шкас а стувтсызь сонзэ тантейдеяк тантей ярсамопельтнень, конатнеде сон секе-тев каванясь эйсэст. Мерят, сонзэ мезезэяк эзь ёмсе. Теле лангс мезть-а мезть пиди пиресэ-косо кастозь эрьва кодат эмежтнень, вирьстэ кандозь панготнень эйстэ.

Эряви меремс, Татьяна Васильевна икелеяк, нейгак вечки модасо сокорямо. Ледстяви тень, кода Печатень кудосо важодиця журналисттнэнень макссть нилень-нилень соткат мода. Икеле истямо арасель. Секс весе пек кецнинек. Васенце иестэнть Химмашонь пандо прясо лия дачатнень пес карминек миньгак озавтнеме чувтот, куракшт. Кой-кить кенерькшнесть стявтнеме кудоткак. Зярыя иеть яксинек. Мейле та-кода ламонь мелест кацтавсь (улема, сень кувалма: сеть дачатнева якасть ламо салыцят). Ськамонзо Татьяна Васильевна эзь пеле, секе-тев яксесь эсензэ дачантень, кастсь тосо эмежть-мезть. Мейле, виде, савсь кадомс се тарканть, сайсь лия мода Атемарсто.

«Уцяскась эрси истямокс, кодамокс а учняткак»

 

Седеяк покш вечкема седейсэнзэ кирди вирентень. Виресь сонзэ туртов – оймень нурсевтиця, седеень оймавтыця тарка, ормаменькс. Тосо сон ютавтнесы тошначинзэ, сиземанзо, пансесынзе стака мелензэ-арсеманзо, тов якамодо мейле прянзо карми марямо седе шождакс ды виевекс. Эрьва тикшиненть, цециненть содасы аволь ансяк лемензэ, мик сеньгак, кодат сонзэ видьмексэнзэ, косо касы ды кодамо ормадо вадря.

А стяко школасо тонавтнемстэ, сонзэ прядомадо мейлеяк Таня эрямонзо арсесь сюлмамс виренть марто. Цётакшнызе, ков молемс тонавтнемеяк. Алатырьсэ, кона Орданьбуенть эйстэ аволь васоло, ульнесь техникум, косо анокстасть виренть марто сюлмавозь специалистт. Ансяк тов эзь саво молемс – се иестэнть техникумонть пекстызь. Тень таркас ялганзо мельга сыргась Саранскоев, сась пединститутов. Сонсь, виде, эзь арсеяк улемс тонавтыцякс. Меремс, «Эрзянь правдав» самодояк эзть сакшно арсемат превезэнзэ. Ансяк эрямосонть сеедьстэ эрси истя, мезенть а учаткак. Танянь уцясказояк ветизе аволь тов, ков бажась седеезэ. Лиясто, паряк, Танянь седейс эшксевсть уцясканзо лангс пеняцямонь ёжомарямот. Ансяк пеняцяк-иля пеняця, эрямонть а мурдавтсак мекев…

 

Сёрмадома тевсэ виев се,

кие варчнизе журналистэнь кшинть танстензэ

 

…Сестэ, зярдо сась «Эрзянь правдав», сон ульнесь Татьяна Ладыгинакс. Од тейтерькаль, ансяк прядызе М.Е. Евсевьев лемсэ МГПИ-нь филологиянь факультетэнть, сеске саизь корреспондентэкс. Сёрмадомань ёрокчизэ редязель уш студентэкс улемстэ. Институтсо тонавтнемстэ яксесь литкружоков, конань ветясь А.Г. Борисов тонавтыцяст. Се шкастонть истямо жо кужо (лемезэль «Тештине») теезель «Эрзянь правда» газетасояк. Сонзэ ветясь эрзянь содавикс сёрмадеесь В.К. Радаев, лездыцякс тензэ ульнесь В.И. Дёмин (сестэ сон топавтсь культурань отделэнь прявтонь тевтнень). Зярдо студенттнэ марясть «Эрзянь правда» газетасо панжозь литкужодонть, сыньгак зярдо-кода кармасть сакшномо эйзэнзэ. Самай сестэ уш Татьяна Ладыгина невтизе сёрмадомань ёрокчинзэ. А стяко «Эрзянь правдань» се шкань редакторось П.П. Борейкингак явсь мель сонзэ лангс, пшкадсь тензэ варчамс вийтнень журналистэнь тевсэнть, сёрмалемс ды кучномс тенст эрьва кодат кулят, корреспонденцият, зарисовкат. Пётр Прохоровичень туртов, улема, вечкевсть Танянь сёрмадовкстнэ, секс, зярдо тейтересь прядызе тонавтнеманзо (те ульнесь 1981 иестэ), тердизе важодеме «Эрзянь правдав».

