Пятница, февраля 26, 2021
Важное

Кочкурбуень Сурвелесэ витнемадо мейле Од иенть каршо одс панжозель велень клубось. Сонзэ витнемазо топавтозель «Культура» национальной проектэнть лувсо. Тень туртов явозельть 9 998,7 миллионт целковойть ярмакт.



Витнемстэ полавтозель латось, путозельть од вальмат (ПВХ-нь) ды кенкшть, одс ацазель кияксось, чавнозельть стенатне, мазылгавтозель весе потмось. Одкстомтозь кудосонть явозь башка таркат, ков кармить сакшномо ды ютавтнеме репетицият творческой коллективтне, эйкакштнень туртов налксемань тарка, библиотека, 100 ломаньс ванома зал.

Клубонть панжомо сакшность МР-нь Культурань, национальной политикань ды архивень тевень коряс министрась С.Н. Баулина, Кочкурбуень прявтось С.Н. Герасимова. Поздоровонь ёвтамсто весе инжетне кемевтсть: велень клубсонть ушодови од эрямо. Тосо ламо мель кармить явомо од ломантнень ды эйкакштнень шкинемань ёрокчист кастомантень, кармить ютавтнеме патриотической ды культурно-массовой эрьва кодат акцият, вейсэнь оймсема чокшнеть. Теде башка, панжовить кужот, косо эйкакштнень кармить тонавтомо эрьва мезень тееме: кодамо, викшнеме, илейстэ паргонь-кептерень тееме ды истя седе тов.

Раськень койтнень ванстозь, панжтано ки сы шкантень

Те весе паро. Велень эрицятнестэ седе ламотне кемить: одкстомтозь клубонть панжоманзо марто эрямось полавтови. Эсень ёндо меревлинь истя: паро ладсо клубонть эряволь витнемс уш умок, зярдо велесь пешксель эрицядо. Ней сон, кода ламо лиятнеяк, допрок чамсь. Те – аламо. Эйкакштне, конатне истякак аламолгадсть, допрок рузыясть. Велесэ ней овсе а марят эрзякс кортыцят. Монь, кода Сурвелесэ чачозь ломаненть, те пек мелявтовты ды ризнэвти. Секс эрьва косо кортан ды тердян: велетнесэ васенце меленть явома эсенек койтнень-кирдатнень ванстомантень, конатнень ламо пингень перть таштасть-сюпалгавтсть ды кандызь тенек покштянок-бабанок. Ансяк истя ванстови эсензэ веленть чачозо, эйсэнзэ эрицятнень сюпав оймест. Истямо ладсо велеськак карми эрямо ды сюпалгадомо седе тов. Кода кортави вейке валмеревкссэнть, раськень койтнень ванстозь, панжтано ки сы шкантень.
Те тевсэнть ламо мезесь ашти культурасо важодицятнень эйстэяк. Кармить сынь кирдеме те ёнксонть, лисни, Культурань кудонть витнемс явозь ярмактне ютавтозь аволь стяко. Ды те тевсэнть мезеяк од а сави панжомс. Саты ансяк ледстямс, кода Сурвелесэ эрясь Культурань кудось икеле, кодат тевть топавтсть эйсэнзэ важодицятне. Эрьга, миньгак варштатано ютазь шкантень.

«Культурань эрямось икеле лаказь лакась…»

«1967 иестэ Сурвелесэ панжинзе кенкшензэ Культурань кудось, козонь кельгстявить 500 ламо ломанть», – ловнотано Кочкурбуень Сабаева веледенть исторической сёрмадовкстнэсэ. Сестэ те ульнесь покштояк покш кенярксчикс. Окойники Сурвелесэ панжозь Культурань кудо! Теде икеле ломантне пурнавкшность кельме кудынес, кона эзь уштневе ды косо кувака эземтнеде башка мезеяк арасель. Ды вана Сурвелень эрицятнень туртов панжсть покш, лембе кудо, ков яксильть кинонь ваномояк, моронь кунсоломояк.
Сурвелесэ культурань эрямось се шкастонть, прянь апак шна мерьсынек, лаказь лакась. Морамонь, киштемань, сценкасо налксемань ёрокчист кармасть невтнеме велень эрицятнеяк. Нурька шкас сынь ламо мезес тонадсть. А стяко эйсэст кармасть тердтнеме лия велетнева, районтнэва, ды натой лия оштнева. Аволь весть якасть натой Московов, косто велявтнесть изницянь ды лауреатонь казне марто.
Мородо башка Культурань кудосонть эсь тевензэ топавтсь театральной студиясь. Эйзэнзэ якицятне путнесть эрьва кодат сценкат эрзякс сёрмадыцятнень пьесаст коряс. Весемеде покш мельсэ ломантне сакшность К. Петровань пьесанзо коряс «Ташто койсэ» спектаклянть ваномо. Сонзэ эйсэ налксесть школасо тонавтыцят, правлениясо важодицят, колхозникть. Сынст ютксольть се шкасто школань прявтось Василий Трофимович Вельдяскин, физикань тонавтыцясь Александр Иванович Зорькин (фотосонть вить ёно).

