Вторник, августа 11, 2020
Важное

Свал покш мельсэ кунсолан малавиксэнь, зярдо сынь ёвтнить войнань иетнеде, раськеденек, зярдо сынь эштё одольть.
Сыре покштям ды кавто бабан тусть эрямосто овсе аволь умок. Мон сынст мельсэ кирдян, а вана омбоце сыре покштянть, Ине Отечественной войнань участникенть, конадо ули мелем сёрмадомс, содаса ансяк ёвтнематнень коряс. Сонзэ эзизе некшне авамгак, тусь эрямосто 1976 иестэ, авань чачомадо икеле.

Сыре покштянь лемезэ – Захар Архипович Сундуков. Сон чачокшнось 1923 иень ноябрянь 30-це чистэ Покш Игнатовань райононь Ташто Чамза велесэ. Семияст покшоль, важодицяль. Шкатне стакальть. Захар вишка порасто уш тонадсь пелюмасо тикшень ледеме, пенгень анокстамо ды стадань ваномо. Паксясояк, пиресэяк свал ульнесь васенцекс. Стакачитнень ды вачочинть лангс апак вано, покш мелезэль тонавтнемс. Сонензэ удалась прядомс 8 иень школанть. Захар свал явовиль эсь оятнень ютксто. Ульнесть «сырнень» кедензэ, маштыль тееме эрьва мезе. Теде башка, велесэнть содылизь кода паро гармонистэнть. Вейкеяк свадьба сонтемензэ а ютниль.

Ушодовсь войнась. 1942 иень майстэ 18 иесэ Захар Сундуков оянзо марто тусь фронтов. Се шкане Московонть перька тевтне пек стакальть. Сундуков I-це Украинской фронтонть составсо кирдсь оборонительной рубеженть. Сон ульнесь 334 отдельной пулемётно-артиллерийской батальононь радиотелеграфистэкс. Стакачитнень лангс апак вано, Захар Сундуков лия солдаттнэнь марто пачколесь Берлинс, косо сельведь марто Рейхстагонть вакссо вастызе Ине Изнямонть.

Войнадонть мейле сыре покштям аволь сеске понгсь тиринь ёнксов. Эштё колмо иеть савсь служамс Якстере Армиясо. Сестэ ульнесть истят койтне. 1948 иестэ велявтсь тиринь велев ды кармась роботамо бригадирэкс. Чокшне ланга таргилизе гармониянть, перьканзо свал пурнавильть од ломанть. Урьвакстсь Нина тейтеренть (монь бабань) лангс. Чачсть кото эйкакшост.

Сехте покш тейтерест валонзо коряс, Захар а пек вечкиль ледстнеме войнадонть. Зярдо икелензэ энялдыльть мезеяк ёвтнемс, сон ушодыль седямо ды морамо военной морот, мейле авардезевиль. Вечкевикс морозо ульнесь – «Бьется в тесной печурке огонь».

Овсе аволь умок Интернетстэ муинек Захар сыре покштянок лемс документт. Сынь – секретнойть. Печатазель Верховной Советэнь Президиумонть пельде Указ, косо кортавсь Захар Сундуковонь СССР-нь Якстере Знамянь Орденсэ каземадо. Муезель каземань листэськак, конасонть нурькинестэ ёвтнезель сонзэ подвигтенть.
Тетрадень листсэнть, кона шкадонть ожолгадокшнось, сёрмадозель: «Бреслау ошонть ды Одер леенть кис тюрематнесэ младшей сержантось Сундуков невтсь апелемачи. Немецень леднематнень шкасто кеветеексть витнекшнизе связенть, винтовкасто ледизе немецень корректировщикенть».

Минь таргинек неть питней документтнэнь. Сынь кармить ванстовомо семиянь архивсэнек. Мон ней эштёяк покш мельспаросо аштян эсь сыре покштянь кисэ. Карман бажамо улемс сонзэ кондямокс.

Данила ДЫДЫКИН
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».