Васенце шкасто, зярдо Таня чопавтсь журналистэнь чаразь-велязь эрямонтень, пек а шождаль. Эрявсь тонавтнемс одс эрямо. Кие варчнизе журналистэнь кшинть танстензэ, се содасы, зяро ливезь эряви валомс, зяро превть яжамс, удемть костямс. Журналистэнь тевесь – кода ведьгевесь, чинь-чоп яжи ды а кенери: каят – аламо, таго каят – ялатеке а сатны. Ды те эрьва чистэ. Мадяткак, сыргозяткак – пря потсонть секеть мельтне: кода ушодомс материалонть, кода седе видестэ ёвтамс се-тона арсеманть, козонь кодамо валось седе лади ды истя седе тов. Лиясто удемтне, мерят, лакамо курок туить. Валт ды цифрат, цифрат ды валт, теке мекшть бизмолдыть эсест пизэсэ. Сюлмсят-тапарят эйсэст, мекев юкстнят, одов тапарят. Удемтне, ловт, зярдояк а оймсить. Тень цидярдсы аволь эрьвась. Ансяк се, кие те тевенть кочкизе седеенть мереманзо коряс.

Ладыгина (мейле, мирденень лисезь, карми Разгуляевакс) цидярдызе. Сон теевсь паро журналистэкс, конань сёрмадовксонзо учость ловныцятне. Сёрмадсь аволь «адя кодаяк», сёрмадсь оймень путозь. Содась, ловныцянть а манясак. Сон сеске редясы, кие ланга-прява «вади», кие – потмова «сокарды». Ловныцянть «а рамасак» истят сёрмадовкстнэсэяк, конат пештязь ансяк чаво ды коське цифрадо. Сон а карми ловномо сеть нолдавкстнэньгак, конат сёрмадозь, кода мерить, «чувтонь» кельсэ. Ловныцянтень макст истят сёрмадовкст, конат, кода пси пачалксетне, аволь ансяк пеке пештить, теке марто ойме витить, ёжо кепедить.

Весе тень зярдояк эзь стувтне Татьяна Разгуляева. Секс эрьва сёрмадовкссонзо невтсь аволь ансяк сень, мезенть несь сельмесэ, бажась варштамс се ломаненть оймескак, кинь перька мольсь ёвтнемась. Тенень невтемакс ловсыть сонзэ ламо зарисовкатнень, очерктнень. Саемс юткстост вейкенть. Те – «Алкуксонь азор, алкуксонь ломань…» аволь покш зарисовкась, кона лиссь «Минек эрзянь цёратне» рубрика ало. Эйсэнзэ ёвтневи Орданьбуень «Победа» колхозонь се шкань прявттонть И.Н. Нестеркиндэ. Вана кода ушодызе те ломанденть ёвтнеманзо: «Маряви тень, истят ломантнеде ютксонок кадовсть аламо. Течинь эрямонь стакачитне ламотнень оймест казякавтызь. Сон – лия. Сэтьме, чевте вановт. Корты аламо. Тень таркас, машты кунсоломо, а покшкавтниця. Сехте пек а вечки прянь шнамо. Мезе алты – топавтсы свал. Эстедензэ вал а ёвты. Ансяк колхозонь тевтнеде, седейшкава важодицятнеде ёвтни мельспаросо. Эсь тевензэ содасы парсте, мелявтыяк кисэнзэ апак лотксе. Тень пингстэ ризны велень эрьва ломаненть кисэ. Лезкс мельга тензэ пшкадицянтень бажи лездамс валсояк, тевсэяк. Теде башка, певтеме вечксы тиринь ёнксонзо, велензэ…» («ЭП», 1999-це иень ноябрянь 2-це чинь №-сэ).

Обуцянь неть ёнкстнэде, кода сёрмады седе тов Т. Разгуляева, кемевти Куцянвеленть перька велетнева якиця побаскась. Кода-бути весть пшкадсь Иван Николаевичнень шабра колхозонь вейке прявт энялдома марто: тонь, келя, скалтнэ пек парт, макст, марят, минек стаданть паролгавтомга эйстэст зярыя. Тень каршо И.Н. Нестеркин, прянзо чаракавтозь, «керизе» энялдыцянть истямо валсо: «…Васня эсенк кардотнень навоздонть ванськавтынк. Ракшанк курок лато пряс кузить».