Теньсэ, кода ледстнить ветерантнэ, весемеде покш путовксозо ульнесь Александр Сергеевич Бушаевень, кие се шкастонть ульнесь Сабаевань клубонь прявтокс. Ламос бажиця, оймамонь а содыця, сон лиятнень седейсэяк маштсь кирвазтеме шкинемань толонть.

Сонзэ пингстэ од ломантне кармасть пурнамо эсест курот, седе сыретне – эсест. Истя, вейке омбоце мельга кармасть теевеме ансамблят. Фольклоронь ансамблядонть башка ульнесть вокально-инструментальнойтькак. Вейкесэнть, конань лемезэль «Сурань толт», морамонь эсензэ ёрокчинзэ васенцеде терявтызе «Торама» ансамблясо икеле морыцясь, неень «Морамо» ансамблянь прявтось Геннадий Дулкин. Лия ялганзо марто, сынст ютксольть П. Пахомов, А. Зорькин, Н. Горбунов (колмонест гитарасо седицяльть), О. Гангеев (баянсо налксицяль), Н. Ловштанов (барабанщикель), сынь эсест налксемасост виде-паро прамозост киштевтсть од ломантнень, конатнеде тыц пешкедиль клубось, весемеде пек оймсема читнестэ, а козонь ульнесь умарнень прамс.
Сынст марто вейсэ од ломантнень «сыргавтыцякс» ульнесь Тамара Петровна Горбунова (мирдень коряс Пиняскина), кона се шкастонть ансяк прядызе школанзо ды кармась важодеме клубсо (1978 иестэ саезь). Ды те «очкосонть» сон, кода мерить, лакась 40 ламо иеть.

Маринк минек тердеманок…

Шкась а ашти таркасонзо. Сонзэ марто полавтовить ломантне, таштомить ды каладыть кудотне. Кодгемень иетнень перть Культурань кудоськак таштомсь. Кияксось наксадсь, кенкштне каладсть, стенатне вариясть. Ушо ёндояк сон амазылгадсь, весе луводсь, латозо кармась кольгеме. Сонзэ прявтось Т.П. Пиняскина ламо иень перть тапась пильгть верце эземтнева аштицятнень кедьга яказь. Кодамо кенкшс ансяк сон эзь совсе, кинь икеле ансяк эзь энялдо. Сестэ сонзэ кияк эзь маря эли тейсть пря амарицякс.

Сурвелень эрицятнеяк кувать учость, зярдо сынь икеле ладсо кармить яксеме клубов, косо карми ванькс, лембе ды мазый, косо сынст туртов кармить гайгеме морот, кармить ютавтнеме киштемань кужот. Кунсоломс тосо ули кинь. Васняяк, «Сурань зорюват» ансамблянть, кона умок теевсь содавиксэкс эрьва косо. Эсест велесэ сонзэ содасызь поте эйкакшсто саезь. Виде, зярыя иеть те ансамблясь «чатьмонсь». Ней сон таго вельмесь. Эйзэнзэ састь од морыцят. Арсетяно, тевест туить парсте.

Паро куля кандсь эйкакшонь «Цёковне» ансамбляськак, конань прявтсоль Т.Н. Калачина. Ней сондензэ мезеяк а марсеви. Сонзэ таркас пек васов эсензэ лементь гайневтизе морыцянь од курось, конанень максозель пек мазый лем: «Виринея». Эйсэнзэ зярыя ават. Морамонь коряс асатыкст арасть. Ансяк репертуарсост ансяк рузонь морот.
Арась мелем сялдомс Культурань кудонь неень шкань прявтонть Алексей Владимировонь. Сон теи эсь тевензэ ков сатыть виензэ. Теке марто энялдан одов вельмевтемс эсенек койтнень. Саемс, Троицянь чинть. Эсь шкасто «Ламзурь» ансамблясо морыцятне, конатнень ютксо седе ламотне ульнесть Сурвелестэ, те чинть ютавтнесть седикеле ладсо. Наряжазь килей марто ютыльть велеванть, морсильть эрзянь морот, ютавтыльть эрьва кодат киштемат, налксемат, пелькстамот. Мейле те коесь полавтозель. Тарказонзо ней ютавтнить ансяк моронь кужот.
Арсян, монь тердематне улить марязь ды Сурвелесэ одкстомтозь клубось карми важодеме кавонзазь вийсэ ды эсензэ перька пурнамо весе ломантнень: эрицятненьгак, инжетненьгак.

Рая Дулкина,
Сурвелесэ чачозь-касозь эйде.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».