Лембестэ ды мелень путозь Т. Разгуляева сёрмадсь сеть ломантнеде, кить ламо вийть максыть эсь раськенть лезэс. Вейке истямо ломанентень, эрзянь авантень, кие ламо иеть тонавтсь пакшат эрзянь келенть вечкеме, Римма Дмитриевна Жегалинанень алтазь очеркесь, кона лиссь «Эрзянь правдасо» (2002-це иень ноябрянь 2-це чинь номерсэнть) «Уцяскань тештезэ – тиринь велесэ» лем ало, истя жо эзь мене ловныцятнень сельмест икельде.

 

«Моньгак покшоль мелем тонадомс парсте киштеме

ды морамо»

 

Весе, кить содасызь, ловить сонзэ а капшицякс. «Эрзянь правдасо» важодемстэ весе несть, кода топавтсь тевензэ. Сёрмадомсто, марявсь тенек, Таня Ладыгина зярдояк эзь эрязкале ды, кода лият, эзь пане ламо строчка мельга. Эрьва сёрмадовксонзо, кода чапаксонть, васня ичилизе парынестэ, «никсилизе-пувсилизе», валтнэнь сюкоро ладсо кевердилинзе-лепштнилинзе, вачкилинзе-ладсилинзе мазыйнестэ, мейле ансяк тонгилинзе каштомов пиеме.

Истямокс лован сонзэ монгак. Савсь тенек зярыя иеть аштемс вейке кабинетсэ. Видькстан, пек малавикс ялгакс эзинек тееве, кода теевсть лия кабинетка кой-кона аштицятне. Теке марто кодаткак аладямкаткак ютксонок арасельть. Свал тенек аютколь. Культурань отделсэ колмоненек: вейке прявт ды кавто коррт. Юткошканок овсе арасель. Газетась а учи. Сонзэ эряви пештямс. Эрявсь кенеремс ве ёндо сазь кие соды зярыя сёрмат ванкшномс ды эсеть материалтнэдеяк а стувтнемс. Лиясто а фатилить, зярдо чизэ валгиль.

Ансяк лиясто, зярдо прыль юткошка, кортнинек эсенек эйкакштнеде. Монь эйстэст кавто, сонзэяк – кавто. Ней уш сынь кассть покшсто, эсест киява тусть. Виталий цёразо, кода монсетнеяк, Московсо. Анюта тейтерезэ седе маласо – Саранскойсэ. Лиссь мирденень, кавто нуцькат тензэ казсь.

«Поладске» вейке ёвтнемасонзо Татьяна Васильевна сельмень сявадозь вансь, кода вишкинестэ тейтерькинезэ киштсь ды морась магнитофонсо гайгиця моронть коряс. Мелезэнзэ ледсь эйкакшпоразо. Сестэ сонзэяк мелезэ покшоль тонадомс парсте киштеме ды морамо. Ансяк, янксесь сон, «ламо тувталонь ды седе пек пелиця-виздиця обуцям коряс бажамом эзь топавтово».

Те аволь овсе виде. Эли, паряк, ёвтнемась сёрмадозель се шкадонть икеле, зярдо Татьяна Разгуляева кармась морсеме «Ламзурь» ансамблясо.

Те ульнесь 1995-це иестэ. Се шкастонть эрзянь поэтессанть Маризь Кемалень мелензэ коряс теезель «Ламзурь» ансамблясь. Мон васенцетнень ютксолинь, кить кармасть якамо тов морсеме. А содан, кода лиссь, каня, монь лангс ванозь, каня, кияк кортавтызе, курок Татьяна Васильевнаяк «ормалгадсь» морамо тевсэнть, кармась сакшномо репетицияв. Эрзянь оршамоткак эстензэ сонсь стась. Сынст эйсэ якась Эстониявгак. Нейгак сеедьстэ ледстнетяно, кода морынек Таллиннсэ Ратушень куншкакуросонть ды, минек моротнень кунсолозь, ламо ломантнень тукшность сельведест. Эряви меремс, Татьяна Васильевна ськамонзо морамстояк куш кинь седеензэ калавтсы. Вайгелезэ ванькс, чевте. Пек парсте сонзэ лиснесь «Литова» эрзянь кезэрень морось. Кодак серьгедьсы, лия морыцятне општ теильть, кунсолозь.

Пек апаргадынек, зярдо Т. Разгуляева лоткась «Ламзурев» якамодо. Те сестэ, зярдо тусь «Сятко» журналов. Улема, тевтне-мелявкстнэ эзть максо.

 

«Эрямонок моли певердезь човаля ёнов»

 

Журналистэкс улемстэ, очерктнеде ды эрьва кодат кулятнеде башка, газетасо эзть лотксе лиснемеде сонзэ ёвтнеманзо. Сынст Таня сёрмалесь икелеяк. Мелезэ тенень седеяк пек кепедсь, зярдо кармась яксеме «Тештине» литературной кужов, конань, кода уш меринек, ветясь В.К. Радаев. Весемесь мольсь, кода мольсь. Комсь иетне ютасть – эзть марявояк.

Истя, паряк, молевель седе товгак. Тесэ апак учо «Сятко» журналонь се шкань прявт редакторось А.В. Арапов тердизе эстензэ лездыцякс. Кие кадсы мельтеме истямо тердеманть? Татьяна Васильевна, эряви арсемс, тенень пекень пек кецнесь. Сонензэ марявсь, журналсо седе ламо карми юткошказо сёрмадомантень. Секс апак кавтолдо кавксоце этажсто, косо аштесь ды нейгак ашти «Эрзянь правда» газетань редакциясь, валгсь васенце этажов – «Сятко» журналонь «пизэнтень». Сонзэ путызь журналонь прявт редакторонь полавтыцякс. Те ульнесь 2000 иестэ. Кемень иеть кандсь «прявт редакторонь вить кедь» лементь. 2011 иестэ «Сяткось» апак учо кадови прявт редактортомо – сезеви А.В. Араповонь эрямозо. Вере эземтнева аштицятненень кувать эзь саво арсемс ды кочксемс, кинь путомс сонзэ таркас. Полавтыцякс улемстэяк Татьяна Васильевнанень ламо мезе савкшнось теемс эстензэ, кода прявт редакторонтень.

Эзизе кадно сёрмадома тевензэяк. Сёрмалесь публицистикань статьят, очеркть, ёвтнемат. Меельцетнень пурнынзе башка пусмос, кона лиссь 2008 иестэ «Певердезь човалят» лем ало («Певердезь човалят» книганть лисемадо икеле Разгуляевань зярыя ёвтнеманзо (весемезэ 22) лиссть вейсэнь пусмосо, конань лемезэ «Оцёр» (1997 ие).

«Певердезь човалят» – истямо лемесь саезель, паряк, секс, эйзэнзэ пурназь ёвтнематне човалянь кондят вишкинеть. Те а корты, буто сынст эйсэ арась домка смусть ды сынь ловныцянть а кармавтыть арсеме мездеяк. Те аволь истя. Эрьва ёвтнемась, монь койсэ, те – видькстамо, кона моли седей потсто, секс сынь кармавтыть арсеме седе, кодамо эрямо печтятано минсь, ловныцятне, кодат стакачить пракшныть лангозонок, кодат ильведькст нолдтнетяно ды машттано-арась сынст витеме. Сонсь эрямоськак моли певердезь човаля ёнов. Чись юты, эсензэ мельга кады ледстнемат. Конат нусманят, конат – манейть. Истят, кодат эрсить керьксазь човалятне. Эрьва ломаненть сынь эсензэ. Кинь сынь артозь чопода тюссо, кинь – валдосо. Разгуляевань сынь – ламо тюсонь. Кода видькстась «Удалов варштазь» ёвтнемасонзо, сон лоткась «весементь артомо раужосо. Кеняркшнан пек вишкине паронтеньгак, конань кази тень эрямось. Нурькинестэ меремс, чоподастонть монсь эстень вешнян-мукшнан валдо вальминеть…» Секс, паряк, ютксост арасть седеень кольстиця ды сельведьс паниця тюст. Сынь весе кемемань максыцят, эрямонть вечкеме тердицят.

Книгантень совасть весе, мезе кенерсь сёрмадомо се шканть перть: ёвтнемат, новеллат, миниатюрат, ледстнемат, прозасо баснят. Весе сынь эрямодо, вечкемадо, ломанень уцяскадо. Ламо ёвтнематнень лемест коряс уш чарькодьсак, мезде туи эйсэст кортамось: «Кувака ки», «Стувтозь тетя», «Кирдевтеме», «Янксема», «Питней казне», «Удалов варштазь» ды ламо лият. Весе сынь аволь покшт. Тень лангс апак вано, эйсэст весе келес панжови ломаненть уцясказо, се, мезесь эйсэнзэ талновты ды ризнэвти.

Валдо ёжомарямот ловныцянть седейс вельмить новеллатнень ды миниатюратнень ловномсто. Сынст эйсэ авторось терди мезеяк лангс апак вано кецнемс эрямонтень, редямс ды кеняркшнемс весе се мазычинтень ды сюпавчинтень, мезе ули пертьпелькссэ.

Башка таркасо аштить ёвтнематне-артовкстнэ, конатнесэ сон панжи эсензэ певтеме вечкеманзо вирентень, весе пертьпельксэнтень («Пойбулосо», «Сэньшкайть», «Телень само», «Ожо ёвкске», «Килейть», «Тундонь вирьсэ», «Якстере нармунть», «Каргонь киштемат», «Увт», «Гувныця толокс…» ды ламо лият.

 

«Эрясь-аштесь ёвкске…»

 

Сехте покш изнявксокс Татьяна Разгуляевань шкинемасонзо лован «Эрясь-аштесь ёвкске…» книганть, кона лиссь 2019 иестэ. Мазый артовкс марто эчке ланго, паро конёвсто 102 лопат, эйзэнзэ пурназь, ловомам коряс, 38 ёвкскеть. Те книгась – питнейдеяк питней казне эйкакштнень туртов, конат, кода содатадо, апак кольневте паро книгасо. Минек сёрмадейтне сеедьстэ стувтнить сетнеде, кинь кедьсэ минек раськенть сы шказо. Аволь ансяк аламо сёрмадыть, седеяк аламо нолдыть башка книгат. Кой-кить пеняцить, арась шка сёрмадомс, арась се, арась тона, ярмакт а косто саемс. Неть стакачитне а ютнить Татьяна Васильевна Разгуляевань вакскаяк. Ды ялатеке шкаяк мусь сёрмадомс, ярмашкаткак тензэ та-косто прасть. А, паряк, тевесь аволь ансяк арасьчисэ, тевесь эсенек эйсэ, сень эйсэ: арась меленек, а сатны сёрмадома ёрокчинек?

Сеяк виде, эйкакштнень туртов ёвкстнэ аволь весенень сёрмадовить, ансяк сеть ломантненень, кить маштыть варштамо вишкинетнень ойме потс, чарькодеме сынст мелявксост, сень, мезесь талновты эйсэст, мезенть сынь весемеде пек вечксызь. Татьяна Разгуляевань, арсян, улить истят ёрокчинзэ. Монень маряви, сон сонськак эрямонть лангс лиясто ваны вишка эйкакшонь сельмесэ. А стяко эсензэ ламо ёвтнематнесэ сон сеедьстэ ледстни ютазь эйкакшпингензэ, седе, кодат ёжомарямот печтясь кодамояк нармунь эли ракша марто вастовомсто. Нейгак а лоткси кецнемеде васень пургондавкстнэнень, чипаень лембентень, а лоткси ваномодо, кода касыть пиресэ эмежтне-цецятне, вирьсэ чувтотне-тикшетне, зярдояк а юты псакиненть эли кискиненть вакска, кона понгсь зыянс. Те корты вейкеде, кодамо чевте ды ванькс сонзэ оймезэ.

Истямо оймест вишка эйкакштненьгак. Ансяк кода ванстомс эйсэст те ваньксчинть, кода а пацькамс неень шкасто эрьва косто «чадыця» рудазонть эйстэ? Те тееви ансяк сестэ, зярдо эйкакштнень туртов чачомстонзо саезь карматано ловномо домка смустень кандыця мазый ёвкст, истят, кодат совавтозь «Эрясь-аштесь ёвкске…» книгантень.

Эйсэнзэ, кода уш меринек, 38 ёвкст. Весе сынь тонавтыть паронть нееме, мазыенть редямо, весе сень вечкеме, мезе ули перьканок. Ёвксонь откертне (геройтне) – ракшат, нармунть, маравт-унжат, цецят-тикшеть. Весе сынь, кода паро ломантне, «тонавтыть видечинть кисэ аштеме, шныть превейтнень, седеймарицятнень, тевень вечкицятнень, вадряс бажицятнень, сялдыть превтеметнень, важодемадо орголицятнень, казямо седей мартотнень».

Саемс «Ожо лопа» ёвкскенть. Эйсэнзэ ёвтневи Минька вишка овтынеде, кона, кода весе вишкинетне, пек вечки налксеме, эрьва ков судонзо эцнеме. Весть, истя налксезь-кеверькшнезь, понгсь укштор алов. Тесэ чаманзо лангс прась лопа: покш, мазый, ожо. Овтынесь эзь кирдеве, кевкстизе лопанть: «Мекс тон ожо?». Лопась тень каршо кармась толковамо, келя, монь эрямом эрявсь, весе виень максынь авань туртов, чувтонтень, конань пек вечкса, секс ней мон туян.

Неть валтнэ токизь овтыненть, мелезэнзэ ледсь авазо, сонгак сырель, ансяк овтыненть арасель мелезэ туемс. Аваськак ульнесь жаль. Тень кувалма аварьгадсь. Оймась, зярдо авазо толковизе, мейсэ эрямонть смустезэ.

Улемс седеймарицякс, стака шкасто лезксэнь максомо капшицякс тонавты «Ормаменькс» ёвкскеськак. Сонзэ ушодкссо уш ловныцянть седейс токи мелявксось сень эйстэ, мекс вирень лейчиресэ кармась сэтьме ды нусманя. «Пиже озязтнэ а вешкить, ватракштне а ватордыть, чеертне а каштордыть». А-а, оно мекс: ормалгадсь Пшти Пейне миявлевкскесь (мияв – руз. бобр), кармась сэредеме уропейнезэ. Весе мелявтыть, чийнить, тонавтыть, кода пичкавтомс сэредицянть. Чийсть Вик-Вик урнэськак, Чив-Чив озязнэськак, Вак-Вак ватракшкеськак, ваныть сэредицянть лангс, оймавтыть эйсэнзэ. Вейсэ арсизь, таргамс миявлевкскенть пеензэ. Ансяк Шекшатась анокстась тень тееме, Пшти Пейне кекшсь ведьпарсейтнень потс ды тосто серьгедсь, келя, а эряви мезеяк теемс, пеем лоткась сэредемеде.

Истямо сюжет марто ёвкскенть аберянь улевель налксемс эйдень кужосояк. Сон тонавты улемс вейке-вейкень кисэ мелявтыцякс, теке марто карды манчицятненьгак: миявлевкскенть, кода мейле весе чарькодсть ёвкссонть, мезезэяк эзь сэреде, ансяк прянзо теизе сэредицякс, истямо ладсо арсесь солавтомс весень седеест ды сонзэ кармить жалямо.

Лия ёвкскетнестэяк вишка ловныцясь эстензэ саи мезеяк од, карми седе ламо содамо эрьва кодат касовкстнэде, тееви содавиксэкс вирень ламо ракшатнень марто. Вишка ловныцятнень мелест кастсызь артовкстнэяк (артыцясь Е. Лошакова). Сынь пек мазыйть, ракшатнень чачост невтезь истямокс, кодамокс ёвтневи се-тона ёвкссонть.

Ёвксонть ловноманзо шождалгавтсы аволь ансяк мазый эрзянь келесь, сеяк, весе ракшатнень улить эсест лемест: сеельнетне Пупакай ды Сялгине, кавто юмборгетне (руз. суслик) Кивчке ды Котьмай, нумолнэсь Нурька Пуло, ватракшкесь Лягатайка, урлевкскетне Вырк ды Луньк ды истя седе тов. Мезесь седеяк кармавтсы эйкакшонть ловномс книганть седе тов, вирень ламо ракшатнеде ёвтневи аволь ансяк вейке ёвкссо, сынь кармить вастневеме лия ёвкскетнесэяк, кармить сакшномо инжекс вейкест-вейкест туртов. Истямо ладсо вирькужонь эрицятне кармасть мукшномо эстест ялгат. Тень лангс прядови книгаськак.

Арсетяно, сонзэ карми улеме поладксозо, кода лия сёрмадовкстнэньгак, конатнень ловнозь, эрямось маряви седе мазыекс, валдокс ды сэтьмекс. Сынст учить ловныцятне, сехте пек вишка эйкакштне. Сынст ютксо эсензэ нуцькатнеяк: сисем иесэ Настя ды колмо иесэ Ксюша. Ули мель кемемс, ёвкскетнень ловнозь, сынь кармить содамо ды кортамо се кельсэнть, конанть ванстоманзо ды сюпалгавтоманзо кисэ максы весе виензэ, шканзо, шумбрачинзэ сынст вечкевикс сырькаест.

 

Раиса Щанкина,

Россиянь Журналистэнь

вейсэндявксос совиця.

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».